ਰਾਮੱਲਾ, 10 ਫ਼ਰਵਰੀ : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਕਿਹਾ ਹੈ ਕਿ ਫ਼ਲਸਤੀਨ ਦੀ ਸ਼ਾਂਤੀ ਅਤੇ ਖ਼ੁਸ਼ਹਾਲੀ ਪ੍ਰਤੀ ਭਾਰਤ ਵਚਨਬੱਧ ਹੈ। ਉਨ੍ਹਾਂ ਕਿਹਾ, 'ਸਾਡੀ ਵਿਦੇਸ਼ ਨੀਤੀ ਵਿਚ ਫ਼ਲਸਤੀਨ ਹਮੇਸ਼ਾ ਹੀ ਤਰਜੀਹੀ ਸੂਚੀ ਵਿਚ ਰਿਹਾ ਹੈ। ਅਸੀਂ ਇਸ ਖ਼ਿੱਤੇ ਦੀ ਸ਼ਾਂਤੀ ਅਤੇ ਸਥਿਰਤਾ ਦੇ ਹੱਕ ਵਿਚ ਹਾਂ।' ਫ਼ਲਸਤੀਨ ਦੇ ਰਾਸ਼ਟਰਪਤੀ ਮਹਿਮੂਦ ਅੱਬਾਸ ਨਾਲ ਅੱਜ ਮੋਦੀ ਨੇ ਅੱਜ ਮੁਲਾਕਾਤ ਕੀਤੀ। ਦੋਹਾਂ ਆਗਆਂ ਨੇ ਵੱਖ ਵੱਖ ਮੁੱਦਿਆਂ 'ਤੇ ਗੱਲਬਾਤ ਕੀਤੀ ਅਤੇ ਬਾਅਦ ਵਿਚ ਸਾਂਝਾ ਬਿਆਨ ਜਾਰੀ ਕੀਤਾ ਗਿਆ। ਮੋਦੀ ਨੇ ਕਿਹਾ ਕਿ 'ਰਾਸ਼ਟਰਪਤੀ ਨੇ ਮੈਨੂੰ ਅਪਣੇ ਦੇਸ਼ ਦੇ ਸਰਬਉੱਚ ਸਨਮਾਨ ਨਾਲ ਸਨਮਾਨਿਆ ਹੈ, ਇਹ ਸਾਰੇ ਭਾਰਤ ਦਾ ਸਨਮਾਨ ਹੈ।' ਮੋਦੀ ਨੇ ਕਿਹਾ ਕਿ ਭਾਰਤ ਅਤੇ ਫ਼ਲਸਤੀਨ ਵਿਚਕਾਰ ਜਿਹੜੇ ਪੁਰਾਣੇ ਅਤੇ ਮਜ਼ਬੂਤ ਇਤਿਹਾਸਕ ਸਬੰਧ ਹਨ, ਉਹ ਸਮੇਂ ਦੀ ਕਸੌਟੀ 'ਤੇ ਖਰੇ ਉਤਰੇ ਹਨ। ਫ਼ਲਸਤੀਨ ਦੇ ਹਿਤਾਂ ਨੂੰ ਸਾਡਾ ਸਮਰਥਨ ਸਾਡੀ ਵਿਦੇਸ਼ ਨੀਤੀ ਵਿਚ ਸੱਭ ਤੋਂ ਉਪਰ ਰਿਹਾ ਹੈ।  ਇਸ ਦੌਰਾਨ ਦੋਹਾਂ ਧਿਰਾਂ ਨੇ ਤਿੰਨ ਕਰੋੜ ਡਾਲਰ ਦੀ ਲਾਗਤ ਨਾਲ ਸੁਪਰ ਸਪੈਸ਼ਲਿਟੀ ਹਸਪਤਾਲ ਦੀ ਸਥਾਪਨਾ ਸਮੇਤ ਤਕਰੀਬਨ ਪੰਜ ਕਰੋੜ ਡਾਲਰ ਮੁਲ ਦੇ ਸਮਝੌਤਿਆਂ ਦੇ ਹਸਤਾਖਰ ਕੀਤੇ। ਰਾਸ਼ਟਰਪਤੀ ਅੱਬਾਸ ਨੇ ਰਾਮੱਲਾ ਸਥਿਤ ਰਾਸ਼ਟਰਪਤੀ ਭਵਨ ਵਿਚ ਮੋਦੀ ਦੀ ਅਗਵਾਈ ਕੀਤੀ। ਅੱਬਾਸ ਨਾਲ ਸਾਂਝੇ ਪੱਤਰਕਾਰ ਸੰਮੇਲਨ ਵਿਚ ਮੋਦੀ ਨੇ ਕਿਹਾ, 'ਅਸੀਂ ਜਾਣਦੇ ਹਾਂ ਕਿ ਇਹ ਓਨਾ ਆਸਾਨ ਨਹੀਂ ਹੈ ਪਰ ਸਾਨੂੰ ਯਤਨ ਕਰਦੇ ਰਹਿਣਾ ਚਾਹੀਦਾ ਹੈ ਕਿਉਂਕਿ ਕਾਫ਼ੀ ਕੁੱਝ ਦਾਅ 'ਤੇ ਹੈ।' 

ਉਧਰ, ਅੱਬਾਸ ਨੇ ਇਹ ਗੱਲ ਪ੍ਰਵਾਨ ਕੀਤੀ ਕਿ ਭਾਰਤ ਹਮੇਸ਼ਾ ਫ਼ਲਸਤੀਨ ਵਿਚ ਸ਼ਾਂਤੀ ਦੇ ਹੱਕ ਵਿਚ ਖੜਾ ਹੋਇਆ ਹੈ। ਅੱਬਾਸ ਨੇ ਕਿਹਾ, 'ਫ਼ਲਸਤੀਨ ਆਜ਼ਾਦ ਦੇਸ਼ ਦਾ ਦਰਜਾ ਹਾਸਲ ਕਰਨ ਦੇ ਅਪਣੇ ਟੀਚੇ ਦੀ ਪ੍ਰਾਪਤੀ ਲਈ ਗੱਲਬਾਤ ਕਰਨ ਲਈ ਹਮੇਸ਼ਾ ਤਿਆਰ ਹੈ। ਉਨ੍ਹਾਂ ਭਾਰਤ ਨੂੰ ਇਜ਼ਰਾਇਲ ਨਾਲ ਸ਼ਾਂਤੀ ਕਵਾਇਦ ਅੱਗੇ ਵਧਾਉਣ ਦੀ ਅਪੀਲ ਕੀਤੀ।  ਮੋਦੀ ਨੇ ਕਿਹਾ ਕਿ ਫ਼ਲਸਤੀਨ ਦੇ ਲੋਕਾਂ ਨੇ ਲਗਾਤਾਰ ਚੁਨੌਤੀਆਂ ਅਤੇ ਸੰਕਟ ਦੀ ਹਾਲਤ ਵਿਚ ਬੇਮਿਸਾਲ ਦ੍ਰਿੜਤਾ ਅਤੇ ਹੌਸਲਾ ਵਿਖਾਇਆ ਹੈ। ਚੱਟਾਨ ਜਿਹੀਆਂ ਚੁਨੌਤੀਆਂ ਨਾਲ ਸਿੱਝਦਿਆਂ ਸੰਕਲਪ ਸ਼ਕਤੀ ਵਿਖਾਈ ਹੈ। ਉਨ੍ਹਾਂ ਕਿਹਾ ਕਿ ਇਸ ਦੇ ਬਾਵਜੂਦ ਅਸਥਿਰਤਾ ਅਤੇ ਅਸੁਰੱਖਿਆ ਦਾ ਵਾਤਾਵਰਣ ਰਿਹਾ ਹੈ ਜੋ ਤਰੱਕੀ ਦੇ ਰਾਹ ਵਿਚ ਰੋੜਾ ਹੁੰਦਾ ਹੈ ਅਤੇ ਸਖ਼ਤ ਸੰਘਰਸ਼ ਨਾਲ ਹਾਸਲੇ ਕੀਤੇ ਗਏ ਲਾਭਾਂ ਨੂੰ ਖ਼ਤਰਿਆਂ ਵਿਚ ਪਾਉਂਦਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਦੇਸ਼ ਜਿਹੜੀਆਂ ਚੁਨੌਤੀਆਂ ਅਤੇ ਮੁਸ਼ਕਲਾਂ ਨੂੰ ਪਾਰ ਕਰਦਾ ਹੋਇਆ ਅੱਗੇ ਵਧਿਆ ਹੈ, ਉਹ ਸ਼ਲਾਘਾਯੋਗ ਹੈ। ਫ਼ਲਸਤੀਨੀ ਆਗੂ ਯਾਸਰ ਅਰਾਫ਼ਾਤ ਨੂੰ ਸ਼ਰਧਾਂਜਲੀ ਦੇਣ ਮਗਰੋਂ ਮੋਦੀ ਮਕਬਰੇ ਲਾਗੇ ਅਰਾਫ਼ਾਤ ਅਜਾਇਬ ਘਰ ਵਿਚ ਵੀ ਗਏ।   (ਏਜੰਸੀ)