ਦੀਵਾਲੀ ਨੂੰ ਦਿੱਲੀ 'ਚ ਇਸ ਵਾਰ ਵੀ ਨਹੀਂ ਚੱਲਣਗੇ ਪਟਾਕੇ : ਕੇਜਰੀਵਾਲ

ਨਵੀਂ ਦਿੱਲੀ, 5 ਨਵੰਬਰ: ਦੀਵਾਲੀ 'ਤੇ ਪਟਾਕੇ ਸਾੜਨ ਦੀ ਇਸ ਵਾਰ ਦਿੱਲੀ 'ਚ ਮਨਜ਼ੂਰੀ ਨਹੀਂ ਹੋਵੇਗੀ। ਰਾਜਧਾਨੀ ਵਿਚ ਕੋਰੋਨਾ ਅਤੇ ਹਵਾ ਪ੍ਰਦੂਸ਼ਣ ਦੀ ਸਮੱਸਿਆ ਦਾ ਹਵਾਲਾ ਦਿੰਦਿਆਂ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਪੂਰੀ ਦਿੱਲੀ ਦੇ ਦੋ ਕਰੋੜ ਲੋਕ ਮਿਲ ਕੇ ਦੀਵਾਲੀ ਮਨਾਉਣਗੇ। ਉਨ੍ਹਾਂ ਕਿਹਾ ਕਿ ਜਿਸ ਤਰ੍ਹਾਂ ਅਸੀਂ ਪਿਛਲੇ ਸਾਲ ਦੀਵਾਲੀ 'ਤੇ ਪਟਾਕੇ ਨਾ ਸਾੜਨ ਦਾ ਸੰਕਲਪ ਲਿਆ ਸੀ ਤੇ ਦਿੱਲੀ ਦੇ ਦਿਲ ਕਨਾਟ ਪਲੇਸ ਵਿਚ ਇਕਜੁੱਟ ਦੀਵਾਲੀ ਦੀਆਂ ਖੁਸ਼ੀਆਂ ਵੰਡੀਆਂ ਸੀ। ਇਸੇ ਤਰ੍ਹਾਂ ਇਸ ਸਾਲ ਵੀ ਅਸੀਂ ਇਕੱਠੇ ਦੀਵਾਲੀ ਮਨਾਵਾਂਗੇ ਪਰ ਪਟਾਕੇ ਨਹੀਂ ਸਾੜਾਂਗੇ। ਦਿੱਲੀ ਵਿਚ ਹਵਾ ਪ੍ਰਦੂਸ਼ਣ 'ਤੇ ਚਿੰਤਾ ਜ਼ਾਹਰ ਕਰਦਿਆਂ ਮੁੱਖ ਮੰਤਰੀ ਨੇ ਕਿਹਾ ਕਿ ਅਸੀਂ ਵੇਖ ਰਹੇ ਹਾਂ ਕਿ ਅਸਮਾਨ ਧੂੰਏਂ ਨਾਲ ਭਰਿਆ ਹੋਇਆ ਹੈ ਅਤੇ ਇਸ ਕਾਰਨ ਕੋਰੋਨਾ ਦੀ ਸਥਿਤੀ ਬਦਤਰ ਹੁੰਦੀ ਜਾ ਰਹੀ ਹੈ। ਪਿਛਲੀ ਵਾਰ ਵੀ ਅਸੀਂ ਦੀਵਾਲੀ ਸਮੇਂ ਪਟਾਕੇ ਨਾ ਸਾੜਨ ਦੀ ਸਹੁੰ ਖਾਧੀ ਸੀ। ਦੀਵਾਲੀ 'ਤੇ ਅਸੀਂ ਸਭ ਲੋਕਾਂ ਨੇ ਕਨਾਟ ਪਲੇਸ ਦੇ ਅੰਦਰ ਸਾਰੀ ਦਿੱਲੀ ਦੇ ਲੋਕਾਂ ਨੇ ਮਿਲ ਕੇ ਦੀਵਾਲੀ ਮਨਾਈ ਸੀ ਤੇ ਅਸੀਂ ਉੱਥੇ ਲਾਈਟ ਸ਼ੋਅ ਵੀ ਰੱਖਿਆ ਸੀ ਤੇ ਤੁਸੀਂ ਸਭ ਲੋਕ ਕਨਾਟ ਪਲੇਸ ਆਏ ਸੀ। ਕੇਜਰੀਵਾਲ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਜਿਸ ਤਰ੍ਹਾਂ ਪਿਛਲੇ ਸਾਲ ਅਸੀਂ ਪਟਾਕੇ ਨਹੀਂ ਚਲਾਏ ਸੀ ਉਸੇ ਤਰ੍ਹਾਂ ਇਸ ਵਾਰ ਵੀ ਅਸੀਂ ਬਿਨ੍ਹਾਂ ਪਟਾਕਿਆਂ ਦੇ ਦੀਵਾਲੀ ਮਨਾਵਾਂਗੇ।