ਸੁਪਰੀਮ ਕੋਰਟ ਦੇ ਜੱਜ ਨੇ ਕੇਂਦਰ ਦੇ ਦਖ਼ਲ 'ਤੇ ਇਤਰਾਜ਼ ਕੀਤਾ

 ਸੁਪਰੀਮ ਕੋਰਟ ਦੇ ਸੀਨੀਅਰ ਜੱਜ ਜੇ ਚੇਲਾਮਸ਼ਵਰ ਨੇ ਮੁੱਖ ਜੱਜ ਨੂੰ ਚਿੱਠੀ ਲਿਖ ਕੇ ਉਨ੍ਹਾਂ ਨੂੰ ਨਿਆਂਪਾਲਿਕਾ ਵਿਚ ਕਾਰਜਪਾਲਿਕਾ ਦੇ ਕਥਿਤ ਦਖ਼ਲ ਦੇ ਮੁੱਦੇ 'ਤੇ ਮੁਕੰਮਲ ਬੈਂਚ ਬੁਲਾਉਣ ਬਾਰੇ ਵਿਚਾਰ ਕਰਨ ਲਈ ਕਿਹਾ ਹੈ।  ਜੱਜ ਚੇਲਾਮੇਸ਼ਵਰ ਨੇ 21 ਮਾਰਚ ਨੂੰ ਲਿਖੇ ਪੱਤਰ ਵਿਚ ਕਿਹਾ, 'ਨਿਆਂਪਾਲਿਕਾ ਅਤੇ ਸਰਕਾਰ ਵਿਚਕਾਰ ਕਿਸੇ ਵੀ ਤਰ੍ਹਾਂ ਦਾ ਭਾਈਚਾਰਾ ਜਮਹੂਰੀਅਤ ਲਈ ਮੌਤ ਦੀ ਘੰਟੀ ਹੈ।'  ਸਿਖਰਲੀ ਅਦਾਲਤ ਦੇ 22 ਹੋਰ ਜੱਜਾਂ ਨੂੰ ਵੀ ਭੇਜੇ ਗਏ ਇਸ ਨਿਵੇਕਲੇ ਪੱਤਰ ਵਿਚ ਕਰਨਾਟਕ ਹਾਈ ਕੋਰਟ ਦੇ ਮੁੱਖ ਜੱਜ ਦਿਨੇਸ਼ ਮਾਹੇਸ਼ਵਰੀ ਦੁਆਰਾ ਕੇਂਦਰੀ ਕਾਨੂੰਨ ਮੰਤਰਾਲੇ ਦੇ ਇਸ਼ਾਰੇ 'ਤੇ ਜ਼ਿਲ੍ਹਾ ਅਤੇ ਸੈਸ਼ਨ ਜੱਜ ਕ੍ਰਿਸ਼ਨ ਭੱਟ ਵਿਰੁਧ ਸ਼ੁਰੂ ਕੀਤੀ ਗਈ ਜਾਂਚ 'ਤੇ ਸਵਾਲ ਉਠਾਏ ਗਏ। ਖ਼ਾਸ ਗੱਲ ਹੈ ਕਿ ਕਾਲੇਜੀਅਮ ਨੇ ਦੋ ਵਾਰ ਤਰੱਕੀ ਲਈ ਉਸ ਦੇ ਨਾਮ ਦੀ ਸਿਫ਼ਾਰਸ਼ ਕੀਤੀ ਸੀ। 

Supreme Court

ਜੱਜ ਚੇਲਮੇਸ਼ਵਰ ਨੇ ਛੇ ਪੰਨਿਆਂ ਦੀ ਚਿੱਠੀ ਵਿਚ ਲਿਖਿਆ ਕਿ ਬੰਗਲੌਰ ਤੋਂ ਕਿਸੇ ਇਕ ਨੇ ਰਸਾਤਲ 'ਤੇ ਜਾਣ ਦੀ ਦੌੜ ਵਿਚ ਸਾਨੂੰ ਪਹਿਲਾਂ ਹੀ ਹਰਾ ਦਿਤਾ ਹੈ। ਕਰਨਾਟਕ ਹਾਈ ਕੋਰਟ ਦੇ ਮੁੱਖ ਜੱਜ ਕਾਰਜਪਾਲਿਕਾ ਦੇ ਹੁਕਮ 'ਤੇ ਕੰਮ ਕਰਨ ਦੇ ਬਹੁਤ ਇੱਛੁਕ ਹਨ। ਨਿਆਇਕ ਆਜ਼ਾਦੀ ਦਾ ਮੁੱਦਾ ਚੁਕਦਿਆਂ ਉਨ੍ਹਾਂ ਕਿਹਾ, 'ਸੁਪਰੀਮ ਕੋਰਟ ਦੇ ਜੱਜਾਂ 'ਤੇ ਕਾਰਜਪਾਲਿਕਾ ਦੇ ਵਧਦੇ ਦਖ਼ਲ ਸਾਹਮਣੇ ਅਪਣੀ ਨਿਰਪੱਖਤਾ ਅਤੇ ਅਪਣੀ ਸੰਸਥਾਗਤ ਈਮਾਨਦਾਰੀ ਖੋਣ ਦਾ ਦੋਸ਼ ਲੱਗ ਰਿਹਾ ਹੈ।' 
ਜੱਜ ਨੇ ਕਾਲੇਜੀਅਮ ਦੁਆਰਾ ਨਾਵਾਂ ਦੀ ਸਿਫ਼ਾਰਸ਼ ਮਗਰੋਂ ਵੀ ਸਰਕਾਰ ਦੇ ਫ਼ਾਈਲਾਂ 'ਤੇ ਬੈਠੇ ਰਹਿਣ ਬਾਰੇ ਨਾਖ਼ੁਸ਼ੀ ਵਾਲੇ ਅਨੁਭਵ ਦਾ ਜ਼ਿਕਰ ਕੀਤਾ। (ਏਜੰਸੀ)