ਗਿਰੋਹ ਦੇ ਸਾਰੇ ਮੈਂਬਰ ਹਰਿਆਣਾ ਦੇ ਰਹਿਣ ਵਾਲੇ ਹਨ 

ਨਮਕਲ (ਤਾਮਿਲਨਾਡੂ) : ਕੇਰਲ ਦੇ ਤ੍ਰਿਸੂਰ ’ਚ ATM ਲੁੱਟਣ ਵਾਲੇ ਸ਼ੱਕੀ ਗਿਰੋਹ ਦਾ ਇਕ ਮੈਂਬਰ ਸ਼ੁਕਰਵਾਰ ਨੂੰ ਤਾਮਿਲਨਾਡੂ ਪੁਲਿਸ ਨਾਲ ਮੁਕਾਬਲੇ ’ਚ ਮਾਰਿਆ ਗਿਆ ਅਤੇ 6 ਹੋਰ ਮੁਲਜ਼ਮਾਂ ਨੂੰ ਹਿਰਾਸਤ ’ਚ ਲੈ ਲਿਆ ਗਿਆ।

ਇਕ ਸੀਨੀਅਰ ਪੁਲਿਸ ਅਧਿਕਾਰੀ ਨੇ ਦਸਿਆ ਕਿ ਇਹ ਮੁਕਾਬਲਾ ਉਸ ਸਮੇਂ ਹੋਇਆ ਜਦੋਂ ਸੱਤ ਸ਼ੱਕੀਆਂ ਦਾ ਇਕ ਸਮੂਹ ਜ਼ਿਲ੍ਹੇ ਦੇ ਕੁਮਾਰਪਾਲਯਮ ਵਿਚ ਕਾਰਾਂ ਅਤੇ ਦੋ ਪਹੀਆ ਗੱਡੀਆਂ ਨੂੰ ਟੱਕਰ ਮਾਰ ਕੇ ਭੱਜਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ। 

ਸਲੇਮ ਰੇਂਜ ਦੀ ਡੀ.ਆਈ.ਜੀ. ਈ.ਐਸ. ਉਮਾ ਨੇ ਪੱਤਰਕਾਰਾਂ ਨੂੰ ਦਸਿਆ ਕਿ ਲੁੱਟ ’ਚ ਵਰਤੀ ਗਈ ਕਾਰ ਅਤੇ ਕੰਟੇਨਰ ਟਰੱਕ ਨੂੰ ਜ਼ਬਤ ਕਰ ਲਿਆ ਗਿਆ ਹੈ ਅਤੇ ਜ਼ਿਲ੍ਹੇ ’ਚ ਹਾਲ ਹੀ ’ਚ ਹੋਈ ATM ਲੁੱਟ ’ਚ ਉਨ੍ਹਾਂ ਦੀ ਭੂਮਿਕਾ ਦਾ ਪਤਾ ਲਗਾਉਣ ਲਈ ਜਾਂਚ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਦਸਿਆ ਕਿ ਪੁਲਿਸ ਨੇ ਆਤਮ ਰੱਖਿਆ ’ਚ ਗੋਲੀਆਂ ਚਲਾਈਆਂ, ਜਿਸ ’ਚ ਇਕ ਸ਼ੱਕੀ ਜ਼ਖਮੀ ਹੋ ਗਿਆ। 

ਅਧਿਕਾਰੀਆਂ ਨੇ ਦਸਿਆ ਕਿ ਦੋ ਪੁਲਿਸ ਅਧਿਕਾਰੀ ਵੀ ਜ਼ਖਮੀ ਹੋ ਗਏ ਜਦੋਂ ਉਨ੍ਹਾਂ ਨੇ ਕੰਟੇਨਰ ਡਰਾਈਵਰ ਅਤੇ ਉਸ ਦੇ ਸਾਥੀ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ ਜਦੋਂ ਉਹ ਭੱਜਣ ਦੀ ਕੋਸ਼ਿਸ਼ ਕਰ ਰਹੇ ਸਨ। 

ਪੁਲਿਸ ਅਧਿਕਾਰੀ ਨੇ ਦਸਿਆ ਕਿ ਜ਼ਖਮੀ ਪੁਲਿਸ ਮੁਲਾਜ਼ਮਾਂ ਨੂੰ ਸਰਕਾਰੀ ਹਸਪਤਾਲ ’ਚ ਭਰਤੀ ਕਰਵਾਇਆ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਸ਼ੱਕੀਆਂ ਨੇ ਇਕ ਕੌਮੀਕ੍ਰਿਤ ਬੈਂਕ ਦੇ ATM ਨੂੰ ਨਿਸ਼ਾਨਾ ਬਣਾਇਆ।

ਉਨ੍ਹਾਂ ਦਸਿਆ ਕਿ ਗਿਰੋਹ ਦੇ ਮੈਂਬਰ ਦੋ ਗਰੁੱਪਾਂ ’ਚ ਵੰਡੇ ਗਏ ਅਤੇ ਲੁੱਟ ਨੂੰ ਅੰਜਾਮ ਦੇਣ ਲਈ ਹਰਿਆਣਾ ਤੋਂ ਇਕ ਕੰਟੇਨਰ ਟਰੱਕ ਅਤੇ ਇਕ ਕਾਰ ’ਚ ਵੱਖ-ਵੱਖ ਸਫ਼ਰ ਕਰਦੇ ਸਨ। ਅਧਿਕਾਰੀ ਨੇ ਦਸਿਆ ਕਿ ਗਿਰੋਹ ਦੇ ਸਾਰੇ ਮੈਂਬਰ ਹਰਿਆਣਾ ਦੇ ਰਹਿਣ ਵਾਲੇ ਹਨ ਅਤੇ ਨਮਕਲ ਪੁਲਿਸ ਨੇ ਹਾਲ ਹੀ ’ਚ ਜ਼ਿਲ੍ਹੇ ’ਚ ਇਸੇ ਤਰ੍ਹਾਂ ਦੀ ਲੁੱਟ ਦੇ ਮਾਮਲੇ ’ਚ ਹਰਿਆਣਾ ਦੇ ਦੋ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ ਸੀ। 

ਇਕ ਸੀਨੀਅਰ ਪੁਲਿਸ ਅਧਿਕਾਰੀ ਨੇ ਪੱਤਰਕਾਰਾਂ ਨੂੰ ਦਸਿਆ ਕਿ ਤ੍ਰਿਸੂਰ ਪੁਲਿਸ ਤੋਂ ਮਿਲੀ ਸੂਚਨਾ ਦੇ ਆਧਾਰ ’ਤੇ ਨਮਕਲ ਦੇ ਪੁਲਿਸ ਸੁਪਰਡੈਂਟ ਐਸ ਰਾਜੇਸ਼ ਕੰਨਨ ਅਤੇ ਹੋਰ ਅਧਿਕਾਰੀਆਂ ਨੇ ਲੁੱਟ ’ਚ ਵਰਤੀ ਗਈ ਕਾਰ ਦੀ ਪਛਾਣ ਕਰਨ ਲਈ ਬੈਰੀਕੇਡ ਲਗਾਏ। 

ਉਨ੍ਹਾਂ ਕਿਹਾ, ‘‘ਇਸ ਤੋਂ ਤੁਰਤ ਬਾਅਦ, ਤ੍ਰਿਸੂਰ ਪੁਲਿਸ ਨੇ ਸਾਨੂੰ ਇਕ ਕੰਟੇਨਰ ਟਰੱਕ ਬਾਰੇ ਸੂਚਿਤ ਕੀਤਾ। ਗੱਡੀਆਂ ਦੀ ਚੈਕਿੰਗ ਦੌਰਾਨ ਪੁਲਿਸ ਨੇ ਆਰਜੇ (ਰਾਜਸਥਾਨ) ਰਜਿਸਟ੍ਰੇਸ਼ਨ ਨੰਬਰ ਵਾਲੇ ਕੰਟੇਨਰ ਟਰੱਕ ਨੂੰ ਰੁਕਣ ਦਾ ਇਸ਼ਾਰਾ ਕੀਤਾ ਪਰ ਗੱਡੀਆਂ ਬਿਨਾਂ ਰੁਕੇ ਚਲਾ ਗਿਆ।’’

ਅਧਿਕਾਰੀ ਨੇ ਦਸਿਆ ਕਿ ਪੁਲਿਸ ਵਲੋਂ ਪਿੱਛਾ ਕਰਨ ਤੋਂ ਬਾਅਦ ਵਾਹਨ ਸੰਘੂਗਿਰੀ ਟੋਲ ਗੇਟ ਵਲ ਭੱਜਿਆ ਪਰ ਉਸ ਨੂੰ ਬੰਦ ਪਾਇਆ ਅਤੇ ਵੇਪਦਾਈ ਰੋਡ ’ਤੇ ਭੱਜ ਗਿਆ। ਉਨ੍ਹਾਂ ਦਸਿਆ ਕਿ ਗੱਡੀ ਨੇ ਸੰਨਸਿਆਪੱਟੀ ਵਿਖੇ ਇਕ ਦੋ ਪਹੀਆ ਵਾਹਨ ਅਤੇ ਇਕ ਕਾਰ ਨੂੰ ਟੱਕਰ ਮਾਰ ਦਿਤੀ ਅਤੇ ਇਕ ਕਾਰ ਨੂੰ ਲਗਭਗ 250 ਮੀਟਰ ਤਕ ਘਸੀਟਿਆ। 

ਉਨ੍ਹਾਂ ਕਿਹਾ, ‘‘ਅਸੀਂ ਟਰੱਕ ਡਰਾਈਵਰ ਅਤੇ ਕੈਬਿਨ ’ਚ ਮੌਜੂਦ ਚਾਰ ਹੋਰ ਲੋਕਾਂ ਨੂੰ ਹਿਰਾਸਤ ’ਚ ਲੈ ਲਿਆ ਹੈ। ਗੱਡੀ ਨੂੰ ਵੇਪਦਾਈ ਥਾਣੇ ਲਿਜਾਂਦੇ ਸਮੇਂ, ਅਸੀਂ ਕੰਟੇਨਰ ਦੇ ਪਿਛਲੇ ਹਿੱਸੇ ਤੋਂ ਇਕ ਉੱਚੀ ਆਵਾਜ਼ ਸੁਣੀ ਅਤੇ ਡਰਾਈਵਰ ਨੂੰ ਰੁਕਣ ਲਈ ਕਿਹਾ।’’ ਡਰਾਈਵਰ ਦੀ ਪਛਾਣ ਜਮਾਲ ਵਜੋਂ ਹੋਈ ਹੈ। 

ਅਧਿਕਾਰੀ ਨੇ ਦਸਿਆ ਕਿ ਜਦੋਂ ਡਰਾਈਵਰ ਨੇ ਦਰਵਾਜ਼ਾ ਖੋਲ੍ਹਿਆ ਤਾਂ ਕੰਟੇਨਰ ’ਚੋਂ ਦੋ ਵਿਅਕਤੀ ਬਾਹਰ ਆਏ। ਉਨ੍ਹਾਂ ਵਿਚੋਂ ਇਕ ਨੇ ਜਮਾਲ ਨੂੰ ਭੱਜਣ ਲਈ ਕਿਹਾ ਅਤੇ ਉਸ ਨੇ ਤੇਜ਼ਧਾਰ ਹਥਿਆਰ ਨਾਲ ਪੁਲਿਸ ਇੰਸਪੈਕਟਰ ’ਤੇ ਹਮਲਾ ਕਰਨ ਤੋਂ ਬਾਅਦ ਭੱਜਣ ਦੀ ਕੋਸ਼ਿਸ਼ ਕੀਤੀ। ਉਨ੍ਹਾਂ ਨੇ ਦਸਿਆ ਕਿ ਇਕ ਵਿਅਕਤੀ ਕੋਲ ਨਕਦੀ ਨਾਲ ਭਰਿਆ ਨੀਲਾ ਬੈਗ ਸੀ। 

ਡੀ.ਆਈ.ਜੀ. ਨੇ ਦਸਿਆ ਕਿ ਜਦੋਂ ਪੁਲਿਸ ਅਧਿਕਾਰੀ ਨੇ ਉਸ ਨੂੰ ਫੜਨ ਦੀ ਕੋਸ਼ਿਸ਼ ਕੀਤੀ ਤਾਂ ਜਮਾਲ ਨੇ ਉਸ ’ਤੇ ਵੀ ਹਮਲਾ ਕਰ ਦਿਤਾ। ਪੁਲਿਸ ਨੂੰ ਦੋਹਾਂ ਨੂੰ ਭੱਜਣ ਤੋਂ ਰੋਕਣ ਲਈ ਗੋਲੀਆਂ ਚਲਾਉਣੀਆਂ ਪਈਆਂ। 

ਉਨ੍ਹਾਂ ਨੇ ਦਸਿਆ ਕਿ ਜਮਾਲ ਦੀ ਮੌਤ ਹੋ ਗਈ, ਜਦਕਿ ਪੈਸੇ ਵਾਲਾ ਬੈਗ ਲੈ ਕੇ ਭੱਜਣ ਵਾਲੇ ਵਿਅਕਤੀ ਦੀ ਲੱਤ ’ਚ ਗੋਲੀ ਲੱਗੀ। ਉਨ੍ਹਾਂ ਕਿਹਾ, ‘‘ਅਸੀਂ ਪੰਜਾਂ ਨੂੰ ਹਿਰਾਸਤ ’ਚ ਲੈ ਲਿਆ ਅਤੇ ਜ਼ਖਮੀ ਵਿਅਕਤੀ ਨੂੰ ਸਰਕਾਰੀ ਹਸਪਤਾਲ ’ਚ ਭਰਤੀ ਕਰਵਾਇਆ।’’ ਇਕ ਸਵਾਲ ਦੇ ਜਵਾਬ ਵਿਚ ਉਨ੍ਹਾਂ ਕਿਹਾ ਕਿ ਪੁਲਿਸ ਨੂੰ ਕੰਟੇਨਰ ਟਰੱਕ ਦੇ ਅੰਦਰ ਇਕ ਕਾਰ ਅਤੇ ਦੋ ਵਿਅਕਤੀਆਂ ਦੀ ਮੌਜੂਦਗੀ ਬਾਰੇ ਕੋਈ ਜਾਣਕਾਰੀ ਨਹੀਂ ਹੈ।