ਹਾਈ ਕੋਰਟ ਵਲੋਂ ਕੁਲਵੰਤ ਸਿੰਘ ਨਾਮੀ ਇਕ ਤੇਜ਼ਾਬ ਹਮਲੇ ਦੇ ਪੀੜਤ ਦੀ ਸ਼ਿਕਾਇਤ ਉਤੇ ਐਫ਼ਆਈਆਰ ਨਾ ਦਰਜ ਕਰਨ ਦਾ ਸਖ਼ਤ ਨੋਟਿਸ ਲਿਆ ਗਿਆ ਹੈ।
ਚੰਡੀਗੜ੍ਹ, 18 ਅਗੱਸਤ (ਨੀਲ ਭਲਿੰਦਰ ਸਿੰਘ): ਹਾਈ ਕੋਰਟ ਵਲੋਂ ਕੁਲਵੰਤ ਸਿੰਘ ਨਾਮੀ ਇਕ ਤੇਜ਼ਾਬ ਹਮਲੇ ਦੇ ਪੀੜਤ ਦੀ ਸ਼ਿਕਾਇਤ ਉਤੇ ਐਫ਼ਆਈਆਰ ਨਾ ਦਰਜ ਕਰਨ ਦਾ ਸਖ਼ਤ ਨੋਟਿਸ ਲਿਆ ਗਿਆ ਹੈ।
ਜਸਟਿਸ ਰਾਜਨ ਗੁਪਤਾ ਵਾਲੇ ਬੈਂਚ ਨੇ ਇਸ ਬਾਬਤ ਐਸਐਸਪੀ ਸੰਗਰੂਰ ਤੋਂ ਜਵਾਬ ਤਲਬ ਕੀਤਾ ਹੈ ਅਤੇ ਨਾਲ ਹੀ ਇਸ ਮਾਮਲੇ ਵਿਚ ਮੁਆਵਜ਼ੇ ਦੇ ਪਹਿਲਾਂ ਜਾਰੀ ਕੀਤੇ ਅਪਣੇ ਅੰਤਰਮ ਹੁਕਮਾਂ ਦੀ ਪਾਲਣਾ ਨਾ ਕਰਨ 'ਤੇ ਪ੍ਰਿੰਸੀਪਲ ਸਕੱਤਰ ਨਿਆਂ ਮਾਮਲੇ ਵਿਭਾਗ ਪੰਜਾਬ ਨੂੰ ਵੀ ਕਾਰਨ ਦਸੋ ਨੋਟਿਸ ਜਾਰੀ ਕੀਤਾ ਗਿਆ ਹੈ। ਧੂਰੀ ਨੇੜਲੇ ਪਿੰਡ ਕਾਤਰੋਂ ਨਿਵਾਸੀ ਕੁਲਵੰਤ ਸਿੰਘ ਨਾਮੀ ਇਸ ਟਰੱਕ ਡਰਾਈਵਰ ਨੇ ਹਾਈ ਕੋਰਟ 'ਚ ਪਟੀਸ਼ਨ ਦਾਇਰ ਕਰ ਆਖਿਆ ਹੈ ਕਿ 22 ਜੁਲਾਈ 2011 ਨੂੰ ਜਦੋਂ ਉਹ ਮਾਲਕ ਬਲਦੇਵ ਸਿੰਘ ਕੋਲ ਅਪਣੀ ਤਨਖ਼ਾਹ ਮੰਗਣ ਲਈ ਗਿਆ ਤਾਂ ਬਲਦੇਵ ਸਿੰਘ ਨੇ ਅਪਣੇ ਘਰ ਦੇ ਕੋਠੇ 'ਤੇ ਚੜ੍ਹ ਉਸ 'ਤੇ ਤੇਜ਼ਾਬ ਦੀ ਭਰੀ ਬਾਲਟੀ ਸੁੱਟ ਦਿਤੀ। ਉਸ ਨੂੰ ਇਲਾਜ ਲਈ ਰਾਜਿੰਦਰਾ ਹਸਪਤਾਲ ਪਟਿਆਲਾ ਦਾਖ਼ਲ ਕਰਵਾਇਆ ਗਿਆ ਜਿਥੇ ਬਲਦੇਵ ਸਿੰਘ ਕੋਲੋਂ ਉਸ ਨੂੰ ਡੇਢ ਲੱਖ ਰੁਪਏ ਦੀ ਸਹਾਇਤਾ ਦਿਵਾਈ ਗਈ ਜਿਸ ਦੇ ਇਵਜ਼ ਵਿਚ ਉਸ ਕੋਲੋਂ ਇਕ ਸਮਝੌਤੇ 'ਤੇ ਇਹ ਲਿਖਵਾ ਲਿਆ ਗਿਆ ਕਿ ਉਸ ਨੇ ਗ਼ਲਤੀ ਨਾਲ ਅਪਣੀ ਸ਼ਿਕਾਇਤ ਵਿਚ ਬਲਦੇਵ ਸਿੰਘ ਦਾ ਨਾਮ ਲਿਖਵਾ ਦਿਤਾ ਹੈ ਤੇ ਉਹ ਬਲਦੇਵ ਸਿੰਘ ਵਿਰੁਧ ਕੋਈ ਐਫ਼ਆਈਆਰ ਦਰਜ ਨਹੀਂ ਕਰਵਾਉਣਾ ਚਾਹੁੰਦਾ ਹੈ, ਦੇ ਸਿੱਟੇ ਸਬੰਧਤ ਐਸਐਚਓ ਨੇ ਬਲਦੇਵ ਸਿੰਘ 'ਤੇ ਤੇਜ਼ਾਬ ਹਮਲਾ ਐਫ਼ਆਈਆਰ ਦਰਜ ਨਹੀਂ ਕੀਤੀ ਪਰ ਇਸ ਹਮਲੇ ਕਾਰਨ ਕੁਲਵੰਤ ਸਿੰਘ ਦੀ ਦੋਵਾਂ ਅੱਖਾਂ ਦੀ ਰੌਸ਼ਨੀ ਚਲੀ ਗਈ ਜਿਸ ਮਗਰੋਂ ਕੁਲਵੰਤ ਸਿੰਘ ਨੇ ਜ਼ਿਲ੍ਹਾ ਕਨੂਨੀ ਸੇਵਾਵਾਂ ਅਥਾਰਟੀ ਸੰਗਰੂਰ ਕੋਲ ਪੀੜਤ ਸਕੀਮ ਅਧੀਨ ਤਿੰਨ ਲੱਖ ਰੁਪਏ ਮੁਆਵਜ਼ੇ ਦੀ ਮੰਗ ਹਿਤ ਅਰਜ਼ੀ ਦਾਇਰ ਕੀਤੀ ਜੋ ਇਹ ਕਹਿੰਦੇ ਹੋਏ ਖ਼ਾਰਜ਼ ਕਰ ਦਿਤੀ ਗਈ ਕਿ ਉਸ ਨੇ ਪਹਿਲਾਂ ਹੀ ਹਮਲਾਵਰ ਨਾਲ ਸਮਝੌਤਾ ਕਰ ਉਸ ਕੋਲੋਂ ਮੁਆਵਜ਼ਾ ਲੈ ਲਿਆ ਹੈ ਜਿਸ ਵਿਰੁਧ ਉਹ ਹਾਈਕੋਰਟ ਆਇਆ ਤਾਂ ਹਾਈ ਕੋਰਟ ਨੇ ਲੰਘੀ 24 ਮਾਰਚ ਨੂੰ ਉਸ ਨੂੰ 2 ਲੱਖ ਰੁਪਏ ਅੰਤਰਮ ਮੁਆਵਜ਼ਾ ਅਦਾ ਕਰਨ ਦੇ ਨਿਰਦੇਸ਼ ਜਾਰੀ ਕਰ ਦਿਤੇ ਜੋ ਅੱਜ ਤਕ ਵੀ ਅਦਾ ਨਹੀਂ ਕੀਤਾ ਗਿਆ।
ਜਸਟਿਸ ਗੁਪਤਾ ਨੇ ਅੱਜ ਜਿਥੇ ਨਿਆਂ ਮਾਮਲਿਆਂ ਬਾਰੇ ਵਿਭਾਗ ਦੇ ਪ੍ਰਿੰਸੀਪਲ ਸਕੱਤਰ ਕੋਲੋਂ ਜਵਾਬ ਮੰਗਿਆ ਹੈ ਉਥੇ ਹੀ ਪੁਲਿਸ ਵਲੋਂ ਐਫ਼ਆਈਆਰ ਤਕ ਨਾ ਦਰਜ ਕੀਤੀ ਗਈ ਹੋਣ ਦਾ ਸਖ਼ਤ ਨੋਟਿਸ ਲਿਆ ਹੈ। ਬੈਂਚ ਨੇ ਸਰਕਾਰੀ ਵਕੀਲ ਨੂੰ ਮੁਖਾਤਬ ਹੁੰਦੇ ਹੋਏ ਪੁਛਿਆ ਹੈ ਕਿ ਜੇਕਰ ਕਿਸੇ ਮ੍ਰਿਤਕ ਦੇ ਆਸ਼ਰਿਤ ਹਮਲਾਵਰ ਨਾਲ ਸਮਝੌਤੇ ਉਤੇ ਦਸਤਖ਼ਤ ਕਰ ਲੈਣ ਤਾਂ ਕੀ ਤੁਸੀਂ ਹਤਿਆ ਦਾ ਕੇਸ ਦਰਜ ਕਰਨ ਤੋਂ ਇਨਕਾਰੀ ਹੋਵੋਗੇ? ਬੈਂਚ ਨੇ ਇਸ ਬਾਰੇ ਐਸਐਸਪੀ ਸੰਗਰੂਰ ਨੂੰ ਜਵਾਬ ਦੇਣ ਲਈ ਕਿਹਾ ਹੈ। ਹੁਣ ਇਹ ਕੇਸ 15 ਸਤੰਬਰ ਨੂੰ ਸੁਣਿਆ ਜਾਵੇਗਾ।