ਰਿਹਾਇਸ਼ ਅਤੇ ਜ਼ਿੰਦਗੀ ਜੀਉਣ ਲਈ, ਦੁਨੀਆਂ 'ਚ ਨੰਬਰ ਇਕ ਦੀ ਪੁਜ਼ੀਸ਼ਨ ਰੱਖਣ ਵਾਲੇ ਪਛਮੀ ਮੁਲਕ ਕੈਨੇਡਾ ਦੇ ਉਂਟਾਰੀਓ ਸੂਬੇ ਤੋਂ ਆਏ ਪੰਜਾਬੀ ਵਿਧਾਇਕ ਦੀਪਕ ਅਨੰਦ.......
ਚੰਡੀਗੜ੍ਹ : ਰਿਹਾਇਸ਼ ਅਤੇ ਜ਼ਿੰਦਗੀ ਜੀਉਣ ਲਈ, ਦੁਨੀਆਂ 'ਚ ਨੰਬਰ ਇਕ ਦੀ ਪੁਜ਼ੀਸ਼ਨ ਰੱਖਣ ਵਾਲੇ ਪਛਮੀ ਮੁਲਕ ਕੈਨੇਡਾ ਦੇ ਉਂਟਾਰੀਓ ਸੂਬੇ ਤੋਂ ਆਏ ਪੰਜਾਬੀ ਵਿਧਾਇਕ ਦੀਪਕ ਅਨੰਦ ਦਾ ਮੰਨਣਾ ਹੈ ਕਿ ਉਥੇ ਵਸੇ ਥੋੜ੍ਹੇ ਜਿਹੇ ਵੱਖ-ਵਾਦੀ ਸੋਚ ਦੇ ਖ਼ਾਲਿਸਤਾਨੀਆਂ ਨੂੰ ਭਾਰਤ ਵਿਰੁਧ ਪ੍ਰਚਾਰ ਕਰਨ ਦੀ ਸ਼ਹਿ, ਕੈਨੇਡਾ ਸਰਕਾਰ ਬਿਲਕੁਲ ਨਹੀਂ ਦੇ ਰਹੀ। ਇਕ ਪ੍ਰੈਸ ਮਿਲਣੀ ਦੌਰਾਨ ਦੀਪਕ ਅਨੰਦ ਨੇ ਸਪੱਸ਼ਟ ਕੀਤਾ ਕਿ ਵਿਚਾਰਾਂ ਦੀ ਆਜ਼ਾਦੀ ਅਤੇ ਬੋਲਣ ਦੀ ਸੁਤੰਤਰਤਾ ਜਾਂ ਅਪਣੇ ਹੱਕਾਂ ਲਈ ਸੰਘਰਸ਼ ਕਰਨਾ ਹਰ ਨਾਗਰਿਕ ਦਾ ਅਧਿਕਾਰ ਹੈ ਅਤੇ ਇਹ ਅਧਿਕਾਰ, ਉਥੋਂ ਦੀ ਕੈਨੇਡਾ ਸਰਕਾਰ ਪੰਜਾਬੀਆਂ ਨੂੰ ਦੇ ਰਹੀ ਹੈ।
ਟਰਾਂਟੋ ਨੇੜੇ ਮਿਸੀਸਾਗੁਆ ਤੋਂ ਵਿਧਾਇਕ ਦੀਪਕ ਅਨੰਦ ਨੇ ਤਰਕ ਦਿਤਾ ਕਿ ਜੇ ਇਥੇ ਰਹਿ ਰਹੇ ਪੰਜਾਬੀਆਂ ਜਾਂ ਸਿੱਖਾਂ ਨਾਲ ਕੋਈ ਵਿਤਕਰਾ ਹੋ ਰਿਹਾ ਹੈ ਜਾਂ ਇਨਸਾਫ਼ ਨਹੀਂ ਮਿਲ ਰਿਹਾ ਜਾਂ ਪੰਜਾਬ ਸਰਕਾਰ 'ਤੇ ਕੇਂਦਰ ਸਰਕਾਰ ਨਾਲ ਰੰਜਿਸ਼ ਹੈ ਤਾਂ ਸ਼ਾਂਤਮਈ ਤਰੀਕੇ ਨਾਲ ਕਾਨੂੰਨ ਦੇ ਦਾਇਰੇ 'ਚ ਰਹਿ ਕੇ ਅਪਣੇ ਹੱਕਾਂ ਲਈ ਕੋਸ਼ਿਸ਼ ਕਰਨਾ ਵਾਜਬ ਹੈ। ਦੀਪਕ ਅਨੰਦ ਨੇ ਦਸਿਆ ਕਿ ਪੰਜਾਬ 'ਤੇ ਮੁਲਕ ਦੇ ਹੋਰ ਸੂਬਿਆਂ ਤੋਂ ਪੜ੍ਹਾਈ ਅਤੇ ਰੁਜ਼ਗਾਰ ਵਾਸਤੇ ਕੈਨੇਡਾ 'ਚ ਗਏ ਲੱਖਾਂ ਪੰਜਾਬੀਆਂ ਨੇ ਉਥੇ ਦੀ ਆਰÎਿਥਕਤਾ 'ਚ ਬਹੁਤ ਵੱਡਾ ਹਿੱਸਾ ਪਾਇਆ ਹੈ।
ਇਸ ਵੇਲੇ 3 ਲੱਖ ਵਿਦਿਆਰਥੀ ਟਰਾਂਟੋ ਦੇ ਨੇੜੇ ਇਲਾਕਿਆਂ 'ਚ ਕਾਲਜਾਂ ਅਤੇ ਯੂਨੀਵਰਸਟੀਆਂ 'ਚ ਪੜ੍ਹਾਈ ਕਰ ਰਹੇ ਹਨ ਅਤੇ ਨਾਲ ਦੀ ਨਾਲ ਰੁਜ਼ਗਾਰ 'ਚ ਵੀ ਲੱਗੇ ਹਨ। ਕੈਨੇਡਾ ਤੋਂ ਕੇਵਲ ਨਿਜੀ ਦੌਰੇ 'ਤੇ ਆਏ ਵਿਧਾਇਕ ਦੀਪਕ ਅਨੰਦ ਨੇ ਦਸਿਆ ਕਿ ਉਹ ਇਕ ਦੋ ਦਿਨਾਂ 'ਚ ਪੰਜਾਬ ਦੇ ਰਾਜਪਾਲ ਵੀ.ਪੀ. ਸਿੰਘ ਬਦਨੌਰ, ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਅਤੇ ਹੋਰ ਸਿਆਸੀ ਨੇਤਾਵਾਂ ਸਮੇਤ ਅਧਿਕਾਰੀਆਂ ਨਾਲ ਵੀ ਮੁਲਾਕਾਤ ਕਰਨਗੇ ਅਤੇ ਕੈਨੇਡਾ 'ਚ ਵਸੇ ਪੰਜਾਬੀਆਂ ਦੀਆਂ ਸਮੱਸਿਆਵਾਂ ਬਾਰੇ ਚਰਚਾ ਕਰਨਗੇ।
