ਬੇਅਦਬੀ ਮਾਮਲੇ ਦੀ ਜਾਂਚ ਕਰ ਰਹੀ 'ਸਿੱਟ' ਡੇਰਾ ਸਿਰਸਾ ਪੁੱਜੀ, ਨਹੀਂ ਮਿਲੇ ਵਿਪਾਸਨਾ ਤੇ ਨਯਨ

ਚੰਡੀਗੜ੍ਹ, 6 ਦਸੰਬਰ (ਸਸਸ) : ਬੇਅਦਬੀ ਮਾਮਲਿਆਂ ਦੀ ਜਾਂਚ ਕਰ ਰਹੀ ਆਈ.ਜੀ.ਐਸ.ਪੀ.ਐਸ ਪਰਮਾਰ ਦੀ ਅਗਵਾਈ ਹੇਠਲੀ ਸਿੱਟ ਦੀ ਚਾਰ ਮੈਂਬਰੀ ਟੀਮ ਡੇਰਾ ਸਿਰਸਾ ਦੀ ਚੇਅਰਪਰਸਨ ਵਿਪਾਸਨਾ ਇੰਸਾਂ ਅਤੇ ਵਾਈਸ ਚੇਅਰਪਰਸਨ ਡਾ. ਪੀ.ਆਰ. ਨਯਨ ਤੋਂ ਪੁੱਛ-ਗਿੱਛ ਕਰਨ ਲਈ ਗੱਡੀਆਂ ਦੇ ਇਕ ਵੱਡੇ ਕਾਫ਼ਲੇ ਦੇ ਰੂਪ ਵਿਚ ਜਿਸ ਵਿਚ ਪੰਜਾਬ ਪੁਲਿਸ ਅਤੇ ਸਿਰਸਾ ਦੀ ਲੋਕਲ ਪੁਲਿਸ ਦੇ ਅਧਿਕਾਰੀਆਂ ਤੋਂ ਇਲਾਵਾ ਸਿਰਸਾ ਦੇ ਐੱਸ.ਪੀ ਡਾ. ਅਰਪਿਤ ਜੈਨ ਵੀ ਸ਼ਾਮਲ ਸਨ, ਅੱਜ ਡੇਰਾ ਸਿਰਸਾ ਵਿਖੇ ਪੁੱਜੀ |
ਦਸਣਯੋਗ ਹੈ ਕਿ ਬੇਅਦਬੀ ਮਾਮਲਿਆਂ ਦੀ ਚੱਲ ਰਹੀ ਜਾਂਚ ਦੌਰਾਨ ਸਿੱਟ ਵਲੋਂ ਬੀਤੇ ਦਿਨੀਂ ਰੋਹਤਕ ਦੀ ਸੁਨਾਰੀਆ ਜੇਲ ਵਿਚ ਜਾ ਕੇ ਡੇਰਾ ਮੁਖੀ ਰਾਮ ਰਹੀਮ ਪਾਸੋਂ ਪੁੱਛੇ ਗਏ ਸਵਾਲਾਂ ਤੋਂ ਬਾਅਦ ਡੇਰਾ ਸਿਰਸਾ ਦੀ ਚੇਅਰਪਰਸਨ ਅਤੇ ਵਾਈਸ ਚੇਅਰਪਰਸਨ ਨੂੰ  ਜਾਂਚ ਦਾ ਹਿੱਸਾ ਬਣਾਇਆ ਗਿਆ ਸੀ ਅਤੇ ਇਨ੍ਹਾਂ ਦੋਵਾਂ ਤੋਂ ਪੁੱਛ-ਗਿੱਛ ਕਰਨ ਲਈ ਇਨ੍ਹਾਂ ਨੂੰ  ਤਿੰਨ ਵਾਰ ਸੰਮਨ ਕਰ ਕੇ ਆਈ.ਜੀ ਪਰਮਾਰ ਦੇ ਦਫ਼ਤਰ ਲੁਧਿਆਣਾ ਵਿਖੇ ਤਲਬ ਕੀਤਾ ਗਿਆ ਸੀ ਪ੍ਰੰਤੂ ਇਨ੍ਹਾਂ ਵਲੋਂ ਮੈਡੀਕਲ ਤੌਰ 'ਤੇ
ਅਣਫਿੱਟ ਹੋਣ ਦੀ ਸੂਰਤ ਵਿਚ ਅਪਣੀ ਹਾਜ਼ਰੀ ਨਾ ਦੇਣ ਕਰ ਕੇ ਸਿੱਟ ਵਲੋਂ ਇਹ ਕਾਰਵਾਈ ਕੀਤੀ ਗਈ |
ਲਗਭਗ ਇਕ ਘੰਟੇ ਬਾਅਦ ਸਿੱਟ ਮੈਂਬਰਾਂ ਅਤੇ ਪੁਲਿਸ ਅਧਿਕਾਰੀਆਂ ਦਾ ਕਾਫ਼ਲਾ ਡੇਰਾ ਸਿਰਸਾ ਵਿਚੋਂ ਬਾਹਰ ਆਉਣ ਤੋਂ ਬਾਅਦ ਆਪੋ- ਅਪਣੇ ਖੇਤਰਾਂ ਲਈ ਰਵਾਨਾ ਹੋ ਗਿਆ ਪ੍ਰੰਤੂ ਡੇਰਾ ਸਿਰਸਾ ਦੇ ਐਡਵੋਕੇਟ ਅਨੁਸਾਰ ਚੇਅਰਪਰਸਨ ਵਿਪਾਸਨਾ ਇੰਸਾ ਲਗਭਗ ਡੇਢ ਦੋ ਸਾਲ ਤੋਂ ਮੈਡੀਕਲ ਛੁਟੀ 'ਤੇ ਹਨ ਅਤੇ ਵਾਈਸ ਚੇਅਰਪਰਸਨ ਡਾ. ਪੀ. ਆਰ. ਨਯਨ ਚਾਰ ਦਿਨ ਲਈ ਮੈਡੀਕਲ ਛੁਟੀ 'ਤੇ ਹਨ, ਇਸ ਲਈ ਸਿੱਟ ਵਲੋਂ ਇਨ੍ਹਾਂ ਦਾ ਇਲਾਜ ਕਰ ਰਹੇ ਡਾਕਟਰ ਅਤੇ ਡੇਰੇ ਨਾਲ ਸਬੰਧਤ ਹੋਰ ਪ੍ਰਬੰਧਕਾਂ ਦੇ ਬਿਆਨ ਲੈ ਲਏ ਗਏ ਜਦਕਿ ਸਿਹਤ ਪੱਖੋਂ ਠੀਕ ਨਾ ਹੋਣ ਕਾਰਣ ਉਕਤ ਦੋਵੇਂ ਪ੍ਰਬੰਧਕ ਸਿੱਟ ਦੇ ਸਨਮੁੱਖ ਨਹੀਂ ਹੋ ਸਕੇ | ਇਸ ਤੋਂ ਇਲਾਵਾ ਡੇਰਾ ਪ੍ਰਬੰਧਕਾਂ ਨੇ ਦੋਹਾਂ ਨੂੰ  ਪੇਸ਼ ਕਰਨ ਦੀ ਜ਼ਿੰਮੇਵਾਰੀ ਵੀ ਲਈ ਹੈ |