ਸ਼ੋਪੀਆਂ ਗੋਲੀਬਾਰੀ ਮਾਮਲੇ ਵਿਚ ਮੁਲਜ਼ਮ ਨਹੀਂ ਮੇਜਰ
ਨਵੀਂ ਦਿੱਲੀ, 5 ਮਾਰਚ : ਜੰਮੂ-ਕਸ਼ਮੀਰ ਸਰਕਾਰ ਨੇ ਅੱਜ ਸੁਪਰੀਮ ਕੋਰਟ ਨੂੰ ਸੂਚਿਤ ਕੀਤਾ ਕਿ 27 ਜਨਵਰੀ ਨੂੰ ਹੋਈ ਸ਼ੋਪੀਆਂ ਫ਼ਾਇਰਿੰਗ ਦੇ ਮਾਮਲੇ ਵਿਚ ਦਰਜ ਐਫ਼ਆਈਆਰ 'ਚ ਮੁਲਜ਼ਮ ਵਜੋਂ ਮੇਜਰ ਆਦਿਤਯ ਕੁਮਾਰ ਦਾ ਨਾਂ ਨਹੀਂ ਹੈ। ਜ਼ਿਕਰਯੋਗ ਹੈ ਕਿ ਇਸ ਘਟਨਾ ਵਿਚ ਤਿੰਨ ਨਾਗਰਿਕ ਮਾਰੇ ਗਏ ਸਨ। ਅਦਾਲਤ ਨੇ ਸੂਬਾ ਸਰਕਾਰ ਦੇ ਇਸ ਬਿਆਨ ਨੂੰ ਰੀਕਾਰਡ 'ਤੇ ਲੈਂਦਿਆਂ ਕਿਹਾ ਕਿ ਇਸ ਮਾਮਲੇ ਵਿਚ 24 ਅਪ੍ਰੈਲ ਤਕ ਕੋਈ ਜਾਂਚ ਨਹੀਂ ਹੋਣੀ ਚਾਹੀਦੀ। ਅਦਾਲਤ ਨੇ ਕਿਹਾ ਕਿ ਇਸ ਮਾਮਲੇ ਨੂੰ 24 ਅਪ੍ਰੈਲ ਨੂੰ ਅੰਤਮ ਨਿਪਟਾਰੇ ਲਈ ਸੂਚੀਬੱਧ ਕੀਤਾ ਜਾਵੇ। ਇਸ ਦੌਰਾਨ ਐਫ਼ਆਈਆਰ ਦੇ ਆਧਾਰ 'ਤੇ ਉਸ ਸਮੇਂ ਤਕ ਕੋਈ ਜਾਂਚ ਨਹੀਂ ਹੋਵੇਗੀ
ਸੁਪਰੀਮ ਕੋਰਟ ਨੇ 12 ਫ਼ਰਵਰੀ ਨੂੰ ਜੰਮੂ-ਕਸ਼ਮੀਰ ਪੁਲਿਸ ਨੂੰ ਮੇਜਰ ਆਦਿਤਯ ਕੁਮਾਰ ਸਮੇਤ ਫ਼ੌਜੀਆਂ ਅਧਿਕਾਰੀਆਂ ਵਿਰੁਧ ਕੋਈ ਵੀ ਸਜ਼ਾ ਵਾਲੀ ਕਾਰਵਾਈ ਕਰਨ ਤੋਂ ਰੋਕ ਦਿਤਾ ਸੀ। ਮੇਜਰ ਆਦਿਤਯ ਬਾਰੇ ਸ਼ੁਰੂ ਵਿਚ ਕਿਹਾ ਗਿਆ ਸੀ ਕਿ ਇਸ ਮਾਮਲੇ ਵਿਚ ਮੁਲਜ਼ਮ ਦੇ ਰੂਪ ਵਿਚ ਉਨ੍ਹਾਂ ਦਾ ਨਾਂਅ ਹੈ। ਸ਼ੋਪੀਆਂ ਜ਼ਿਲ੍ਹੇ ਦੇ ਗੁਨੋਵਪੁਰਾ ਪਿੰਡ ਵਿਚ ਪਥਰਾਅ ਕਰ ਰਹੀ ਭੀੜ 'ਤੇ ਫ਼ੌਜ ਵਲੋਂ ਕੀਤੀ ਗਈ ਫ਼ਾਇਰਿੰਗ 'ਚ ਤਿੰਨ ਸਥਾਨਕ ਲੋਕ ਮਾਰੇ ਗਏ ਸਨ। ਇਸ ਤੋਂ ਬਾਅਦ ਮੁੱਖ ਮੰਤਰੀ ਨੇ ਇਸ ਘਟਨਾ ਦੀ ਜਾਂਚ ਦੇ ਹੁਕਮ ਦਿਤੇ ਸਨ। ਮੇਅਰ ਆਦਿਤਯ ਕੁਮਾਰ ਦੇ ਪਿਤਾ ਕਰਨਲ ਕਰਮਵੀਰ ਸਿੰਘ ਨੇ ਅਪਣੇ ਪੁੱਤਰ ਵਿਰੁਧ ਦਰਜ ਐਫ਼ਆਈਆਰ ਰੱਦ ਕਰਾਉਣ ਲਈ ਸੁਪਰੀਮ ਕੋਰਟ ਵਿਚ ਪਟੀਸ਼ਨ ਦਾਖ਼ਲ ਕੀਤੀ ਹੋਈ ਹੈ। (ਪੀ.ਟੀ.ਆਈ.)
