ਪੀ.ਜੀ.ਆਈ. ਵਿਚ ਇਸ ਹਫ਼ਤੇ ਆਕਸਫ਼ੋਰਡ ਕੋਵਿਡ ਵੈਕਸੀਨ ਲਈ ਟਰਾਇਲ ਸ਼ੁਰੂ ਹੋ ਗਿਆ ਹੈ। ਇਸ ਲਈ ਪੀ.ਜੀ.ਆਈ. ਸਿਹਤਮੰਦ ਲੋਕਾਂ '........
ਚੰਡੀਗੜ੍ਹ: ਪੀ.ਜੀ.ਆਈ. ਵਿਚ ਇਸ ਹਫ਼ਤੇ ਆਕਸਫ਼ੋਰਡ ਕੋਵਿਡ ਵੈਕਸੀਨ ਲਈ ਟਰਾਇਲ ਸ਼ੁਰੂ ਹੋ ਗਿਆ ਹੈ। ਇਸ ਲਈ ਪੀ.ਜੀ.ਆਈ. ਸਿਹਤਮੰਦ ਲੋਕਾਂ 'ਤੇ ਇਸ ਦਾ ਪ੍ਰੀਖਣ ਕਰਨ ਜਾ ਰਿਹਾ ਹੈ। ਪੀ.ਜੀ.ਆਈ. ਨੇ ਵਲੰਟੀਅਰਸ ਨੂੰ ਇਸ ਲਈ ਅਪਣਾ ਨਾਂ ਰਜਿਸਟਰ ਕਰਵਾਉਣ ਲਈ ਕਿਹਾ ਹੈ ਤਾਕਿ ਇਸ ਦਾ ਪ੍ਰੀਖਣ ਕੀਤਾ ਜਾ ਸਕੇ। ਪੀ.ਜੀ.ਆਈ. ਵਿਚ ਆਕਸਫ਼ੋਰਡ ਦੀ ਵੈਕਸੀਨ ਕੋਵਿਸ਼ਿਲਡ ਦਾ ਇਹ ਦੂਜੇ ਫੇਸ ਦਾ ਟਰਾਇਲ ਹੈ। ਪੀ.ਜੀ.ਆਈ. ਨੂੰ ਇਸ ਵੈਕਸੀਨ ਦੇ ਟਰਾਇਲ ਲਈ ਪੂਰੇ ਭਾਰਤ ਤੋਂ 17 ਸੈਂਟਰਾਂ ਵਿਚੋਂ ਚੁਣਿਆ ਗਿਆ ਹੈ।
ਮਹਾਰਾਸ਼ਟਰ ਪੁਣੇ ਦੇ ਸਿਰਮ ਇੰਸਟੀਚਿਊਟ ਵਲੋਂ ਬਣਾਈ ਜਾ ਰਹੀ ਇਸ ਵੈਕਸੀਨ ਦਾ ਟਰਾਇਲ ਹੁਣ ਚੰਡੀਗੜ੍ਹ ਪੀ.ਜੀ.ਆਈ. ਵਿਚ ਸ਼ੁਰੂ ਹੋ ਗਿਆ ਹੈ। ਪੀਜੀਆਈ ਦੇ ਕੰਮਉਨਿਟੀ ਮੈਡੀਸਨ ਵਿਭਾਗ ਦੀ ਸੀਨੀਅਰ ਡਾ. ਮਧੂ ਨੂੰ ਇਸ ਪ੍ਰਾਜੈਕਟ ਲਈ ਪ੍ਰਿੰਸੀਪਲ ਇਨਵੈਸਟੀਗੇਟਰ ਬਣਾਇਆ ਗਿਆ ਹੈ। ਡਾ. ਮਧੂ ਨੇ ਦੱਸਿਆ ਹਾਲੇ ਇੰਡੀਅਨ ਕੌਂਸਲ ਆਫ਼ ਮੈਡੀਕਲ ਰਿਸਰਚ ਵਲੋਂ ਪੀ.ਜੀ.ਆਈ. ਚੰਡੀਗੜ੍ਹ ਨੂੰ ਇਸ ਵੈਕਸੀਨ ਟਰਾਇਲ ਲਈ ਚੁਣਿਆ ਗਿਆ ਹੈ।
ਵੈਕਸੀਨ ਦੇ ਟਰਾਇਲ ਦੇ ਨਤੀਜੇ ਆਉਣ ਦੇ ਬਾਅਦ ਹੀ ਇਹ ਕਿਹਾ ਜਾ ਸਕੇਗਾ ਕਿ ਵੈਕਸੀਨ ਕੋਰੋਨਾ ਮਰੀਜਾਂ ਤੇ ਕਿੰਨੀ ਕਾਰਾਗਰ ਹੈ। ਵੈਕਸੀਨ ਕਿੰਨੀ ਸੁਰੱਖਿਅਤ, ਇਸ ਤੋਂ ਬਾਅਦ ਹੋਵੇਗਾ ਮਰੀਜ਼ਾਂ 'ਤੇ ਟਰਾਇਲ : ਪੀ.ਜੀ.ਆਈ. ਪਹਿਲਾਂ ਇਸ ਵੈਕਸੀਨ ਦਾ ਸੇਫ਼ਟੀ ਟਰਾਇਲ ਕਰ ਰਿਹਾ ਹੈ। ਡਾ. ਮਧੂ ਨੇ ਦਸਿਆ ਕਿ ਆਕਸਫ਼ੋਰਡ ਵਿਚ ਇਸ ਵੈਕਸੀਨ ਦਾ ਸੇਫਟੀ ਟਰਾਇਲ ਹੋ ਚੁੱਕਾ ਹੈ।
ਪੀ.ਜੀ.ਆਈ. ਵਲੋਂ ਇਸ ਵੈਕਸੀਨ ਦੇ ਸੇਫ਼ਟੀ ਟਰਾਇਲ ਦੇ ਬਾਅਦ ਹੀ ਇਸਦੇ ਕੇਰੋਨਾ ਮਰੀਜ਼ਾਂ 'ਤੇ ਵਰਤੋਂ ਕੀਤੀ ਜਾਵੇਗੀ ਪਰ ਇਸ ਲਈ ਪਹਿਲਾਂ ਐਥਿਕਲ ਕਮੇਟੀ ਵਲੋਂ ਮਨਜ਼ੂਰੀ ਲੈਣੀ ਹੋਵੇਗੀ। 18 ਸਾਲ ਤੋਂ ਜ਼ਿਆਦਾ ਦੀ ਉਮਰ ਦੇ ਵਲੰਟੀਅਰਜ਼ 'ਤੇ ਹੋਵੇਗਾ ਟਰਾਇਲ : ਡਾ. ਮਧੂ ਨੇ ਦਸਿਆ ਕਿ ਇਸ ਵੈਕਸੀਨ ਦਾ ਟਰਾਇਲ ਉਨ੍ਹਾਂ ਵਲੰਟੀਅਰਜ਼ 'ਤੇ ਕੀਤਾ ਜਾ ਰਿਹਾ ਹੈ, ਜਿਨ੍ਹਾਂ ਦੀ ਉਮਰ 18 ਸਾਲ ਤੋਂ ਜ਼ਿਆਦਾ ਹੋਵੇ ਅਤੇ ਉਨ੍ਹਾਂ ਨੂੰ ਕੋਰੋਨਾ ਨਾ ਹੋਵੇ।
ਉਨ੍ਹਾਂ 'ਤੇ ਇਸ ਵੈਕਸੀਨ ਦੇ ਟਰਾਇਲ ਦੇ ਦੌਰਾਨ ਸਰੀਰ ਵਿਚ ਆਉਣ ਵਾਲੇ ਹਰ ਬਦਲਾਅ 'ਤੇ ਨਜ਼ਰ ਰੱਖੀ ਜਾਵੇਗੀ। ਉਨ੍ਹਾਂ ਨੂੰ ਡਾਕਟਰਾਂ ਦੀ ਨਿਗਰਾਨੀ ਵਿਚ ਰਖਿਆ ਜਾਵੇਗਾ ਤਾਕਿ ਇਨ੍ਹਾਂ ਵਲੰਟੀਅਰਜ਼ ਦੇ ਹਰ ਸਰੀਰਕ ਬਦਲਾਅ ਨੂੰ ਰਿਪੋਰਟ ਵਿਚ ਸ਼ਾਮਲ ਕੀਤਾ ਜਾ ਸਕੇ।
ਪੀ.ਜੀ.ਆਈ. ਨੇ ਦਸਿਆ ਕਿ ਇਸ ਵੈਕਸੀਨ ਦੇ ਟਰਾਇਲ ਲਈ 300 ਤੋਂ 400 ਲੋਕਾਂ ਦੀ ਸਕਰੀਨਿੰਗ ਕੀਤੀ ਜਾਵੇਗੀ। ਇਸ ਵਿਚ 200 ਲੋਕਾਂ ਨੂੰ ਸਕਰੀਨਿੰਗ ਦੇ ਦੌਰਾਨ ਚੁਣਿਆ ਜਾਵੇਗਾ। ਇਸ ਹਫ਼ਤੇ ਇਸ ਵੈਕਸੀਨ ਦਾ ਟਰਾਇਲ ਸ਼ੁਰੂ ਕਰ ਦਿਤਾ ਗਿਆ ਹੈ। ਟਰਾਇਲ ਦੇ ਦੌਰਾਨ ਪੀਜੀਆਈ ਦੇ ਕੰਮਿਉਨਿਟੀ ਮੈਡੀਸਨ, ਵਾਇਰੋਲਾਜੀ, ਇੰਟਰਨਲ ਮੈਡਿਸਨ ਅਤੇ ਫ਼ਾਰਮਾਕੋਲਾਜੀ ਦੇ ਸੀਨੀਅਰ ਡਾਕਟਰ ਸ਼ਾਮਲ ਕੀਤੇ ਗਏ ਹਨ। ਟਰਾਇਲ ਨੂੰ ਪੂਰਾ ਹੋਣ ਵਿਚ ਘੱਟ ਤੋਂ ਘੱਟ ਪੰਜ ਤੋਂ ਛੇ ਮਹੀਨੇ ਦਾ ਸਮਾਂ ਲਗੇਗਾ।