ਸਿੱਖ ਜਵਾਨ ਨੇ ਨਕਸਲੀਆਂ ਨਾਲ ਹੋਈ ਮੁਠਭੇੜ ਵਿਚ ਪੱਗ ਉਤਾਰ ਕੇ ਜ਼ਖ਼ਮੀ ਸਾਥੀ ਨੂੰ ਬੰਨ੍ਹੀ ਪੱਟੀ
ਸਿੱਖ ਜਵਾਨ ਦੀ ਭਾਵਨਾ ਨੂੰ ਮੇਰਾ ਸਲਾਮ : ਡੀ.ਜੀ.ਪੀ. ਆਰ.ਕੇ. ਵਿਜ
ਰਾਏਪੁਰ, 6 ਅਪ੍ਰੈਲ : ਛੱਤੀਸਗੜ੍ਹ 'ਚ ਸਰਹੱਦ 'ਤੇ ਸੁਰੱਖਿਆ ਬਲਾਂ ਅਤੇ ਨਕਸਲੀਆਂ ਦਰਮਿਆਨ ਹੋਈ ਮੁਠਭੇੜ ਵਿਚ ਸੁਰੱਖਿਆ ਬਲਾਂ ਦੇ 24 ਜਵਾਨ ਮਾਰੇ ਗਏ | ਇਸ ਘਟਨਾ ਵਿਚ 32 ਜਵਾਨ ਜ਼ਖ਼ਮੀ ਹੋਏ ਹਨ | ਇਸ ਮੁਠਭੇੜ ਵਿਚ ਤਸਵੀਰ ਸਾਹਮਣੇ ਆਈ ਹੈ ਜਿਸ ਨੂੰ ਵੇਖ ਕੇ ਹਰ ਭਾਰਤੀ ਨਾਗਰਿਕ ਨੂੰ ਮਾਣ ਮਹਿਸੂਸ ਹੋਣ ਚਾਹੀਦਾ ਹੈ | ਦਰਅਸਲ ਨਕਸਲੀਆਂ ਦਰਮਿਆਨ ਹੋਈ ਮੁਠਭੇੜ 'ਚ ਇਕ ਸਿੱਖ ਜਵਾਨ ਗੋਲੀ ਲੱਗਣ ਨਾਲ ਬੁਰੀ ਤਰ੍ਹਾਂ ਜ਼ਖ਼ਮੀ ਹੋ ਗਿਆ ਸੀ | ਇਸ ਦੌਰਾਨ ਹੀ ਸਾਹਮਣੇ ਇਕ ਹੋਰ ਸਿਪਾਹੀ ਨੂੰ ਗੋਲੀ ਮਾਰ ਦਿਤੀ ਗਈ ਅਤੇ ਉਹ ਵੀ ਜ਼ਖ਼ਮੀ ਹੋ ਗਿਆ | ਜਿਵੇਂ ਹੀ ਉਸ ਨੂੰ ਗੋਲੀ ਲੱਗੀ, ਸਿੱਖ ਜਵਾਨ ਨੇ ਅਪਣੀ ਪੱਗ ਉਤਾਰ ਦਿਤੀ ਅਤੇ ਇਸ ਨੂੰ ਅਪਣੇ ਸਾਥੀ ਦੇ ਜ਼ਖ਼ਮ 'ਤੇ ਬੰਨ੍ਹ ਦਿਤਾ |
ਇਸ ਘਟਨਾ ਨੂੰ ਵਿਸ਼ੇਸ਼ ਡੀਜੀਪੀ ਆਰ ਕੇ ਵਿਜ ਨੇ ਟਵੀਟ ਕੀਤਾ ਅਤੇ ਕਿਹਾ, 'ਸਿੱਖ ਜਵਾਨ ਦੀ ਭਾਵਨਾ ਨੂੰ ਮੇਰਾ ਸਲਾਮ |' ਪੁਲਿਸ ਅਧਿਕਾਰੀ ਨੇ ਦਸਿਆ ਕਿ ਨਕਸਲੀਆਂ ਦੇ ਹਮਲੇ ਵਿਚ ਜ਼ਖ਼ਮੀ ਹੋਏ ਦੋਵੇਂ ਜਵਾਨਾਂ ਨੂੰ ਹਸਪਤਾਲ ਵਿਚ ਦਾਖ਼ਲ ਕਰਵਾਇਆ ਗਿਆ ਹੈ | ਦੋਵਾਂ ਦੀ ਹਾਲਤ ਸਥਿਰ ਹੈ | ਪੁਲਿਸ ਅਧਿਕਾਰੀ ਨੇ ਇਕ ਫ਼ੋਟੋ ਵੀ ਸਾਂਝੀ ਕੀਤੀ | 
image(ਏਜੰਸੀ)
