ਜਾਅਲੀ ਫਾਰਮ ਜ਼ਰੀਏ ਧੋਖਾਧੜੀ ਕਰਨ ਦੀ ਕੋਸ਼ਿਸ਼
ਚੰਡੀਗੜ੍ਹ ਪੁਲਿਸ ਨੇ ਸਹਾਇਕ ਸਬ-ਇੰਸਪੈਕਟਰ (ਏਐਸਆਈ) ਭਰਤੀ ਘੁਟਾਲੇ ਵਿਚ ਆਪਣੇ ਹੀ ਵਿਭਾਗ ਦੇ ਇਕ ਕਾਂਸਟੇਬਲ ਸਮੇਤ 3 ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਫੜੇ ਗਏ ਮੁਲਜ਼ਮਾਂ ਵਿਚ ਹਰਿਆਣਾ ਦੇ ਜੀਂਦ ਦਾ ਰਹਿਣ ਵਾਲਾ ਨਰੇਸ਼ (33) ਹੈ ਜੋ ਸੈਕਟਰ 42ਸੀ ਵਿਚ ਰਹਿੰਦਾ ਸੀ। ਦੂਜਾ ਮੁਲਜ਼ਮ ਹਰਦੀਪ (32) ਵੀ ਜੀਂਦ ਦਾ ਰਹਿਣ ਵਾਲਾ ਹੈ ਅਤੇ ਸੈਕਟਰ 41ਬੀ ਵਿਚ ਰਹਿ ਰਿਹਾ ਸੀ। ਤੀਜਾ ਮੁਲਜ਼ਮ ਚੰਦਰ ਕਾਂਤ (29) ਮਨੀ ਮਾਜਰਾ ਦਾ ਰਹਿਣ ਵਾਲਾ ਹੈ।
ਪੁਲਿਸ ਅਨੁਸਾਰ ਗ੍ਰਿਫ਼ਤਾਰ ਮੁਲਜ਼ਮਾਂ ਵਿਚ ਕਾਂਸਟੇਬਲ ਨਰੇਸ਼ ਚੰਡੀਗੜ੍ਹ ਪੁਲਿਸ ਵਿਚ ਹੀ ਕਾਂਸਟੇਬਲ ਹੈ। ਜਦਕਿ ਮੁਲਜ਼ਮ ਹਰਦੀਪ ਸੈਕਟਰ 17 ਸਥਿਤ ਏਜੀ ਪੰਜਾਬ ਦਫ਼ਤਰ ਵਿਚ ਕੰਮ ਕਰਦਾ ਹੈ। ਦੋਵਾਂ ਨੇ ਸਾਈਬਰ ਕੈਫੇ ਚਲਾਉਣ ਵਾਲੇ ਚੰਦਰ ਕਾਂਤ ਦੀ ਮਿਲੀਭੁਗਤ ਨਾਲ ਜਾਅਲੀ ਅਰਜ਼ੀ ਫਾਰਮ ਜਮ੍ਹਾ ਕਰਵਾਏ ਸਨ। ਇਹਨਾਂ ਤਿੰਨਾਂ ਮੁਲਜ਼ਮਾਂ ਨੂੰ ਅਦਾਲਤ ਵਿਚ ਪੇਸ਼ ਕਰਕੇ ਰਿਮਾਂਡ ਹਾਸਲ ਕਰੇਗੀ।
30 ਨਵੰਬਰ ਨੂੰ ਸੈਕਟਰ 11 ਥਾਣੇ ਦੀ ਪੁਲਿਸ ਨੇ ਇਹਨਾਂ ਖ਼ਿਲਾਫ਼ ਧੋਖਾਧੜੀ, ਜਾਅਲਸਾਜ਼ੀ, ਅਪਰਾਧਿਕ ਸਾਜ਼ਿਸ਼ ਅਤੇ ਹੋਰ ਧਾਰਾਵਾਂ ਤਹਿਤ ਕੇਸ ਦਰਜ ਕੀਤਾ ਸੀ। ਪੁਲਿਸ ਨੇ ਕਿਹਾ ਹੈ ਕਿ ਇਹ ਮੁਲਜ਼ਮ ਏਐਸਆਈ ਭਰਤੀ ਪ੍ਰੀਖਿਆ ਵਿਚ ਧੋਖਾਧੜੀ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਸਨ। ਸਬੰਧਤ ਪ੍ਰੀਖਿਆ ਨਾਲ ਸਬੰਧਤ ਕੁਝ ਸ਼ੱਕੀ ਅਰਜ਼ੀ ਫਾਰਮ ਅਪਰਾਧ ਸ਼ਾਖਾ ਕੋਲ ਜਾਂਚ ਲਈ ਆਏ ਸਨ। ਉਹਨਾਂ ਦੀ ਜਾਂਚ ਤੋਂ ਬਾਅਦ ਸੈਕਟਰ 11 ਥਾਣੇ ਦੀ ਪੁਲਿਸ ਨੇ ਆਈਪੀਸੀ ਦੀ ਧਾਰਾ 419, 420, 511, 467, 468, 471 ਅਤੇ 120ਬੀ ਤਹਿਤ ਕੇਸ ਦਰਜ ਕੀਤਾ ਹੈ।
ਜਾਣਕਾਰੀ ਅਨੁਸਾਰ ਵਿਭਾਗ ਵੱਲੋਂ ਕੱਢੀਆਂ ਗਈਆਂ ਏਐਸਆਈ ਦੀਆਂ 49 ਅਸਾਮੀਆਂ ’ਤੇ ਭਰਤੀ ਹੋਣ ਲਈ ਕੁਝ ਉਮੀਦਵਾਰਾਂ ਨੇ ਕਥਿਤ ਤੌਰ ’ਤੇ ਗਲਤ ਜਾਣਕਾਰੀ ਭਰੀ ਸੀ। ਸੂਤਰਾਂ ਅਨੁਸਾਰ ਇਸ ਘੁਟਾਲੇ ਵਿਚ ਇਕੋ ਉਮੀਦਵਾਰ ਨੇ ਕਈ ਅਰਜ਼ੀਆਂ ਭਰੀਆਂ ਸਨ। ਪੁਲਿਸ ਦੀ ਜਾਣਕਾਰੀ ਅਨੁਸਾਰ ਕੰਪਿਊਟਰ ਸਿਸਟਮ ਵਿਚ ਪਾਇਆ ਗਿਆ ਕਿ ਇਸ ਭਰਤੀ ਲਈ ਕਈ ਅਜਿਹੇ ਉਮੀਦਵਾਰ ਹਨ ਜਿਨ੍ਹਾਂ ਨੇ ਵੱਖ-ਵੱਖ ਵੇਰਵਿਆਂ ਨਾਲ ਕਈ ਅਰਜ਼ੀਆਂ ਦਿੱਤੀਆਂ ਹਨ। ਮੁੱਢਲੀ ਜਾਂਚ ਵਿਚ ਸਾਹਮਣੇ ਆਇਆ ਹੈ ਕਿ ਕਈ ਉਮੀਦਵਾਰਾਂ ਨੇ ਇਕ ਤੋਂ ਵੱਧ ਅਰਜ਼ੀਆਂ ਦਿੱਤੀਆਂ ਹਨ। ਕੁਝ ਉਮੀਦਵਾਰਾਂ ਨੇ ਇਕ ਫਾਰਮ ਵਿਚ ਆਪਣਾ 'ਸਰਨੇਮ' ਨਹੀਂ ਭਰਿਆ ਹੈ ਅਤੇ ਦੂਜੇ ਵਿਚ ਸਰਨੇਮ ਨਾਲ ਬਿਨੈ-ਪੱਤਰ ਦਿੱਤਾ ਹੈ। ਪੁਲਿਸ ਮਾਮਲੇ ਦੀ ਡੂੰਘਾਈ ਨਾਲ ਜਾਂਚ ਕਰ ਰਹੀ ਹੈ।
