ਵਿਦਿਆਰਥਣ ਸਤਵਿੰਦਰ ਕੌਰ ਗੁਰੂ ਨਾਨਕ ਦੇਵ ਇੰਜਨੀਅਰਿੰਗ ਕਾਲਜ ਵਿੱਚ ਸਿਵਲ ਇੰਜਨੀਅਰਿੰਗ ਵਿੱਚ ਬੀ.ਟੈਕ ਕਰ ਰਹੀ ਸੀ
ਲੁਧਿਆਣਾ : ਉੱਤਰੀ ਰੇਲਵੇ ਦੇ ਫਿਰੋਜ਼ਪੁਰ ਡਵੀਜ਼ਨ ਦੇ ਲੁਧਿਆਣਾ ਸਟੇਸ਼ਨ 'ਤੇ ਰੇਲਗੱਡੀ ਹੇਠਾਂ ਆਉਣ ਨਾਲ ਇਕ ਇੰਜੀਨੀਅਰਿੰਗ ਵਿਦਿਆਰਥਣ ਦੀ ਦਰਦਨਾਕ ਮੌਤ ਹੋ ਗਈ। ਮ੍ਰਿਤਕ ਵਿਦਿਆਰਥਣ ਦੀ ਪਛਾਣ 21 ਸਾਲਾ ਸਤਵਿੰਦਰ ਕੌਰ ਵਜੋਂ ਹੋਈ ਹੈ। ਲੁਧਿਆਣਾ ਰੇਲਵੇ ਸਟੇਸ਼ਨ 'ਤੇ ਵਿਦਿਆਰਥਣ ਚੱਲਦੀ ਟਰੇਨ 'ਚ ਚੜ੍ਹਨ ਲੱਗੀ, ਜਿਸ ਕਾਰਨ ਉਸ ਦਾ ਪੈਰ ਤਿਲਕ ਗਿਆ ਅਤੇ ਉਹ ਟਰੇਨ ਦੇ ਥੱਲੇ ਆ ਗਈ ਤੇ ਉਸ ਦੇ ਸ਼ਰੀਰ ਦੇ ਦੋ ਟੁੱਕੜੇ ਹੋ ਗਏ।
ਮ੍ਰਿਤਕ ਸਤਵਿੰਦਰ ਪਠਾਨਕੋਟ ਜਾ ਰਿਹਾ ਸੀ ਅਤੇ ਪਲੇਟਫਾਰਮ ਨੰਬਰ 2 ਤੋਂ ਰਵਾਨਾ ਹੋਈ ਸਵਰਾਜ ਐਕਸਪ੍ਰੈਸ ਦੀ ਟਿਕਟ ਖਰੀਦੀ ਸੀ। ਪਲੇਟਫਾਰਮ ਤੋਂ ਬਾਹਰ ਜਾਣ ਵਾਲੀ ਟਰੇਨ 'ਚ ਚੜ੍ਹਨ ਦੀ ਕੋਸ਼ਿਸ਼ 'ਚ ਅਸਫਲ ਰਹਿਣ ਕਾਰਨ ਉਹ ਟਰੇਨ ਦੇ ਹੇਠਾਂ ਪਟੜੀ 'ਤੇ ਡਿੱਗ ਗਈ। ਰੇਲਗੱਡੀ ਦੇ ਪਹੀਆਂ ਨੇ ਉਸ ਦੇ ਸਰੀਰ ਦੇ ਦੋ ਟੁਕੜੇ ਕਰ ਦਿੱਤੇ, ਜਿਸ ਨਾਲ ਉਸ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ।
ਤੁਹਾਨੂੰ ਦੱਸ ਦੇਈਏ ਕਿ ਕੁਝ ਦੇਰ ਬਾਅਦ ਇੱਕ ਹੋਰ ਟਰੇਨ ਆਈ, ਉਸ ਟਰੇਨ ਵਿੱਚ ਵੀ ਯਾਤਰੀਆਂ ਨੂੰ ਚੱਲਦੀ ਟਰੇਨ ਵਿੱਚ ਚੜ੍ਹਨ ਲਈ ਭਗਦੜ ਮਚਾਉਂਦੇ ਹੋਏ ਦੇਖਿਆ ਗਿਆ, ਉਸ ਸਮੇਂ ਕੋਈ ਵੀ ਆਰਪੀਐਫ ਕਰਮਚਾਰੀ ਉਨ੍ਹਾਂ ਨੂੰ ਰੋਕਣ ਲਈ ਨਜ਼ਰ ਨਹੀਂ ਆਇਆ। ਸੁਰੱਖਿਆ ਬਲਾਂ ਦੀ ਵੱਡੀ ਲਾਪਰਵਾਹੀ ਹੈ ਕਿ ਉਹ ਟ੍ਰੈਕ ਪਾਰ ਕਰਨ ਵਾਲੇ ਅਤੇ ਚੱਲਦੀ ਟਰੇਨ 'ਚ ਸਵਾਰ ਹੋਣ ਵਾਲੇ ਲੋਕਾਂ 'ਤੇ ਕਾਰਵਾਈ ਨਹੀਂ ਕਰ ਰਹੇ ਹਨ।
ਵਿਦਿਆਰਥਣ ਸਤਵਿੰਦਰ ਕੌਰ ਗੁਰੂ ਨਾਨਕ ਦੇਵ ਇੰਜਨੀਅਰਿੰਗ ਕਾਲਜ ਵਿੱਚ ਸਿਵਲ ਇੰਜਨੀਅਰਿੰਗ ਵਿੱਚ ਬੀ.ਟੈਕ ਕਰ ਰਹੀ ਸੀ। ਉਹ ਪਠਾਨਕੋਟ ਦੀ ਟੀਚਰਜ਼ ਕਲੋਨੀ ਵਿੱਚ ਰਹਿਣ ਵਾਲੀ ਆਪਣੀ ਦਾਦੀ ਨੂੰ ਮਿਲਣ ਲਈ ਜਾ ਰਹੀ ਸੀ। ਉਸ ਦੇ ਪਿਤਾ ਨੂੰ ਅਧਰੰਗ ਦਾ ਦੌਰਾ ਪਿਆ ਸੀ ਅਤੇ ਉਸ ਦੀ ਮਾਂ ਕਿਰਾਏ ਦੇ ਮਕਾਨ ਵਿੱਚ ਰਹਿੰਦੀ ਹੈ। ਵਿਦਿਆਰਥਣ ਸਤਵਿੰਦਰ ਪੜ੍ਹਾਈ ਦੇ ਨਾਲ-ਨਾਲ ਨੌਕਰੀ ਵੀ ਕਰਦੀ ਸੀ। ਜਾਂਚ ਅਧਿਕਾਰੀ ਕਸ਼ਮੀਰ ਸਿੰਘ ਨੇ ਦੱਸਿਆ ਕਿ ਲਾਸ਼ ਦੀ ਪਛਾਣ ਕਰ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।
