ਪੰਜਾਬ ਅੰਦਰ ਸ਼੍ਰੋਮਣੀ ਅਕਾਲੀ ਦਲ ਵੱਲੋਂ ਆਪਣੀ ਹਾਰ ਤੋਂ ਬਾਅਦ ਜਬਰ ਵਿਰੋਧੀ ਰੈਲੀਆ ਕਰਨ ਦਾ ਐਲਾਨ ਮਹਿਜ਼ ਡਰਾਮਾ ਹੈ। ਅਕਾਲੀ ਦਲ (ਬਾਦਲ) ਆਪਣੀ ਗਠਜੋੜ ਪਾਰਟੀ ਭਾਰ..
ਅੰਮ੍ਰਿਤਸਰ, 27 ਜੁਲਾਈ (ਸੁਖਵਿੰਦਰਜੀਤ ਸਿੰਘ ਬਹੋੜੂ) : ਪੰਜਾਬ ਅੰਦਰ ਸ਼੍ਰੋਮਣੀ ਅਕਾਲੀ ਦਲ ਵੱਲੋਂ ਆਪਣੀ ਹਾਰ ਤੋਂ ਬਾਅਦ ਜਬਰ ਵਿਰੋਧੀ ਰੈਲੀਆ ਕਰਨ ਦਾ ਐਲਾਨ ਮਹਿਜ਼ ਡਰਾਮਾ ਹੈ। ਅਕਾਲੀ ਦਲ (ਬਾਦਲ) ਆਪਣੀ ਗਠਜੋੜ ਪਾਰਟੀ ਭਾਰਤੀ ਜਨਤਾ ਪਾਰਟੀ ਦੇ ਕਾਰਕੁਨਾਂ ਵਲੋਂ ਕੀਤੀ ਜਾ ਰਹੀ ਗੁੰਡਾਗਰਦੀ ਖਿਲਾਫ਼ ਅਵਾਜ ਬੁਲੰਦ ਨਹੀ ਕਰਦਾ।
ਇਹ ਪ੍ਰਗਟਾਵਾ ਆਲ ਇੰਡੀਆ ਸਿੱਖ ਸਟੂਡੈਂਟਸ ਫ਼ੈਡਰੇਸ਼ਨ ਦੇ ਪ੍ਰਧਾਨ ਕਰਨੈਲ ਸਿੰਘ ਪੀਰ ਮੁਹੰਮਦ ਨੇ ਕੀਤਾ। ਉਨ੍ਹਾਂ ਕਿਹਾ ਕਿ ਅਕਾਲੀ ਦਲ ਵੱਲੋਂ ਆਪਣੇ ਵਰਕਰਾਂ ਅਤੇ ਪੰਜਾਬ ਵਾਸੀਆ ਦੇ ਹੌਸਲੇ ਬੁਲੰਦ ਕਰਨ ਦੇ ਨਾਮ ਤੇ ਪੰਜਾਬ ਵਿੱਚ ਜਬਰ ਵਿਰੋਧੀ ਰੈਲੀਆ ਦੀ ਸ਼ੁਰੂਆਤ ਕੀਤੀ ਹੈ। ਪਰ ਜੀਰਕਪੁਰ 'ਚ ਭਾਜਪਾ ਦੇ ਕੌਸਲਰ ਦੀ ਅਗਵਾਈ ਵਿੱਚ ਜੋ ਗੁੰਡਾਗਰਦੀ ਦੌਰਾਨ ਕਈ ਸਿੱਖਾਂ ਦੀਆਂ ਦਸਤਾਰਾਂ ਲਾਹ ਕੇ ਕੁੱਟਮਾਰ ਕੀਤੀ ਗਈ, ਉਸ ਬਾਰੇ ਅਜੇ ਤੱਕ ਸ਼੍ਰੋਮਣੀ ਅਕਾਲੀ ਦਲ ਦੇ ਛੋਟੇ ਵੱਡੇ ਆਗੂ ਦਾ ਕੋਈ ਵੀ ਬਿਆਨ ਨਹੀਂ ਆਇਆ।
ਪੀਰ ਮੁਹੰਮਦ ਨੇ ਦੋਸ਼ ਲਾਇਆ ਕਿ ਦਿੱਲੀ ਕਮੇਟੀ ਪ੍ਰਧਾਨ ਮਨਜੀਤ ਸਿੰਘ ਜੀ.ਕੇ ਨੂੰ ਇਟਲੀ ਦੇ ਹਵਾਈ ਅੱਡੇ ਤੇ ਸੁਰੱਖਿਆ ਦੇ ਨਾਮ ਤੇ ਦਸਤਾਰ ਦੀ ਤਲਾਸ਼ੀ ਲੈਣ ਦਾ ਭਾਰੀ ਦੁੱਖ ਲਗਦਾ ਹੈ। ਅਕਾਲੀ ਦਲ ਫਰਾਂਸ ਵਿੱਚ ਦਸਤਾਰ ਦੀ ਪਾਬੰਦੀ ਉੱਪਰ ਸੰਘਰਸ਼ ਲੜਨ ਦੀ ਗੱਲ ਕਰਦਾ ਹੈ ਪਰ ਪੰਜਾਬ ਅੰਦਰ ਹਰ ਦਿਨ ਹੋ ਰਹੀ ਦਸਤਾਰ ਦੀ ਬੇਅਦਬੀ ਬਾਰੇ ਇੱਕ ਸ਼ਬਦ ਵੀ ਨਾ ਬੋਲਣਾ ਦੋਗਲੇਪਣ ਦੀ ਨਿਸ਼ਾਨੀ ਹੈ। ਜਦ ਤੱਕ ਸਿੱਖ ਲੀਡਰਸ਼ਿਪ ਭਾਰਤ ਅੰਦਰ ਆਪਣੇ ਨਾਲ ਹੋ ਰਹੇ ਗੁਲਾਮਾ ਵਾਲੇ ਸਲੂਕ ਦਾ ਅਹਿਸਾਸ ਨਹੀ ਕਰਦੀ ਤਦ ਤੱਕ ਸਿੱਖ ਕੌਮ ਦਾ ਪੰਜਾਬ ਅਤੇ ਦੇਸ਼ ਅੰਦਰ ਇਸੇ ਤਰਾ ਨਿਰਾਦਰ ਹੁੰਦਾ ਰਹੇਗਾ। ਬਾਦਲ ਜਬਰ ਵਿਰੋਧੀ ਰੈਲੀਆਂ ਕਰਨ ਤੋਂ ਪਹਿਲਾਂ ਅਪਣੀ ਭਾਈਵਾਲ ਪਾਰਟੀ ਦੀ ਗੁੰਡਾਗਰਦੀ ਬਾਰੇ ਜਰੂਰ ਸ਼ਪਸੀਕਰਨ ਦੇਣ।