ਨਵੀਂ ਦਿੱਲੀ: ਇਨਫੋਰਸਮੈਂਟ ਡਾਇਰੈਕਟੋਰੇਟ ਨੇ ਕਾਰੋਬਾਰੀ ਗਗਨ ਧਵਨ ਨੂੰ ਕਰੀਬ 5000 ਕਰੋੜ ਰੁਪਏ ਤੋਂ ਜਿਆਦਾ ਦੇ ਬੈਂਕ ਧੋਖਾਧੜੀ ਨਾਲ ਜੁੜੇ ਮਾਮਲੇ ਵਿੱਚ ਗ੍ਰਿਫਤਾਰ ਕੀਤਾ ਹੈ। ਡਾਇਰੈਕਟੋਰੇਟ ਨੇ ਮਨੀ ਲਾਂਡਿਰੰਗ ਐਕਟ ਦੇ ਤਹਿਤ ਇਹ ਗ੍ਰਿਫਤਾਰੀ ਕੀਤੀ ਹੈ।
ਇਸਤੋਂ ਪਹਿਲਾਂ ਬੀਤੇ ਅਗਸਤ ਮਹੀਨੇ ਵਿੱਚ ਡਾਇਰੈਕਟੋਰੇਟ ਨੇ ਰਾਸ਼ਟਰੀ ਰਾਜਧਾਨੀ ਦਿੱਲੀ ਵਿੱਚ ਕਾਂਗਰਸ ਦੇ ਸਾਬਕਾ ਵਿਧਾਇਕ ਸੁਮੇਸ਼ ਸ਼ੌਕੀਨ ਅਤੇ ਕਾਰੋਬਾਰੀ ਗਗਨ ਧਵਨ ਦੇ 12 ਠਿਕਾਣਿਆਂ ਉੱਤੇ ਛਾਪੇ ਮਾਰੇ ਸਨ। ਡਾਇਰੈਕਟੋਰੇਟ ਦੇ ਅਧਿਕਾਰੀਆਂ ਅਨੁਸਾਰ, ਉਨ੍ਹਾਂ ਨੂੰ ਸੂਚਨਾ ਮਿਲੀ ਸੀ ਕਿ ਸਿਆਸਤਦਾਨਾਂ ਅਤੇ ਨੌਕਰਸ਼ਾਹਾਂ ਦਾ ਕਾਲ਼ਾ ਧਨ ਸਫੇਦ ਕੀਤਾ ਜਾ ਰਿਹਾ ਹੈ।
ਈਡੀ ਦੁਆਰਾ ਜਿਨ੍ਹਾਂ ਠਿਕਾਣਿਆਂ ਉੱਤੇ ਛਾਪੇਮਾਰੀ ਕੀਤੀ ਗਈ ਸੀ, ਉਨ੍ਹਾਂ ਵਿੱਚ ਦੱਖਣ ਦਿੱਲੀ ਦੇ ਪਾਸ਼ ਈਸਟ ਆਫ ਕੈਲਾਸ਼ ਇਲਾਕੇ ਵਿੱਚ ਇੱਕ ਫਲੈਟ, ਬਸੰਤ ਕੁੰਜ ਇਲਾਕੇ ਵਿੱਚ ਸ਼ੀਸ਼ਾ ਮਾਰਬਲ ਪ੍ਰਾਇਵੇਟ ਲਿਮਿਟਡ ਦਫ਼ਤਰ ਸਹਿਤ ਪੰਜ ਫਲੈਟ, ਬੀਜਵਾਸਨ ਵਿੱਚ ਇੱਕ ਫਾਰਮਹਾਉਸ, ਬਾਰਾਖੰਬਾ ਇਲਾਕੇ ਵਿੱਚ ਸਥਿਤ ਇੰਦਰਪ੍ਰਕਾਸ਼ ਬਿਲਡਿੰਗ ਵਿੱਚ ਇੱਕ ਫਲੈਟ, ਚਾਣਕਿਅਪੁਰੀ ਵਿੱਚ ਇੱਕ ਫਲੈਟ ਅਤੇ ਚਾਵਲਾ ਇਲਾਕੇ ਵਿੱਚ ਇੱਕ ਫਲੈਟ ਸ਼ਾਮਿਲ ਸੀ। ਈਡੀ ਦੇ ਅਧਿਕਾਰੀਆਂ ਮੁਤਾਬਕ, ਮੁੰਬਈ ਦੇ ਚਾਰ ਇਨਕਮ ਟੈਕਸ ਅਧਿਕਾਰੀਆਂ ਉੱਤੇ ਵੀ ਉਨ੍ਹਾਂ ਦੀ ਨਜ਼ਰ ਸੀ।
ਸੂਤਰਾਂ ਨੇ ਦੱਸਿਆ ਸੀ ਕਿ ਈਥੋਪੀਆ ਸਹਿਤ ਕਈ ਦੇਸ਼ਾਂ ਵਿੱਚ ਕੰਮ-ਕਾਜ ਚਲਾਉਣ ਵਾਲੇ ਧਵਨ ਕੇਂਦਰੀ ਜਾਂਚ ਬਿਊਰੋ (ਸੀਬੀਆਈ) ਦੇ ਸਾਬਕਾ ਨਿਦੇਸ਼ਕ ਰਣਜੀਤ ਸਿਨਹਾ ਦੇ ਬੇਹੱਦ ਕਰੀਬੀ ਹਨ। ਰਣਜੀਤ ਸਿਨਹਾ ਨਾਲ ਮਿਲਣ ਆਉਣ ਵਾਲੇ ਯਾਤਰੀ ਦੀ ਸੂਚੀ ਵਿੱਚ ਧਵਨ ਦਾ ਨਾਮ 70 ਤੋਂ ਵੀ ਜਿਆਦਾ ਵਾਰ ਦਰਜ ਪਾਇਆ ਗਿਆ ਸੀ।