41 ਸਾਲ ਹੋ ਗਏ ਸਾਨੂੰ ਤਾਂ ਹੁਣ ਉਮੀਦ ਹੀ ਨਹੀਂ ਸੀ ਸਾਨੂੰ ਕੁੱਝ ਮਿਲੇਗਾ : ਪੀੜਤ
1984 ਵਿਚ ਹੋਏ ਸਿੱਖ ਕਤਲੇਆਮ ਨੂੰ 41 ਸਾਲ ਹੋ ਗਏ ਹਨ। ਹੁਣ ਇਸ ਕਤਲੇਆਮ ਦੇ ਪੀੜਤਾਂ ਨੂੰ 41 ਸਾਲਾਂ ਬਾਅਦ ਦਿੱਲੀ ਸਕਰਾਰ ਵਲੋਂ ਨੌਕਰੀਆਂ ਦਿਤੀਆਂ ਗਈਆਂ ਹਨ। ਜਿਨ੍ਹਾਂ ਨਾਲ ਰੋਜ਼ਾਨਾ ਸਪੋਕਸਮੈਨ ਦੀ ਟੀਮ ਨੇ ਮੁਲਾਕਾਤ ਕੀਤੀ। ਚਾਂਦ ਕੌਰ ਨੇ ਗੱਲਬਾਤ ਕਰਦੇ ਹੋਏ ਕਿਹਾ ਕਿ ਘਰ ਦਾ ਗੁਜ਼ਾਰਾ ਚਲਾਉਣ ਲਈ ਪ੍ਰਾਈਵੇਟ ਕੰਮ ਕਰਦੇ ਸੀ ਤੇ ਹੁਣ ਬਹੁਤ ਮੁਸ਼ਕਲਾਂ ਦਾ ਸਾਹਮਣਾ ਕਰਨ ਤੋਂ ਬਾਅਦ ਦਿੱਲੀ ਸਰਕਾਰ ਨੇ ਸਾਨੂੰ ਨੌਕਰੀ ਦਿਤੀ ਹੈ ਜਿਸ ਨਾਲ ਸਾਨੂੰ ਚੰਗਾ ਲੱਗ ਰਿਹਾ ਹੈ। ਅਮਰ ਸਿੰਘ ਨੇ ਕਿਹਾ ਕਿ ਜੇ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਕਾਰਵਾਈ ਨਾ ਕਰਦੀ ਤਾਂ ਸਾਨੂੰ ਨੌਕਰੀ ਨਹੀਂ ਮਿਲਣੀ ਸੀ।
ਇਕ ਹੋਰ ਵਿਅਕਤੀ ਨੇ ਕਿਹਾ ਕਿ ਸਾਨੂੰ ਤਾਂ ਉਮੀਦ ਹੀ ਨਹੀਂ ਸੀ ਕਿ ਸਾਨੂੰ ਨੌਕਰੀ ਮਿਲੇਗੀ, ਪਰ ਸਾਡੇ ਪ੍ਰਧਾਨ ਨੇ ਸਾਡੇ ਨਾਲ ਡਟ ਕੇ ਲੜਾਈ ਲੜੀ ਜਿਸ ਨਾਲ ਸਾਨੂੰ ਨੌਕਰੀ ਮਿਲੀ ਹੈ। 1984 ਵਿਚ ਮੇਰੀ ਉਮਰ ਬਹੁਤ ਛੋਟੀ ਸੀ ਜਿਸ ਦੌਰਾਨ ਮੇਰੇ ਪਿਤਾ ਜੀ ਦੀ ਮੌਤ ਹੋ ਗਈ ਸੀ। ਹੁਣ ਮੈਂ ਕੰਮ ਕਰਦਾ, ਪੜ੍ਹਦਾ ਜਾਂ ਫਿਰ ਆਪਣਾ ਘਰ ਚਲਾਉਂਦਾ ਇਸ ਤੋਂ ਵੱਡੀ ਮੁਸੀਬਤ ਕੀ ਹੋ ਸਕਦੀ ਹੈ। ਅਸੀਂ ਅੱਜ ਤਕ ਮੁਸੀਬਤਾਂ ਹੀ ਕੱਟੀਆਂ ਹਨ। ਇਕ ਹੋਰ ਪੀੜਤ ਵਿਅਕਤੀ ਨੇ ਕਿਹਾ ਕਿ 1984 ਦੇ ਕਤਲੇਆਮ ਮੌਕੇ ਮੇਰੀ ਉਮਰ 5 ਸਾਲ ਸੀ ਤੇ ਹੁਣ ਤਕ ਲੜਦੇ ਲੜਦੇ ਅਸੀਂ ਟੁੱਟ ਚੁੱਕੇ ਸੀ।
ਅਸੀਂ ਬੀਜੇਪੀ, ਦਿੱਲੀ ਦੀ ਮੁੱਖ ਮੰਤਰੀ ਰੇਖਾ ਗੁਪਤਾ, ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਤੇ ਪ੍ਰਧਾਨ ਦਾ ਧਨਵਾਦ ਕਰਦੇ ਹਾਂ ਜਿਨ੍ਹਾਂ ਨੇ ਸਾਨੂੰ ਰਾਹਤ ਭਰੀ ਸਾਹ ਦਿਤੀ। ਇਕ ਹੋਰ ਵਿਅਕਤੀ ਨੇ ਕਿਹਾ ਕਿ ਅਜਿਹੀ ਕੋਈ ਦਿਕਤ ਨਹੀਂ ਹੋਵੇਗੀ ਜੋ ਅਸੀਂ ਆਪਣੀ ਜ਼ਿੰਦਗੀ ਵਿਚ ਨਹੀਂ ਦੇਖੀ ਹੋਵੇਗੀ। ਅਸੀਂ ਸਿਰਸਾ ਸਾਹਿਬ ਤੇ ਗੁਰਦੁਆਰਾ ਕਮੇਟੀ ਤੇ ਪ੍ਰਧਾਨ ਦਾ ਧਨਵਾਦ ਕਰਦੇ ਹਾਂ ਜਿਨ੍ਹਾਂ ਨੇ ਸਾਨੂੰ ਇਥੇ ਤਕ ਪਹੁੰਚਾ ਦਿਤਾ।
