ਪਾਕਿਸਤਾਨ 'ਚ ਜਿਨਾਹ ਦੇ ਬੁੱਤ ਤੋਂ ਐਨਕ ਚੋਰੀ
ਇਸਲਾਮਾਬਾਦ, 6 ਦਸੰਬਰ : ਪਾਕਿਸਤਾਨ ਦੇ ਸੰਸਥਾਪਕ ਕਾਇਦੇ-ਆਜ਼ਮ ਮੁਹੰਮਦ ਅਲੀ ਜਿਨਾਹ ਹੁਣ ਚੋਰਾਂ ਦਾ ਸ਼ਿਕਾਰ ਹੋ ਗਏ ਹਨ | ਆਰਥਕ ਮੰਦੀ ਨਾਲ ਜੂਝ ਰਹੇ ਪਾਕਿਸਤਾਨ 'ਚ ਚੋਰਾਂ ਨੇ ਬੁੱਤ 'ਚ ਫਿੱਟ ਕੀਤੀ ਇਕ ਲੈਂਸ ਵਾਲੀ ਐਨਕ ਨੂੰ ਚੋਰੀ ਕਰ ਲਿਆ ਹੈ |
ਇਹ ਬੁੱਤ ਪਾਕਿਸਤਾਨ ਦੇ ਪੰਜਾਬ ਸੂਬੇ ਦੇ ਵੇਹਾਰੀ ਇਲਾਕੇ 'ਚ ਲਗਾਇਆ ਗਿਆ ਹੈ | ਜਿਨਾਹ ਇਕ ਲੈਂਸ ਵਾਲੀ ਐਨਕ ਦੀ ਮਦਦ ਨਾਲ ਜ਼ਿੰਦਗੀ ਭਰ ਪੜ੍ਹਨ ਦਾ ਕੰਮ ਕਰਦੇ ਰਹੇ ਸਨ |
ਡਾਨ ਨੇ ਡਿਪਟੀ ਕਮਿਸ਼ਨਰ ਖਿਜ਼ਰ ਅਫ਼ਜ਼ਲ ਚੌਧਰੀ ਦੇ ਹਵਾਲੇ ਨਾਲ ਕਿਹਾ ਕਿ ਉਨ੍ਹਾਂ ਨੇ ਚੋਰੀ ਦੀ ਘਟਨਾ ਦੀ ਜਾਂਚ ਦੇ ਹੁਕਮ ਦੇ ਦਿਤੇ ਹਨ | ਘਟਨਾ ਸਨਿਚਰਵਾਰ ਰਾਤ ਦੀ ਹੈ | ਘਟਨਾ ਦੀ ਨਿੰਦਾ ਕਰਦੇ ਹੋਏ ਮੁੱਖ ਮੰਤਰੀ ਉਸਮਾਨ ਬੁਜ਼ਦਾਰ ਨੇ ਮੁਲਤਾਨ ਦੇ ਕਮਿਸ਼ਨਰ ਤੋਂ ਰਿਪੋਰਟ ਮੰਗੀ ਹੈ | ਦਸਿਆ ਜਾ ਰਿਹਾ ਹੈ ਕਿ ਜਿਹੜੀ ਐਨਕ ਚੋਰੀ ਹੋਈ ਹੈ, ਉਹ ਉਨ੍ਹਾਂ ਦੇ ਅਸਲੀ ਐਨਕਾਂ ਦੀ ਨਕਲ ਸੀ | ਜਿਹੜੇ ਖੇਤਰ ਵਿਚ ਇਹ ਬੁੱਤ ਸਥਾਪਤ ਕੀਤਾ ਗਿਆ ਹੈ, ਉਥੇ ਵੱਡੇ-ਵੱਡੇ ਅਫ਼ਸਰਾਂ ਦੇ ਘਰ ਹਨ ਅਤੇ ਸੁਰੱਖਿਆ ਵਿਵਸਥਾ ਮਜ਼ਬੂਤ ਬਣੀ ਰਹਿੰਦੀ ਹੈ | ਜਿਨਾਹ ਦੀਆਂ ਅਜਿਹੀਆਂ ਕਈ ਤਸਵੀਰਾਂ ਹਨ, ਜਿਨ੍ਹਾਂ 'ਚ ਉਹ ਸਿੰਗਲ ਲੈਂਸ ਵਾਲੀ ਐਨਕ ਪਾਈ ਨਜ਼ਰ ਆਏ ਹਨ | ਜਿਨਾਹ ਦਾ ਇਹ ਬੁੱਤ ਪਾਕਿਸਤਾਨ ਦੀ ਸੰਵਿਧਾਨ ਸਭਾ ਵਿਚ ਦਿਤੇ ਭਾਸ਼ਣ ਦੀ ਤਸਵੀਰ 'ਤੇ ਆਧਾਰਤ ਹੈ | ਇਸ ਭਾਸ਼ਣ ਵਿਚ ਜਿਨਾਹ ਨੇ ਘੱਟ ਗਿਣਤੀਆਂ ਨੂੰ ਉਨ੍ਹਾਂ ਦਾ ਬਣਦਾ ਹੱਕ ਦੇਣ ਦੀ ਗੱਲ ਕੀਤੀ ਸੀ | (ਏਜੰਸੀ)
