ਤਿਹਾੜ ਜੇਲ ਵਿਚ ਬੰਦ ਕਿਸਾਨਾਂ ਦੀ ਵਿਥਿਆ ਅਪਣੀਆਂ ਲੱਤਾਂ 'ਤੇ ਲਿਖੀ : ਮਨਦੀਪ ਪੂਨੀਆ 

ਨਵੀਂ ਦਿੱਲੀ, 4 ਫ਼ਰਵਰੀ (ਸ਼ੈਸ਼ਵ ਨਾਗਰਾ): ਬੀਤੇ ਦਿਨੀਂ ਦਿੱਲੀ ਪੁਲਿਸ ਨੇ ਸਿੰਘੂ ਬਾਰਡਰ 'ਤੇ ਪ੍ਰਦਰਸ਼ਨ ਵਾਲੀ ਥਾਂ ਤੇ ਪੱਤਰਕਾਰੀ ਕਰ ਰਹੇ ਆਜ਼ਾਦ ਪੱਤਰਕਾਰ ਮਨਦੀਪ ਪੂਨੀਆ ਨੂੰ ਹਿਰਾਸਤ ਵਿਚ ਲਿਆ ਸੀ | ਰੋਹਿਨੀ ਦੀ ਅਦਾਲਤ ਨੇ ਪੱਤਰਕਾਰ ਮਨਦੀਪ ਪੂਨੀਆ ਨੂੰ ਜ਼ਮਾਨਤ ਦਿਤੀ ਅਤੇ ਉਹ ਤਿਹਾੜ ਜੇਲ ਵਿਚੋਂ ਰਿਹਾਅ ਹੋ ਕੇ ਬਾਹਰ ਆ ਚੁੱਕੇ ਹਨ | 
ਰਿਹਾਅ ਹੋਣ ਤੋਂ ਬਾਅਦ ਮਨਦੀਪ ਪੂਨੀਆ ਨੇ ਰੋਜ਼ਾਨਾ ਸਪੋਕਸਮੈਨ ਨੂੰ ਦਸਿਆ ਕਿ ਉਹ 30 ਜਨਵਰੀ ਨੂੰ ਪੱਤਰਕਾਰੀ ਕਰ ਰਹੇ ਸਨ ਤੇ ਪੁਲਿਸ ਨੇ ਉਨ੍ਹਾਂ ਦੀ ਪੱਤਰਕਾਰੀ ਨੂੰ ਭੰਗ ਕੀਤਾ | ਮਨਦੀਪ ਨੇ ਦਸਿਆ ਕਿ ਦਿੱਲੀ ਪੁਲਿਸ ਨੇ ਉਨ੍ਹਾਂ ਨੂੰ ਤਿਹਾੜ ਜੇਲ ਵਿਚ ਰਖਿਆ | ਉਹ ਇਥੇ ਕਰੀਬ 3 ਦਿਨ ਰਹੇ ਤੇ ਉਨ੍ਹਾਂ ਨੇ ਇਸ ਨੂੰ ਵੀ ਅਪਣੀ ਪੱਤਰਕਾਰੀ ਲਈ ਵਰਤਿਆ | ਜੇਲ ਵਿਚ ਮਨਦੀਪ ਨੇ ਉੱਥੇ ਮੌਜੂਦ ਪੰਜਾਬ-ਹਰਿਆਣਾ ਦੇ ਕਿਸਾਨਾਂ ਨਾਲ ਗੱਲਬਾਤ ਕੀਤੀ ਤੇ ਸਾਰੀ ਘਟਨਾ ਨੂੰ ਅਪਣੀਆਂ ਲੱਤਾਂ 'ਤੇ ਲਿਖਿਆ | ਮਨਦੀਪ ਨੇ ਦਸਿਆ ਕਿ ਉਹ ਇਸ ਸਬੰਧੀ ਰੀਪੋਰਟ ਤਿਆਰ ਕਰਨਗੇ ਅਤੇ ਲੋਕਾਂ ਨੂੰ ਦਸਣਗੇ ਕਿ ਜੇਲ ਵਿਚ ਕਿਸਾਨਾਂ ਦੀ ਕੀ ਸਥਿਤੀ ਹੈ? 
ਉਨ੍ਹਾਂ ਕਿਹਾ ਕਿ ਪੱਤਰਕਾਰੀ ਮੇਰਾ ਕੰਮ ਹੈ ਤੇ ਇਸ ਨੂੰ ਉਹ ਹਰ ਹਾਲ ਵਿਚ ਜਾਰੀ ਰੱਖਣਗੇ | ਜੇਕਰ ਸਰਕਾਰ ਲੋਕਾਂ ਦੇ ਹੱਕਾਂ ਨੂੰ ਦਬਾਏਗੀ ਤਾਂ ਉਹ ਲੋਕਾਂ ਦੀ ਆਵਾਜ਼ ਚੁਕਣਗੇ | ਮਨਦੀਪ ਪੂਨੀਆ ਨੇ ਅਪਣੀ imageਲੱਤ 'ਤੇ ਜੇਲ ਵਿਚ ਕੈਦ ਕਿਸਾਨਾਂ ਦੇ ਨਾਂਅ ਅਤੇ ਉਨ੍ਹਾਂ ਸਬੰਧੀ ਹੋਰ ਜਾਣਕਾਰੀ ਲਿਖੀ ਹੈ |  ਪੱਤਰਕਾਰ ਨੇ ਦਸਿਆ ਕਿ ਪੁਲਿਸ ਨੇ ਉਨ੍ਹਾਂ ਦੀਆਂ ਲੱਤਾਂ 'ਤੇ ਡਾਂਗਾਂ ਮਾਰੀਆਂ, ਇਸ ਲਈ ਉਨ੍ਹਾਂ ਨੇ ਇਸ ਨੂੰ ਹੀ ਅਪਣੀ ਪੱਤਰਕਾਰੀ ਦਾ ਮਾਧਿਅਮ ਬਣਾਇਆ | ਅਖ਼ੀਰ ਵਿਚ ਮਨਦੀਪ ਪੂਨੀਆ ਨੇ ਕਿਹਾ ਕਿ ਉਹ ਹੁਣ ਵੀ ਦਿੱਲੀ ਦੇ ਬਾਰਡਰਾਂ ਤੋਂ ਕਿਸਾਨੀ ਮੋਰਚੇ ਦੀ ਪੱਤਰਕਾਰੀ ਜਾਰੀ ਰੱਖਣਗੇ ਅਤੇ ਜ਼ਮੀਨੀ ਹਕੀਕਤ ਲੋਕਾਂ ਤਕ ਪਹੁੰਚਾਉਾਦੇ ਰਹਿਣਗੇ |