ਬਰਾਤ ਲੈ ਕੇ ਜਾ ਰਹੇ ਲਾੜੇ ਦੀ ਕਾਰ ਨੂੰ ਟਰੱਕ ਨੇ ਮਾਰੀ ਟੱਕਰ, 4 ਮੌਤਾਂ

ਆਗਰਾ, 3 ਦਸੰਬਰ : ਉਤਰ ਪ੍ਰਦੇਸ਼ ਦੇ ਫਤਿਹਪੁਰ ਸੀਕਰੀ ਥਾਣੇ ਅਧੀਨ ਪੈਂਦੇ ਕੌਰਈ ਟੋਲ ਪਲਾਜ਼ਾ ਨੇੜੇ ਜੈਪੁਰ ਹਾਈਵੇਅ 'ਤੇ ਸਨਿਚਰਵਾਰ ਸਵੇਰੇ ਇਕ ਭਿਆਨਕ ਹਾਦਸਾ ਵਾਪਰ ਗਿਆ | ਇਸ ਹਾਦਸੇ 'ਚ 4 ਲੋਕਾਂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ ਅਤੇ 9 ਹੋਰ ਜ਼ਖ਼ਮੀ ਹੋ ਗਏ | ਪੀੜਤ ਰਾਜਸਥਾਨ ਦੇ ਰਾਜਸਮੰਦ ਤੋਂ ਪਟਨਾ 'ਚ ਇਕ ਵਿਆਹ ਸਮਾਗਮ 'ਚ ਸ਼ਾਮਲ ਹੋਣ ਲਈ ਜਾ ਰਹੇ ਸਨ | ਰਾਜਸਥਾਨ ਦੇ ਰਾਜਸਮੰਦ ਜ਼ਿਲ੍ਹੇ ਦੇ ਪਿੰਡ ਸਾਰੌਢ ਦੇ ਰਹਿਣ ਵਾਲੇ ਨੈਨਾਰਾਮ ਦਾ ਵਿਆਹ ਬਿਹਾਰ ਦੇ ਪਟਨਾ 'ਚ ਸੀ | ਨੈਨਾਰਾਮ ਦੇ ਪ੍ਰਵਾਰਕ ਮੈਂਬਰ ਵਿਆਹ 'ਚ ਸ਼ਾਮਲ ਹੋਣ ਲਈ ਕਾਰ ਰਾਹੀਂ ਬਿਹਾਰ ਜਾ ਰਹੇ ਸਨ | ਗੱਡੀ 'ਚ ਪ੍ਰਵਾਰ ਦੇ 11 ਮੈਂਬਰ ਅਤੇ 2 ਡਰਾਈਵਰ ਸਵਾਰ ਸਨ | ਅੱਜ ਸਵੇਰੇ ਕਰੀਬ 6 ਵਜੇ ਗੱਡੀ ਜਿਵੇਂ ਹੀ ਆਗਰਾ ਦੇ ਫਤਿਹਪੁਰ ਸੀਕਰੀ ਸਥਿਤ ਕੌਰਾਈ ਟੋਲ ਪਲਾਜ਼ਾ ਨੇੜੇ ਪਹੁੰਚੀ | ਉਦੋਂ ਹਾਈਵੇਅ 'ਤੇ ਅਚਾਨਕ ਓਵਰਟੇਕ ਕਰਨ ਦੀ ਕੋਸ਼ਿਸ਼ 'ਚ ਟਰੱਕ ਨੇ ਕਾਰ ਨੂੰ  ਟੱਕਰ ਮਾਰ ਦਿਤੀ | ਕਾਰ ਬੇਕਾਬੂ ਹੋ ਕੇ ਦੂਜੇ ਟਰੱਕ ਨਾਲ ਜਾ ਟਕਰਾਈ | ਜ਼ਖ਼ਮੀ ਕਾਰ 'ਚ ਬੁਰੀ ਤਰ੍ਹਾਂ ਫਸ ਸਨ |
  ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਥੋੜ੍ਹੀ ਦੇਰ 'ਚ ਪੁਲਿਸ ਵੀ ਮੌਕੇ 'ਤੇ ਪਹੁੰਚ ਗਈ ਅਤੇ ਬਹੁਤ ਮੁਸ਼ਕਲ ਨਾਲ ਗੱਡੀ 'ਚ ਫਸੇ ਲੋਕਾਂ ਨੂੰ  ਬਾਹਰ ਕਢਿਆ ਗਿਆ | ਜ਼ਖ਼ਮੀਆਂ ਨੂੰ  ਪੁਲਿਸ ਨੇ ਐਸ.ਐਨ. ਮੈਡੀਕਲ ਕਾਲਜ ਭੇਜਿਆ | ਹਾਦਸੇ 'ਚ ਲਾੜੇ ਦੇ ਪ੍ਰਵਾਰ ਵਾਲੇ ਪੈਮਾਰਾਮ, ਹੇਮ ਰਾਮ, ਤਾਰਾ ਦੇਵੀ ਅਤੇ ਡਰਾਈਵਰ ਪ੍ਰਵੀਨ ਨੇ ਮੌਕੇ 'ਤੇ ਦਮ ਤੋੜ ਦਿਤਾ | ਲਾੜਾ ਨੈਨਾਰਾਮ ਦੀ ਹਾਲਤ ਗੰਭੀਰ ਹੈ | ਇਸ ਦੇ ਨਾਲ ਹੀ ਕਮਲੇਸ਼, ਲੋਕੇਸ਼, ਜਗਦੀਸ਼, ਨਰੇਂਦਰ, ਲਕਸ਼ਮਣ ਅਤੇ ਪ੍ਰਕਾਸ਼ ਦਾ ਇਲਾਜ ਚੱਲ ਰਿਹਾ ਹੈ | ਲਾੜੇ ਦੇ ਜੀਜਾ ਚੰਦਰ ਪ੍ਰਕਾਸ਼ ਨੇ ਦਸਿਆ ਕਿ ਉਹ ਲੋਕ ਸ਼ੁਕਰਵਾਰ ਰਾਤ ਘਰੋਂ ਨਿਕਲੇ ਸਨ ਅਤੇ ਸਨਿਚਰਵਾਰ ਨੂੰ  ਪਟਨਾ ਪਹੁੰਚਣਾ ਸੀ |    (ਏਜੰਸੀ)