ਖੇਤੀ ਕਾਨੂੰਨਾਂ ਦੀ ਵਾਪਸੀ ਨੂੰ  ਲੈ ਕੇ 2 ਅਕਤੂਬਰ ਤਕ ਵੀ ਬੈਠੇ ਰਹਿਣਗੇ ਪ੍ਰਦਰਸ਼ਨਕਾਰੀ : ਟਿਕੈਤ

ਕਿਹਾ, ਕਾਨੂੰਨ ਵਾਪਸੀ ਅਤੇ ਐਮ.ਐਸ.ਪੀ 'ਤੇ ਗਾਰੰਟੀ ਕਾਨੂੰਨ ਬਣਾਏ ਜਾਣ ਤਕ ਜਾਰੀ ਰਹੇਗਾ ਅੰਦੋਲਨ 

ਨਵੀਂ ਦਿੱਲੀ, 6 ਫ਼ਰਵਰੀ : ਨਵੇਂ ਖੇਤੀ ਕਾਨੂੰਨਾਂ ਵਿਰੁਧ ਕਿਸਾਨਾਂ ਵਲੋਂ ਸਨਿਚਰਵਾਰ ਨੂੰ  ਪੂਰੇ ਦੇਸ਼ ਵਿਚ ਚੱਕਾ ਜਾਮ ਕੀਤਾ ਗਿਆ ਸੀ | ਜਿਸ ਤੋਂ ਬਾਅਦ ਕਿਸਾਨ ਆਗੂ ਰਾਕੇਸ਼ ਟਿਕੈਤ ਨੇ ਕਿਹਾ ਕਿ ਕੇਂਦਰ ਸਰਕਾਰ ਦੇ ਤਿੰਨੇ ਖੇਤੀ ਕਾਨੂੰਨਾਂ ਨੂੰ  ਵਾਪਸ ਲਏ ਜਾਣ ਦੀ ਮੰਗ ਕਰ ਰਹੇ ਪ੍ਰਦਰਸ਼ਨਕਾਰੀ 2 ਅਕਤੂਬਰ ਤਕ ਵੀ ਦਿੱਲੀ ਦੀਆਂ ਸਰਹੱਦਾਂ 'ਤੇ ਬੈਠ ਰਹਿਣਗੇ | 
ਨਵੰਬਰ ਤੋਂ ਦਿੱਲੀ-ਮੇਰਠ ਰਾਜਮਾਰਗ ਦੇ ਇਕ ਹਿੱਸੇ 'ਤੇ ਅਪਣੇ ਸਮਰਥਕਾਂ ਨਾਲ ਅੰਦੋਲਨ ਕਰ ਰਹੇ ਭਾਰਤੀ ਕਿਸਾਨ ਯੂਨੀਅਨ (ਬੀਕੇਯੂ) ਦੇ ਰਾਸ਼ਟਰੀ ਬੁਲਾਰੇ ਟਿਕੈਤ ਨੇ ਕਿਹਾ, ''ਅਸੀਂ ਦੋ ਅਕਤੂਬਰ ਤਕ ਵੀ ਇਥੇ ਬੈਠਾਂਗੇ |''
ਇਸ ਨਾਲ ਹੀ ਟਿਕੈਤ ਨੇ ਕਿਹਾ ਕਿ ਸਰਕਾਰ ਖੇਤੀ ਕਾਨੂੰਨ ਵਾਪਸ ਲਵੇ ਅਤੇ ਐੱਮ.ਐੱਸ.ਪੀ. 'ਤੇ ਕਾਨੂੰਨ ਬਣਾਏ ਨਹੀਂ ਤਾਂ ਅੰਦੋਲਨ ਜਾਰੀ ਰਹੇਗਾ | ਅਸੀਂ ਪੂਰੇ ਦੇਸ਼ 'ਚ ਯਾਤਰਾਵਾਂ ਕਰਾਂਗੇ ਅਤੇ ਪੂਰੇ ਦੇਸ਼ 'ਚ ਅੰਦੋਲਨ ਹੋਵੇਗਾ | ਪੈ੍ਰਸ ਨਾਲ ਗੱਲਬਾਤ ਕਰਦੇ ਹੋਏ, ਉਨ੍ਹਾਂ ਦਾਅਵਾ ਕੀਤਾ ਕਿ ਸਨਿਚਰਵਾਰ ਨੂੰ  ਦੁਪਹਿਰ 12 ਵਜੇ ਤੋਂ 3 ਵਜੇ ਤਕ ਐਲਾਨੇ 'ਚੱਕਾ ਜਾਮ' ਦੌਰਾਨ ਕੁੱਝ ਸ਼ਰਾਰਤੀ 
ਅਨਸਰਾਂ ਵਲੋਂ ਸ਼ਾਂਤੀ ਭੰਗ ਕਰਨ ਦੀ ਕੋਸ਼ਿਸ਼ 
ਕੀਤੇ ਜਾਣ ਬਾਰੇ ਕੁੱਝ ਜਾਣਕਾਰੀਆਂ ਮਿਲੀਆਂ ਸਨ | ਟਿਕੈਤ ਨੇ ਕਿਹਾ, ''ਇਨ੍ਹਾਂ ਜਾਣਕਾਰੀਆਂ ਦੇ ਕਾਰਨ, ਉਤਰ ਪ੍ਰਦੇਸ਼ ਅਤੇ ਉਤਰਾਖੰਡ 'ਚ ਚੱਕਾ ਜਾਮ ਨਾ ਕਰਨ ਦਾ ਫ਼ੈਸਲਾ ਲਿਆ ਗਿਆ |'' ਉਨ੍ਹਾਂ ਕਿਹਾ, ''ਕੋਈ ਵੀ ਖੇਤੀ ਦੀ ਜ਼ਮੀਨ ਨੂੰ  ਨਹੀਂ ਛੂਹ ਸਕਦਾ, ਕਿਸਾਨ ਇਸ ਦੀ ਰਖਿਆ ਕਰਨਗੇ | ਕਿਸਾਨਾਂ ਅਤੇ ਫ਼ੌਜੀਆਂ ਦੋਹਾਂ ਨੂੰ  ਇਸ ਲਈ ਅੱਗੇ ਆਉਣਾ ਚਾਹੀਦਾ ਹੈ |'' ਗਾਜ਼ੀਪੁਰ ਸਰਹੱਦ ਪ੍ਰਦਰਸ਼ਨ ਵਾਲੀ ਥਾਂ 'ਤੇ ਵੱਡੀ ਗਿਣਤੀ 'ਚ ਸੁਰੱਖਿਆ ਕਰਮੀ ਤਾਇਨਾਤ ਸਨ | 
ਬੈਰੀਕੇਡਿੰਗ ਦੇ ਦੂਜੇ ਪਾਸੇ ਸੁਰੱਖਿਆ ਕਰਮੀਆਂ ਨਾਲ ਗੱਲਬਾਤ ਕਰਦੇ ਹੋਏ, ਉਨ੍ਹਾਂ ਹੱਥ ਜੋੜ ਕੇ ਕਿਹਾ, ''ਤੁਹਾਨੂੰ ਸਾਰਿਆਂ ਨੂੰ  ਮੇਰਾ ਪ੍ਰਣਾਮ | ਹੁਣ ਤੁਸੀ ਸਾਰੇ ਮੇਰੇ ਖੇਤਾਂ ਦੀ ਰਖਿਆ ਕਰੋਗੇ |''     (ਪੀਟੀਆਈ)