ਕਿਸਾਨ ਅੰਦੋਲਨ : ਨਿਹੰਗਾਂ ਤੇ ਸੀਆਰਪੀਐਫ਼ ਜਵਾਨਾਂ ਵਿਚਕਾਰ ਮੁਠਭੇੜ, ਇਕ ਜਵਾਨ ਜ਼ਖ਼ਮੀ

ਸੋਨੀਪਤ, 1 ਅਗੱਸਤ : ਖੇਤੀ ਕਾਨੂੰਨਾਂ ਦੇ ਵਿਰੋਧ ਵਿਚ ਚੱਲ ਰਹੇ ਅੰਦੋਲਨ ਵਿਚ ਸ਼ਾਮਲ ਨਿਹੰਗਾਂ ਨੇ ਸੀਆਰਪੀਐਫ਼ ਦੇ ਜਵਾਨਾਂ ਉੱਤੇ ਹਮਲਾ ਕੀਤਾ। ਇਕ ਜਵਾਨ ਦੇ ਸਿਰ ਅਤੇ ਪਿੱਠ ’ਤੇ ਤਲਵਾਰ ਨਾਲ ਹਮਲਾ ਕਰ ਕੇ ਜ਼ਖ਼ਮੀ ਕਰ ਦਿਤਾ। ਡਿਊਟੀ ਤੋਂ ਵਾਪਸ ਆ ਰਹੇ ਜਵਾਨਾਂ ਨੇ ਨਿਹੰਗਾਂ ਨੂੰ ਸੜਕ ’ਤੇ ਖੜ੍ਹੀ ਅਪਣੀ ਕਾਰ ਨੂੰ ਥੋੜ੍ਹੀ ਸਾਈਡ ਵੱਲ ਮੋੜਨ ਲਈ ਕਿਹਾ ਸੀ। ਸੀਆਰਪੀਐਫ਼ ਦੇ ਜਵਾਨ ’ਤੇ ਹਮਲਾ ਕਰਨ ਤੋਂ ਬਾਅਦ ਨਿਹੰਗ ਉੱਥੋਂ ਭੱਜ ਗਿਆ। ਹਮਲੇ ਦੀ ਸੂਚਨਾ ਮਿਲਣ ਤੋਂ ਬਾਅਦ ਕੁੰਡਲੀ ਥਾਣੇ ਦੀ ਪੁਲਿਸ ਮੌਕੇ ’ਤੇ ਪਹੁੰਚੀ। ਸੀਆਰਪੀਐਫ਼ ਦੇ ਏਐਸਆਈ ਨੇ ਨਿਹੰਗਾਂ ਦੇ ਹਮਲੇ ਬਾਰੇ ਪੁਲਿਸ ਨੂੰ ਸ਼ਿਕਾਇਤ ਦਿਤੀ ਹੈ। ਪੁਲਿਸ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿਤੀ ਹੈ।
ਖੇਤੀ ਕਾਨੂੰਨਾਂ ਦੇ ਵਿਰੁਧ ਕੁੰਡਲੀ ਸਰਹੱਦ ’ਤੇ ਅੰਦੋਲਨ ਚੱਲ ਰਿਹਾ ਹੈ। ਇਸ ਵਿਚ ਵੱਡੀ ਗਿਣਤੀ ਵਿਚ ਨਿਹੰਗ ਵੀ ਸ਼ਾਮਲ ਹਨ। ਪੁਲਿਸ ਦੇ ਨਾਲ -ਨਾਲ ਸੀਆਰਪੀਐਫ਼ ਨੂੰ ਵੀ ਸੁਰੱਖਿਆ ਦੇ ਲਈ ਉੱਥੇ ਤਾਇਨਾਤ ਕੀਤਾ ਗਿਆ ਹੈ। ਸਨਿਚਰਵਾਰ ਰਾਤ ਕਰੀਬ ਦੋ ਵਜੇ ਸੀਆਰਪੀਐਫ਼ ਦੇ ਪੰਜ-ਛੇ ਜਵਾਨ ਅਪਣੀ ਡਿਊਟੀ ਪੂਰੀ ਕਰਨ ਤੋਂ ਬਾਅਦ ਸਰਕਾਰੀ ਵਾਹਨ ਵਿਚ ਕੈਂਪ ਵੱਲ ਜਾ ਰਹੇ ਸਨ।
ਸੀਆਰਪੀਐਫ਼ ਦੇ ਏਐਸਆਈ ਸੰਭੂ ਸਿੰਘ ਨੇ ਪੁਲਿਸ ਨੂੰ ਦਸਿਆ ਕਿ ਜਦੋਂ ਉਸਦੀ ਗੱਡੀ ਰਸੋਈ ਢਾਬੇ ਦੇ ਕੋਲ ਮੋੜ ’ਤੇ ਪਹੁੰਚੀ ਤਾਂ ਉੱਥੇ ਜਾਮ ਸੀ। ਉਸਨੇ ਅਪਣੇ ਸਾਥੀ ਸਿਪਾਹੀਆਂ ਨੂੰ ਹੇਠਾਂ ਉਤਰ ਕੇ ਵੇਖਣ ਲਈ ਕਿਹਾ। ਜਵਾਨਾਂ ਨੇ ਦੇਖਿਆ ਕਿ ਅੰਦੋਲਨ ਵਿਚ ਸ਼ਾਮਲ ਨਿਹੰਗਾਂ ਦੀ ਇਕ ਕਾਰ ਗ਼ਲਤ ਤਰੀਕੇ ਨਾਲ ਸੜਕ ਤੇ ਖੜੀ ਕੀਤੀ ਗਈ ਸੀ। ਉਸ ਨੂੰ ਵਾਹਨਾਂ ਰਾਹੀਂ ਲੰਘਣ ਵਿਚ ਮੁਸ਼ਕਲ ਆ ਰਹੀ ਸੀ। ਇਸ ਕਾਰਨ ਮੋੜ ’ਤੇ ਲੰਮਾ ਜਾਮ ਲੱਗ ਗਿਆ।
ਇਸ ’ਤੇ ਸਿਪਾਹੀਆਂ ਨੇ ਨਿਹੰਗਾਂ ਨੂੰ ਕਾਰ ਨੂੰ ਸੜਕ ਤੋਂ ਹਟਾ ਕੇ ਸਾਈਡ ’ਤੇ ਰੱਖਣ ਲਈ ਕਿਹਾ। ਇਸ ਨਾਲ ਉਥੇ ਮੌਜੂਦ ਸੱਤ-ਅੱਠ ਨਿਹੰਗਾਂ ਨੂੰ ਗੁੱਸਾ ਆਇਆ। ਉਸ ਨੇ ਸਿਪਾਹੀਆਂ ਨੂੰ ਗਾਲ੍ਹਾਂ ਕੱਢਣੀਆਂ ਸ਼ੁਰੂ ਕਰ ਦਿਤੀਆਂ। ਉਨ੍ਹਾਂ ਨੂੰ ਸਮਝਾਉਣ ਦੀ ਕੋਸ਼ਿਸ ਕੀਤੀ ਗਈ। ਇਸ ’ਤੇ ਇਕ ਨਿਹੰਗ ਨੇ ਜਵਾਨ ’ਤੇ ਤਲਵਾਰ ਨਾਲ ਹਮਲਾ ਕਰ ਦਿਤਾ। ਤਲਵਾਰ ਦਾ ਪਹਿਲਾ ਹਮਲਾ ਜਵਾਨ ਦੀ ਪਿੱਠ ’ਤੇ ਕੀਤਾ ਗਿਆ ਸੀ। ਦੂਜਾ ਹਮਲਾ ਉਸ ਦੇ ਸਿਰ ’ਤੇ ਲੱਗਾ। ਜਵਾਨ ਤਲਵਾਰ ਨਾਲ ਜ਼ਖ਼ਮੀ ਹੋ ਗਿਆ, ਜਦੋਂ ਕਿ ਨਿਹੰਗ ਉੱਥੋਂ ਫ਼ਰਾਰ ਹੋ ਗਿਆ। ਜ਼ਖ਼ਮੀ ਜਵਾਨ ਨੂੰ ਇਲਾਜ ਲਈ ਕੰਪਨੀ ਹਸਪਤਾਲ ਲਿਜਾਇਆ ਗਿਆ। ਘਟਨਾ ਦੀ ਜਾਣਕਾਰੀ ਪੁਲਿਸ ਨੂੰ ਦਿਤੀ ਗਈ।
ਕੁੰਡਲੀ ਥਾਣੇ ਦੇ ਐਸਐਚਓ ਰਵੀ ਕੁਮਾਰ ਨੇ ਦਸਿਆ ਕਿ ਸੀਆਰਪੀਐਫ਼ ਦੇ ਜਵਾਨਾਂ ਅਤੇ ਨਿਹੰਗਾਂ ਵਿਚਕਾਰ ਝਗੜਾ ਹੋਇਆ ਹੈ। ਇਕ ਜਵਾਨ ਨੂੰ ਸੱਟਾਂ ਲੱਗੀਆਂ ਹਨ। ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਹਮਲਾ ਕਰਨ ਵਾਲੇ ਨਿਹੰਗਾਂ ਦੀ ਪਛਾਣ ਕਰਨ ਦੇ ਯਤਨ ਜਾਰੀ ਹਨ। ਰਿਪੋਰਟ ਦਰਜ ਕਰ ਕੇ ਦੋਸ਼ੀ ਨਿਹੰਗਾਂ ਵਿਰੁਧ ਬਣਦੀ ਕਾਰਵਾਈ ਕੀਤੀ ਜਾਵੇਗੀ।  (ਏਜੰਸੀ)