ਖ਼ਾਲਿਸਤਾਨ ਪੱਖੀ ਪ੍ਰਚਾਰ ਨੂੰ ਲੈ ਕੇ ਬ੍ਰਿਟੇਨ ਵਿਚ ਖ਼ਾਲਸਾ ਟੀਵੀ ਦਾ ਲਾਇਸੈਂਸ ਹੋਇਆ ਮੁਅੱਤਲ

ਲੰਡਨ, 2 ਅਪ੍ਰੈਲ : ਬਰਤਾਨੀਆ ਦੀ ਮੀਡੀਆ ਨਿਗਰਾਨੀ ਸੰਗਠਨ ਨੇ ਦੇਸ਼ ’ਚ ਖ਼ਾਲਸਾ ਟੀਵੀ (ਕੇਟੀਵੀ) ਦਾ ਪ੍ਰਸਾਰਣ ਲਾਇਸੈਂਸ ਮੁਅੱਤਲ ਕਰ ਦਿਤਾ। ਸੰਗਠਨ ਨੇ ਇਕ ਜਾਂਚ ’ਚ ਕੇਟੀਵੀ ਦੇ ਖ਼ਾਲਿਸਤਾਨ ਪੱਖੀ ਪ੍ਰਚਾਰ ’ਚ ਸ਼ਾਮਲ ਹੋਣ ਅਤੇ ਪ੍ਰਸਾਰਣ ਨਿਯਮਾਂ ਦੀ ਉਲੰਘਣਾ ਕਰਨ ਦੀ ਗੱਲ ਸਾਹਮਣੇ ਆਉਣ ਦੇ ਬਾਅਦ ਇਹ ਕਦਮ ਚੁਕਿਆ ਹੈ।
ਆਫ਼ਿਸ ਆਫ਼ ਕਮਿਊਨੀਕੇਸ਼ਨਜ਼ (ਆਫਕਾਮ) ਨੇ 30 ਦਸੰਬਰ 2021 ਨੂੰ ਕੇਟੀਵੀ ’ਤੇ ਪ੍ਰਸਾਰਤ ਹੋਣ ਵਾਲੇ ‘ਪ੍ਰਾਈਮ ਟਾਈਮ’ ਪ੍ਰੋਗਰਾਮ ਨੂੰ ਲੈ ਕੇ ਕੰਪਨੀ ਨੂੰ ਮੁਅੱਤਲੀ ਨੋਟਿਸ ਜਾਰੀ ਕਰਨ ਤੋਂ ਬਾਅਦ ਇਸ ਹਫ਼ਤੇ ਅਪਣੇ ਫ਼ੈਸਲੇ ਦਾ ਐਲਾਨ ਕੀਤਾ। ਇਹ ਨੋਟਿਸ ਅਜਿਹੀ ਸਮੱਗਰੀ ਨੂੰ ਪ੍ਰਸਾਰਤ ਕਰ ਕੇ ਪ੍ਰਸਾਰਣ ਜ਼ਾਬਤੇ ਦੀ ਉਲੰਘਣਾ ਕਰਨ ਲਈ ਜਾਰੀ ਕੀਤਾ ਗਿਆ ਹੈ, ਜਿਸ ਨਾਲ ਅਪਰਾਧ ਜਾਂ ਅਵਿਵਸਥਾ ਨੂੰ ਹੁਲਾਰਾ ਮਿਲ ਸਕਦਾ ਹੈ। ਆਫਕਾਮ ਨੇ ਕਿਹਾ ਕਿ 95 ਮਿੰਟ ਦੇ ਲਾਈਵ ਚਰਚਾ ਪ੍ਰੋਗਰਾਮ ਵਿਚ ਅਜਿਹੀ ਸਮੱਗਰੀ ਸ਼ਾਮਲ ਸੀ ਜਿਸ ਨਾਲ “ਹਿੰਸਾ ਭੜਕਣ’’ ਦੀ ਸੰਭਾਵਨਾ ਸੀ। ਬਰਤਾਨੀਆ ਮੀਡੀਆ ਰੈਗੂਲੇਟਰ ਨੇ ਵੀਰਵਾਰ ਨੂੰ ਇਕ ਬਿਆਨ ਜਾਰੀ ਕਰਦਿਆਂ ਕਿਹਾ, “ਇਸ ਸਮਾਗਮ ਦੇ ਪੇਸ਼ਕਰਤਾ ਨੇ ਪੂਰੇ ਸਮਾਗਮ ਦੌਰਾਨ ਕਈ ਬਿਆਨ ਦਿਤੇ ਜਿਨ੍ਹਾਂ ਵਿਚ ਖ਼ਾਲਿਸਤਾਨੀ ਉਦੇਸ਼ ਨੂੰ ਅੱਗੇ ਵਧਾਉਣ ਲਈ ਇਕ ਜ਼ਰੂਰੀ ਅਤੇ ਸਵੀਕਾਰਯੋਗ ਕਾਰਵਾਈ ਵਜੋਂ ਕਤਲ ਸਮੇਤ ਹਿੰਸਕ ਗਤੀਵਿਧੀਆਂ ਨੂੰ ਦਰਸਾਇਆ ਗਿਆ ਹੈ।’’ ਇਹ ਅਪਰਾਧ ਅਤੇ ਅਵਿਵਸਥਾ ਵਿਰੁਧ ਸਾਡੇ ਪ੍ਰਸਾਰਣ ਨਿਯਮਾਂ ਦੀ ਗੰਭੀਰ ਉਲੰਘਣਾ ਸੀ।
ਬਿਆਨ ਮੁਤਾਬਕ, “ਉਲੰਘਣ ਦੇ ਗੰਭੀਰ ਰੂਪ ਅਤੇ ਮੁਅੱਤਲੀ ਨੋਟਿਸ ਵਿਚ ਦੱਸੇ ਗਏ ਕਾਰਨਾਂ ਦੇ ਮੱਦੇਨਜ਼ਰ, ਅਸੀਂ ਅੱਜ ਤੋਂ ਤੁਰਤ ਪ੍ਰਭਾਵ ਨਾਲ ਬ੍ਰਿਟੇਨ ਵਿਚ ਖ਼ਾਲਸਾ ਟੈਲੀਵਿਜ਼ਨ ਲਿਮਟਿਡ ਦੇ ਪ੍ਰਸਾਰਣ ਲਾਇਸੈਂਸ ਨੂੰ ਮੁਅੱਤਲ ਕਰ ਰਹੇ ਹਾਂ।’’
ਖ਼ਾਲਸਾ ਟੈਲੀਵਿਜ਼ਨ ਲਿਮਟਿਡ ਕੋਲ ਆਫਕਾਮ ਅੱਗੇ ਅਪਣਾ ਪੱਖ ਪੇਸ਼ ਕਰਨ ਲਈ 21 ਦਿਨ ਹਨ। ਇਸ ਪ੍ਰਕਿਰਿਆ ਤੋਂ ਬਾਅਦ ਬਰਤਾਨੀਆ ਮੀਡੀਆ ਰੈਗੂਲੇਟਰ ਫ਼ੈਸਲਾ ਕਰੇਗਾ ਕਿ ਖ਼ਾਲਸਾ ਟੈਲੀਵਿਜ਼ਨ ਲਿਮਟਿਡ ਦਾ ਲਾਇਸੈਂਸ ਰੱਦ ਕਰਨਾ ਹੈ ਜਾਂ ਨਹੀਂ।         (ਏਜੰਸੀ)