ਲਖਨਊ, 9 ਜਨਵਰੀ : ਬਾਂਦਾ ਜ਼ਿਲ੍ਹਾ ਜੇਲ ਵਿਚ ਬੰਦ ਬਹੁਜਨ ਸਮਾਜ ਪਾਰਟੀ ਦੇ ਵਿਧਾਇਕ ਮੁਖ਼ਤਾਰ ਅੰਸਾਰੀ ਨੂੰ ਅੱਜ ਦਿਲ ਦਾ ਦੌਰਾ ਪੈ ਗਿਆ ਜਿਸ ਮਗਰੋਂ ਉਸ ਨੂੰ ਤੁਰਤ ਜ਼ਿਲ੍ਹਾ ਹਸਪਤਾਲ ਲਿਜਾਇਆ ਗਿਆ। 55 ਸਾਲਾ ਅੰਸਾਰੀ ਕਈ ਅਪਰਾਧਕ ਮਾਮਲਿਆਂ ਕਾਰਨ ਜੇਲ ਵਿਚ ਬੰਦ ਹੈ। ਬਾਅਦ ਵਿਚ ਉਸ ਨੂੰ ਇਲਾਜ ਲਈ ਲਖਨਊ ਭੇਜ ਦਿਤਾ ਗਿਆ। ਅੰਸਾਰੀ ਦੀ ਹਾਲਤ ਸਥਿਰ ਹੈ। ਵਿਧਾਇਕ ਜਦ ਅਪਣੀ ਪਤਨੀ ਨਾਲ ਜੇਲ ਵਿਚ ਮੁਲਾਕਾਤ ਕਰ ਰਿਹਾ ਸੀ ਤਾਂ ਉਸ ਦੀ ਛਾਤੀ ਵਿਚ ਅਚਾਨਕ ਦਰਦ ਉਠਿਆ। ਫਿਰ ਉਸ 
ਦੀ ਪਤਨੀ ਦੀ ਛਾਤੀ ਵਿਚ ਦਰਦ ਉਠਿਆ। ਦੋਹਾਂ ਨੂੰ ਲਖਨਊ ਦੇ ਹਸਪਤਾਲ ਵਿਚ ਭੇਜ ਦਿਤਾ ਗਿਆ। ਪ੍ਰਮੁੱਖ ਸਕੱਤਰ ਗ੍ਰਹਿ ਅਰਵਿੰਦ ਕੁਮਾਰ ਨੇ ਦਸਿਆ, 'ਮੈਂ ਬਾਂਦਾ ਦੇ ਪੁਲਿਸ ਅਧਿਕਾਰੀ ਨਾਲ ਗੱਲਬਾਤ ਕੀਤੀ ਹੈ। ਉਨ੍ਹਾਂ ਵਿਧਾਇਕ ਨੂੰ ਦਿਲ ਦਾ ਦੌਰਾ ਪੈਣ ਬਾਰੇ ਦਸਿਆ ਹੈ। ਇਸ ਮਾਮਲੇ ਵਿਚ ਰੀਪੋਰਟ ਮੰਗੀ ਗਈ ਹੈ।' ਮੀਡੀਆ ਦੀ ਖ਼ਬਰ ਹੈ ਕਿ ਅੰਸਾਰੀ ਦੀ ਪਤਨੀ ਨੂੰ ਵੀ ਦਿਲ ਦਾ ਦੌਰਾ ਪਿਆ ਹੈ। ਕੁਮਾਰ ਨੇ ਕਿਹਾ ਕਿ ਉਹ ਇਸ ਖ਼ਬਰ ਦੀ ਪੁਸ਼ਟੀ ਹਾਲੇ ਨਹੀਂ ਕਰ ਸਕਦੇ। ਉਨ੍ਹਾਂ ਕਿਹਾ ਕਿ ਇਸ ਬਾਰੇ ਰੀਪੋਰਟ ਆ ਜਾਣ ਮਗਰੋਂ ਹੀ ਕੁੱਝ ਕਿਹਾ ਜਾ ਸਕਦਾ ਹੈ। (ਏਜੰਸੀ)
