ਪ੍ਰੋ. ਜਗਤਰਾਮ ਡਾਇਰੈਕਟਰ ਵਲੋਂ ਸਮਾਜ ਸੇਵੀ ਸੰਸਥਾਵਾਂ ਅਤੇ ਪੈਰਾ ਮੈਡੀਕਲ ਸਟਾਫ਼ ਦੀ ਸ਼ਲਾਘਾ
ਪੀਜੀਆਈ ਦੇ ਡਾਇਰੈਕਟਰ ਪ੍ਰੋ. ਜਗਤਰਾਮ ਦੀ ਅਗਵਾਈ 'ਚ ਸੰਸਥਾ ਦੇ ਅੰਦਰਲੇ ਵੱਖ ਵੱਖ ਵਿਭਾਗਾਂ 'ਚ 15 ਰੋਜ਼ਾ 'ਸਵੱਛਤਾ ਮੁਹਿੰਮ' ਚਲਾਈ ਜਾ ਰਹੀ ਹੈ।
ਉਨ੍ਹਾਂ ਨੇ ਇਸ ਪ੍ਰੋਗਰਾਮ ਨੂੰ ਸਫ਼ਲ ਬਨਾਉਣ ਵਾਲੀਆਂ ਨਾਮਵਰ ਸੰਸਥਾਵਾਂ ਤੇ ਪੀਜੀਆਈ ਫੈਕਲਟੀਜ਼ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਦੇਸ਼ ਭਰ 'ਚ ਪ੍ਰਸਿੱਧ ਇਸ ਅਦਾਰੇ 'ਚ ਵੱਡੀ ਗਿਣਤੀ 'ਚ ਮਰੀਜ਼ ਇਲਾਜ ਲਈ ਰੋਜ਼ਾਨਾ ਆਉਂਦੇ ਹਨ। ਇਸ ਲਈ ਹਸਪਤਾਲ ਦੇ ਅੰਦਰੂਨੀ ਵਿਭਾਗਾਂ ਅਤੇ ਬਾਹਰੀ ਹਿੱਸਿਆਂ 'ਚ ਸਾਫ਼-ਸਫ਼ਾਈ ਹੋਣੀ ਬੇਹੱਦ ਲਾਜ਼ਮੀ ਹੈ। ਉਨ੍ਹਾਂ ਕਿਹਾ ਕਿ ਇਸ ਕਾਰਜ ਲਈ ਡਾਕਟਰੀ ਅਮਲੇ, ਮਰੀਜ਼ਾਂ ਅਤੇ ਸਫ਼ਾਈ ਕਰਮਚਾਰੀਆਂ ਦੀ ਸਾਂਝੀ ਜ਼ਿੰਮੇਵਾਰੀ ਬਣਦੀ ਹੈ ਕਿ ਰੋਗਾਂ ਤੋਂ ਬਚਣ ਲਈ ਵੱਧ ਤੋਂ ਵੱਧ ਸਾਫ਼-ਸਫ਼ਾਈ ਯਕੀਨੀ ਬਣਾਈ ਜਾਵੇ।
ਇਸ ਮੌਕੇ ਪ੍ਰੋ. ਜਗਤਰਾਮ ਨੇ ਪੀਜੀਆਈ 'ਚ 1 ਅਪ੍ਰੈਲ ਤੋਂ 15 ਅਪ੍ਰੈਲ ਤਕ ਮਨਾਏ ਜਾ ਰਹੇ 'ਸਵੱਛਤਾ ਪੰਦਰਵਾੜੇ 'ਚ ਭਾਗ ਲੈਣ ਵਾਲਿਆਂ ਨੂੰ ਸਫ਼ਾਈ ਕਿੱਟਾਂ, ਟੋਪੀਆਂ, ਟੀ ਸ਼ਰਟਾਂ ਤੇ ਸਾਬਣ ਆਦਿ ਵੀ ਵੰਡੇ, ਜਿਸ 'ਤੇ ਸਵੱਛਤਾ ਦਾ ਸੰਦੇਸ਼ ਵੀ ਲਿਖਿਆ ਹੋਇਆ ਸੀ। ਇਸ ਦੌਰਾਨ ਮੁਹਿੰਮ 'ਚ ਰੈਜੀਡੈਂਟ ਡਾਕਟਰਾਂ ਡਾ. ਵਿਪੁਨ ਕੌਸ਼ਲ ਕਾਰਜਕਾਰੀ ਮੈਡੀਕਲ ਸੁਪਰਡੈਂਟ ਅਤੇ ਜੰਮੂ ਪ੍ਰਦੇਸ਼ ਤੋਂ ਆਈ ਸਮਾਜ ਸੇਵੀ ਸੰਸਥਾ ਡੋਗਰਾ ਸਭਾ ਦੇ ਵਲੰਟੀਅਰ ਵਿਸ਼ਾਲ ਭਾਰਦਵਾਜ ਤੇ ਸਟਾਫ਼ ਨੇ ਵੀ ਵੱਧ ਚੜ੍ਹ ਕੇ ਸਫ਼ਾਈ ਮੁਹਿੰਮ 'ਚ ਹਿੱਸਾ ਲਿਆ।