6 ਮਹੀਨੇ ਮਗਰੋਂ ਅਪਣੇ ਬੱਚੇ ਨੂੰ ਦੇਖ ਕੇ ਮਾਂ ਕਾਫ਼ੀ ਜ਼ਿਆਦਾ ਭਾਵੁਕ ਹੋ ਗਈ।
ਖੰਨਾ (ਧਰਮਿੰਦਰ ਸਿੰਘ): ਖੰਨਾ ਵਿਖੇ ਇਕ ਮਾਂ ਵੱਲੋਂ ਅਪਣਾ ਬੱਚਾ ਹਾਸਲ ਕਰਨ ਲਈ ਅਪਣੇ ਪਤੀ ਵਿਰੁੱਧ ਕਾਨੂੰਨੀ ਲੜਾਈ ਲੜੀ ਗਈ, ਜਿਸ ਵਿਚ ਅਦਾਲਤ ਨੇ ਮਾਂ ਦੇ ਹੱਕ ਵਿਚ ਹੁਕਮ ਜਾਰੀ ਕਰਦਿਆਂ ਬੱਚਾ ਮਾਂ ਦੇ ਹਵਾਲੇ ਕਰਨ ਦੇ ਆਦੇਸ਼ ਜਾਰੀ ਕੀਤੇ। 6 ਮਹੀਨੇ ਦੀ ਕਾਨੂੰਨੀ ਲੜਾਈ ਮਗਰੋਂ ਪੁਲਿਸ ਨੇ ਸਾਢੇ ਤਿੰਨ ਸਾਲ ਦੇ ਬੱਚੇ ਨੂੰ ਮਾਂ ਦੇ ਹਵਾਲੇ ਕਰ ਦਿੱਤਾ। 6 ਮਹੀਨੇ ਮਗਰੋਂ ਅਪਣੇ ਬੱਚੇ ਨੂੰ ਦੇਖ ਕੇ ਮਾਂ ਕਾਫ਼ੀ ਜ਼ਿਆਦਾ ਭਾਵੁਕ ਹੋ ਗਈ।
ਭਾਵੁਕ ਹੋਈ ਬੱਚੇ ਅਰਮਾਨਦੀਪ ਸਿੰਘ ਦੀ ਮਾਂ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਆਖਿਆ ਕਿ 11 ਸਤੰਬਰ 2020 ਨੂੰ ਉਸ ਦਾ ਪਤੀ ਉਸ ਦੇ ਬੱਚੇ ਨੂੰ ਉਨ੍ਹਾਂ ਦੇ ਨਿਊ ਮਾਡਲ ਟਾਊਨ ਖੰਨਾ ਵਿਖੇ ਸਥਿਤ ਘਰ ਦੇ ਬਾਹਰੋਂ ਉਠਾ ਕੇ ਲੈ ਗਿਆ ਸੀ, ਜਿਸ ਮਗਰੋਂ ਬੱਚਾ ਹਾਸਲ ਕਰਨ ਲਈ ਉਸ ਨੇ ਕਾਫ਼ੀ ਧੱਕੇ ਖਾਧੇ ਅਤੇ ਹੁਣ 6 ਮਹੀਨੇ ਬਾਅਦ ਉਸ ਨੂੰ ਕਾਮਯਾਬੀ ਹਾਸਲ ਹੋਈ ਹੈ।
ਉਧਰ ਪਿਤਾ ਪੱਖ ਦੇ ਵਕੀਲ ਭਰਤ ਵਰਮਾ ਨੇ ਆਖਿਆ ਕਿ ਉਹ ਹਾਈਕੋਰਟ ਦੇ ਹੁਕਮਾਂ ਦੀ ਪਾਲਣਾ ਕਰਦੇ ਨੇ ਪਰ ਉਹ ਮਾਣਯੋਗ ਅਦਾਲਤ ਪਾਸੋਂ ਸਮੇਂ ਸਮੇਂ ’ਤੇ ਬੱਚੇ ਨੂੰ ਮਿਲਣ ਦੀ ਇਜਾਜ਼ਤ ਜ਼ਰੂਰ ਮੰਗਣਗੇ। ਇਸ ਸਬੰਧੀ ਗੱਲਬਾਤ ਕਰਦਿਆਂ ਖੰਨਾ ਸਿਟੀ ਥਾਣਾ-2 ਦੇ ਮੁਖੀ ਲਾਭ ਸਿੰਘ ਨੇ ਆਖਿਆ ਕਿ ਅਸੀਂ ਮਾਣਯੋਗ ਹਾਈਕੋਰਟ ਦੇ ਹੁਕਮਾਂ ਮੁਤਾਬਕ ਬੱਚੇ ਨੂੰ ਉਸ ਦੇ ਮਾਂ ਦੇ ਹਵਾਲੇ ਕਰ ਦਿੱਤਾ ਹੈ। 6 ਮਹੀਨੇ ਮਗਰੋਂ ਬੱਚਾ ਵੀ ਅਪਣੀ ਮਾਂ ਕੋਲ ਆ ਕੇ ਕਾਫ਼ੀ ਖ਼ੁਸ਼ ਸੀ ਅਤੇ ਬੱਚੇ ਨੂੰ ਹਾਸਲ ਕਰਕੇ ਮਾਂ ਸਮੇਤ ਸਾਰੇ ਪਰਿਵਾਰ ਵਿਚ ਖ਼ੁਸ਼ੀ ਅਤੇ ਭਾਵੁਕਤਾ ਵਾਲਾ ਮਾਹੌਲ ਬਣ ਗਿਆ।