ਆਦਿਤਯਨਾਥ ਨੇ ਦੋਸ਼ ਲਾਇਆ ਕਿ ਕਾਂਗਰਸ, ਆਰ.ਜੇ.ਡੀ. ਅਤੇ ਸਪਾ ਬਿਹਾਰ 'ਚ ਅਪਰਾਧੀਆਂ ਨੂੰ ਗਲੇ ਲਗਾ ਰਹੇ ਹਨ
ਦਰਭੰਗਾ/ਮੁਜ਼ੱਫਰਪੁਰ/ਸਾਰਨ : ਉੱਤਰ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਨੇ ਸੋਮਵਾਰ ਨੂੰ ਦਾਅਵਾ ਕੀਤਾ ਕਿ ਜੇਕਰ ਐਨ.ਡੀ.ਏ. ਬਿਹਾਰ ’ਚ ਸੱਤਾ ’ਚ ਵਾਪਸ ਆਉਂਦੀ ਹੈ ਤਾਂ ਉਹ ਸੂਬੇ ’ਚ ਘੁਸਪੈਠੀਆਂ ਦਾ ਪਿੱਛਾ ਕਰੇਗੀ ਅਤੇ ਉਨ੍ਹਾਂ ਦੀ ਦੌਲਤ ਨੂੰ ਗਰੀਬਾਂ ’ਚ ਵੰਡੇਗੀ।
ਦਰਭੰਗਾ, ਮੁਜ਼ੱਫਰਪੁਰ ਅਤੇ ਸਾਰਨ ਜ਼ਿਲ੍ਹਿਆਂ ਵਿਚ ਲਗਾਤਾਰ ਚੋਣ ਰੈਲੀਆਂ ਨੂੰ ਸੰਬੋਧਨ ਕਰਦਿਆਂ ਉਨ੍ਹਾਂ ਨੇ ਕਾਂਗਰਸ ਨੇਤਾ ਰਾਹੁਲ ਗਾਂਧੀ, ਆਰ.ਜੇ.ਡੀ. ਦੇ ਤੇਜਸਵੀ ਯਾਦਵ ਅਤੇ ਸਮਾਜਵਾਦੀ ਪਾਰਟੀ ਦੇ ਪ੍ਰਧਾਨ ਅਖਿਲੇਸ਼ ਯਾਦਵ ਨੂੰ ‘ਇੰਡੀ ਅਲਾਇੰਸ ਦੇ ਤਿੰਨ ਬਾਂਦਰ’ ਕਰਾਰ ਦਿਤਾ, ਜੋ ਸੱਤਾਧਾਰੀ ਐਨ.ਡੀ.ਏ. ਵਲੋਂ ਕੀਤੇ ਜਾ ਰਹੇ ਸਾਰੇ ਚੰਗੇ ਕੰਮਾਂ ਬਾਰੇ ਬੋਲਣ ਤੋਂ ਅਸਮਰੱਥ ਸਨ, ਸੁਣਨ ਲਈ ਤਿਆਰ ਨਹੀਂ ਸਨ।
ਉਨ੍ਹਾਂ ਕਿਹਾ, ‘‘ਮਹਾਤਮਾ ਗਾਂਧੀ ਦੇ ਤਿੰਨ ਬਾਂਦਰਾਂ ਨੇ ਕੋਈ ਬੁਰਾ ਨਹੀਂ ਵੇਖਿਆ, ਸੁਣਿਆ ਅਤੇ ਨਾ ਹੀ ਬੋਲਿਆ। ਪਰ ਹੁਣ ਸਾਡੇ ਕੋਲ ਇੰਡੀ ਅਲਾਇੰਸ ਦੇ ਤਿੰਨ ਬਾਂਦਰ ਹਨ। ਨਵੇਂ ਬਾਂਦਰ ਪੱਪੂ ਹਨ, ਜੋ ਐਨ.ਡੀ.ਏ. ਵਲੋਂ ਕੀਤੇ ਗਏ ਚੰਗੇ ਕੰਮ ਨੂੰ ਨਹੀਂ ਵੇਖਦੇ, ਟੱਪੂ, ਜੋ ਇਸ ਬਾਰੇ ਨਹੀਂ ਸੁਣ ਸਕਦੇ, ਅਤੇ ਅੱਕੂ, ਜੋ ਬੋਲਦੇ ਸਮੇਂ ਇਨ੍ਹਾਂ ਨੂੰ ਮਨਜ਼ੂਰ ਨਹੀਂ ਕਰੇਗਾ।’’
ਆਦਿਤਯਨਾਥ ਨੇ ਦੋਸ਼ ਲਾਇਆ ਕਿ ਕਾਂਗਰਸ, ਆਰ.ਜੇ.ਡੀ. ਅਤੇ ਸਪਾ ਬਿਹਾਰ ’ਚ ਅਪਰਾਧੀਆਂ ਨੂੰ ਗਲੇ ਲਗਾ ਰਹੇ ਹਨ ਅਤੇ ਘੁਸਪੈਠੀਆਂ ਨੂੰ ਸੂਬੇ ਦੀ ਸੁਰੱਖਿਆ ਨਾਲ ਸਮਝੌਤਾ ਕਰਨ ਦੀ ਇਜਾਜ਼ਤ ਦੇ ਰਹੇ ਹਨ। ਉਨ੍ਹਾਂ ਦਾਅਵਾ ਕੀਤਾ ਕਿ ਜੇਕਰ ਐਨ.ਡੀ.ਏ. ਬਿਹਾਰ ’ਚ ਸੱਤਾ ’ਚ ਵਾਪਸ ਆਉਂਦੀ ਹੈ ਤਾਂ ਉਹ ਸੂਬੇ ’ਚ ਘੁਸਪੈਠੀਆਂ ਨੂੰ ਭਜਾ ਦੇਵੇਗੀ ਅਤੇ ਉਨ੍ਹਾਂ ਦੀ ਦੌਲਤ ਨੂੰ ਗਰੀਬਾਂ ’ਚ ਵੰਡੇਗੀ। ਯੂ.ਪੀ. ਦੇ ਮੁੱਖ ਮੰਤਰੀ ਨੇ ਦੋਸ਼ ਲਾਇਆ ਕਿ ਵਿਰੋਧੀ ਧਿਰ ਜਾਤ ਦੇ ਨਾਂ ਉਤੇ ਲੋਕਾਂ ਨੂੰ ਵੰਡਣ ਅਤੇ ਦੰਗਿਆਂ ਨੂੰ ਕਾਇਮ ਰੱਖਣ ਲਈ ਕੰਮ ਕਰ ਰਹੀ ਹੈ। ਉਨ੍ਹਾਂ ਕਿਹਾ, ‘‘ਆਓ ਅਸੀਂ ਸੰਕਲਪ ਕਰੀਏ ਕਿ ਨਾ ਤਾਂ ਅਸੀਂ ਵੰਡੇ ਜਾਵਾਂਗੇ ਅਤੇ ਨਾ ਹੀ ਇਕ ਦੂਜੇ ਨਾਲ ਲੜਾਂਗੇ।’’
