1980 ਸਮਰੱਥਾ ਵਾਲੇ ਤਲਵੰਡੀ ਸਾਬੋ ਪਲਾਂਟ ਦੇ ਦੋ ਯੂਨਿਟ 30 ਜੂਨ ਨੂੰ ਤਕਨੀਕੀ ਨੁਕਸ ਕਰਕੇ ਬੰਦ ਹੋ ਗਏ ਸਨ

ਚੰਡੀਗੜ੍ਹ -  ਪੰਜਾਬ 'ਚ ਬਿਜਲੀ ਦੀ ਪੂਰਤੀ ਕਰਨਾ ਪੀਐੱਸਪੀਸੀਐੱਲ ਲਈ ਚੁਣੌਤੀ ਬਣਦੀ ਜਾ ਰਹੀ ਹੈ ਕਿਉਂਕਿ ਕਿਹਾ ਜਾ ਰਿਹਾ ਹੈ ਕਿ ਲੋੜ ਪੈਣ ’ਤੇ ਪੰਜਾਬ ਵਿਚਲੇ ਥਰਮਲਾਂ ਤੋਂ ਸਮਰੱਥਾ ਅਨੁਸਾਰ ਬਿਜਲੀ ਨਹੀਂ ਮਿਲੀ ਹੈ। ਸੋਮਵਾਰ ਨੂੰ ਦੋ ਨਿੱਜੀ ਪਲਾਂਟ ਬੰਦ ਹੋ ਗਏ ਜਿਸ ਦੇ ਨਾਲ ਤਲਵੰਡੀ ਸਾਬੋ ਤੇ ਜੀਵੀਕੇ ਪਲਾਂਟ ਦੇ ਕੁਲ ਪੰਜ ਯੂਨਿਟਾਂ ਦਾ ਬਿਜਲੀ ਉਤਪਾਦਨ ਪੂਰੀ ਤਰ੍ਹਾਂ ਬੰਦ ਹੋ ਗਿਆ।

ਇਸ ਨਾਲ ਬਿਜਲੀ ਉਤਪਾਦਨ 'ਚ 1980 ਮੈਗਾਵਾਟ ਦੀ ਕਮੀ ਆਈ ਹੈ, ਜਦਕਿ ਗੋਇੰਦਵਾਲ ਸਾਹਿਬ ਪਲਾਂਟ 'ਚੋਂ ਇਕ ਯੂਨਿਟ ਬੰਦ ਹੋਣ ਕਰ ਕੇ 270 ਮੈਗਾਵਾਟ ਬਿਜਲੀ ਉਤਪਾਦਨ ਪ੍ਰਭਾਵਿਤ ਹੈ ਤੇ ਦੇਰ ਸ਼ਾਮ ਦੂਜਾ ਯੂਨਿਟ ਵੀ ਦੇਰ ਸ਼ਾਮ ਠੱਪ ਹੋਣ ਨਾਲ 270 ਮੈਗਾਵਾਟ ਬਿਜਲੀ ਹੋਰ ਪ੍ਰਭਾਵਿਤ ਹੋਈ। ਇਸ ਤੋਂ ਇਲਾਵਾ ਲਹਿਰਾ ਮੁਹੱਬਤ ਪਲਾਂਟ ਦਾ 420 ਮੈਗਾਵਾਟ ਸਮਰੱਥਾ ਵਾਲਾ ਯੂਨਿਟ ਵੀ ਬੰਦ ਹੈ। 

1980 ਸਮਰੱਥਾ ਵਾਲੇ ਤਲਵੰਡੀ ਸਾਬੋ ਪਲਾਂਟ ਦੇ ਦੋ ਯੂਨਿਟ 30 ਜੂਨ ਨੂੰ ਤਕਨੀਕੀ ਨੁਕਸ ਕਰਕੇ ਬੰਦ ਹੋ ਗਏ ਸਨ ਤੇ ਸੋਮਵਾਰ ਤਿੰਨ ਜੁਲਾਈ ਨੂੰ ਤੀਜਾ ਯੂਨਿਟ ਵੀ ਬੰਦ ਹੋ ਗਿਆ ਹੈ। ਇਸ ਸਮੇਂ ਪੰਜਾਬ ਦੇ ਆਪਣੇ ਥਰਮਲਾਂ ਤੋਂ ਕੁੱਲ 2940 ਮੈਗਵਾਟ ਬਿਜਲੀ ਉਤਪਾਦਨ ਬੰਦ ਹੈ। ਬਿਜਲੀ ਦੀ ਮੰਗ ਪੂਰੀ ਕਰਨ ਲਈ ਪੀਐੱਸਪੀਸੀਐੱਲ ਨੂੰ 9900  ਮੈਗਾਵਾਟ ਤੋਂ ਵੱਧ ਬਿਜਲੀ ਕੇਂਦਰੀ ਪੂਲ ਤੋਂ ਲੈਣੀ ਪਈ ਹੈ।