ਜੰਮੂ-ਕਸ਼ਮੀਰ 'ਚ ਖ਼ਤਮ ਹੋਈ 149 ਸਾਲ ਪੁਰਾਣੀ ਰਵਾਇਤ, 200 ਕਰੋੜ ਦੀ ਹੋਵੇਗੀ ਬੱਚਤ
'ਦਰਬਾਰ ਮੂਵ' 'ਤੇ ਕਾਮਿਆਂ ਨੂੰ ਦਿਤੀ ਜਾਣ ਵਾਲੀ ਸਹੂਲਤ ਕੀਤੀ ਰੱਦ
ਸ਼੍ਰੀਨਗਰ, 1 ਜੁਲਾਈ : ਜੰਮੂ-ਕਸ਼ਮੀਰ ਦੀ ਜੁੜਵਾ ਰਾਜਧਾਨੀ ਸ਼੍ਰੀਨਗਰ ਅਤੇ ਜੰਮੂ ਦਰਮਿਆਨ ਹਰ 6 ਮਹੀਨੇ ਮਗਰੋ ਹੋਣ ਵਾਲੀ 'ਦਰਬਾਰ ਮੂਵ' ਦੀ 149 ਸਾਲ ਪੁਰਾਣੀ ਰੀਤ ਆਖਰਕਾਰ ਖ਼ਤਮ ਹੋ ਗਈ ਹੈ | ਜੰਮੂ-ਕਸ਼ਮੀਰ ਸਰਕਾਰ ਨੇ ਬੁਧਵਾਰ ਨੂੰ ਕਾਮਿਆਂ ਨੂੰ ਦਿਤੀ ਜਾਣ ਵਾਲੀ ਰਿਹਾਇਸ਼ੀ ਸਹੂਲਤ ਨੂੰ ਰੱਦ ਕਰ ਦਿਤਾ ਹੈ | ਅਫ਼ਸਰਾਂ ਨੂੰ ਅਗਲੇ 3 ਹਫ਼ਤਿਆਂ ਦੇ ਅੰਦਰ ਜਗ੍ਹਾ ਖ਼ਾਲੀ ਕਰਨ ਦੇ ਹੁਕਮ ਦਿਤੇ ਗਏ ਹਨ | ਜਾਰੀ ਹੁਕਮ ਮੁਤਾਬਕ ਅਧਿਕਾਰੀਆਂ ਨੂੰ 21 ਦਿਨਾਂ ਦੇ ਅੰਦਰ ਜੰਮੂ ਅਤੇ ਕਸ਼ਮੀਰ ਵਿਚ ਅਪਣੇ-ਅਪਣੇ ਸਰਕਾਰੀ ਕੁਆਰਟਰ ਖ਼ਾਲੀ ਕਰਨ ਨੂੰ ਕਿਹਾ ਗਿਆ ਹੈ |
ਦੂਜੇ ਪਾਸੇ ਉਪ ਰਾਜਪਾਲ ਮਨੋਜ ਸਿਨਹਾ ਨੇ 20 ਜੂਨ ਨੂੰ ਕਿਹਾ ਸੀ ਕਿ ਪ੍ਰਸ਼ਾਸਨ ਨੇ ਈ-ਆਫ਼ਿਸ ਦਾ ਕੰਮ ਪੂਰਾ ਕਰ ਲਿਆ ਹੈ, ਇਸ ਲਈ ਸਰਕਾਰੀ ਅਫ਼ਸਰਾਂ ਦੇ ਸਾਲ ਵਿਚ ਦੋ ਵਾਰ ਹੋਣ ਵਾਲੇ 'ਦਰਬਾਰ ਮੂਵ' ਦੀ ਰਵਾਇਤ ਨੂੰ ਜਾਰੀ ਰੱਖਣ ਦੀ ਕੋਈ ਲੋੜ ਨਹੀਂ | ਉਨ੍ਹਾਂ ਦਸਿਆ ਕਿ ਹੁਣ ਜੰਮੂ ਅਤੇ ਕਸ਼ਮੀਰ ਦੋਵੇਂ ਸਕੱਤਰੇਤ ਆਮ ਰੂਪ ਨਾਲ 12 ਮਹੀਨੇ ਤਕ ਕੰਮ ਕਰ ਸਕਦੇ ਹਨ | ਇਸ ਨਾਲ ਸਰਕਾਰ ਨੂੰ ਹਰ ਸਾਲ ਕਰੀਬ 200 ਕਰੋੜ ਰੁਪਏ ਦੀ ਬੱਚਤ ਹੋਵੇਗੀ, ਜਿਸ ਦਾ ਇਸਤੇਮਾਲ ਪਛੜੇ ਵਰਗ ਦੇ ਕਲਿਆਣ ਲਈ ਕੀਤਾ ਜਾਵੇਗਾ | ਇਸ ਫ਼ੈਸਲੇ ਤੋਂ ਬਾਅਦ ਸਰਕਾਰੀ ਦਫ਼ਤਰ ਹੁਣ ਜੰਮੂ ਅਤੇ ਸ਼੍ਰੀਨਗਰ ਦੋਹਾਂ ਥਾਵਾਂ 'ਤੇ ਆਮ ਵਾਂਗ ਕੰਮ ਕਰਨਗੇ | ਰਾਜ ਭਵਨ, ਸਿਵਲ ਸਕੱਤਰੇਤ, ਸਾਰੇ ਮੱੁਖ ਵਿਭਾਗਾਂ ਦੇ ਦਫ਼ਤਰ ਪਹਿਲਾਂ 'ਦਰਬਾਰ ਮੂਵ' ਤਹਿਤ ਜੰਮੂ ਅਤੇ ਸ਼੍ਰੀਨਗਰ ਵਿਚਾਲੇ ਸਰਦੀ ਅਤੇ ਗਰਮੀ ਵਿਚ ਟਰਾਂਸਫ਼ਰ ਹੁੰਦੇ ਰਹਿੰਦੇ ਸਨ |
'ਦਰਬਾਰ ਮੂਵ' ਦੀ ਰਵਾਇਤ 1872 ਤੋਂ ਜੰਮੂ-ਕਸ਼ਮੀਰ ਦਾ ਇਕ ਹਿੱਸਾ ਰਹੀ ਹੈ, ਜਦੋਂ ਇਸ ਨੂੰ ਮਹਾਰਾਜਾ ਗੁਲਾਬ ਸਿੰਘ ਵਲੋਂ ਸ਼ੁਰੂ ਕੀਤਾ ਗਿਆ ਸੀ | ਗੁਲਾਬ ਸਿੰਘ ਮਹਾਰਾਜਾ ਹਰੀ ਸਿੰਘ ਦੇ ਪੂਰਵਜ ਸਨ, ਜਿਨ੍ਹਾਂ ਦੇ ਸਮੇਂ ਹੀ ਜੰਮੂ-ਕਸ਼ਮੀਰ ਭਾਰਤ ਦਾ ਅੰਗ ਬਣਿਆ ਸੀ | ਦਰਅਸਲ ਮੌਸਮ ਬਦਲਣ ਨਾਲ ਹਰ 6 ਮਹੀਨੇ ਵਿਚ ਜੰਮੂ-ਕਸ਼ਮੀਰ ਦੀ ਰਾਜਧਾਨੀ ਵੀ ਬਦਲ ਜਾਂਦੀ ਹੈ | ਰਾਜਧਾਨੀ ਸ਼ਿਫਟ ਹੋਣ ਦੀ ਇਸ ਪ੍ਰਕਿਰਿਆ ਨੂੰ 'ਦਰਬਾਰ ਮੂਵ' ਦੇ ਨਾਂ ਤੋਂ ਜਾਣਿਆ ਜਾਂਦਾ ਹੈ | 6 ਮਹੀਨੇ ਰਾਜਧਾਨੀ ਸ਼੍ਰੀਨਗਰ ਵਿਚ ਰਹਿੰਦੀ ਹੈ ਅਤੇ 6 ਮਹੀਨੇ ਜੰਮੂ ਵਿਚ | (ਏਜੰਸੀ)
