ਇੰਗਲੈਂਡ 'ਚ ਮੁੜ ਵਧਿਆ ਕੋਰੋਨਾ ਦਾ ਕਹਿਰ, ਮਾਮਲਿਆਂ ਦਾ ਰਿਕਾਰਡ ਨਵੇਂ ਪੱਧਰ 'ਤੇ

ਲੰਡਨ, 7 ਅਪ੍ਰੈਲ : ਇੰਗਲੈਂਡ ਵਿਚ ਕੋਰੋਨਾ ਵਾਇਰਸ ਦੇ ਮਾਮਲੇ ਰਿਕਾਰਡ ਨਵੇਂ ਪੱਧਰ 'ਤੇ ਪਹੁੰਚ ਗਏ ਹਨ | ਪਿਛਲੇ ਮਹੀਨੇ ਕੋਵਿਡ-19 ਦਾ ਪਤਾ ਲਗਾਉਣ ਲਈ ਕੀਤੇ ਗਏ ਟੈਸਟ ਵਿਚ ਹਰ 16 ਵਿਚੋਂ ਇਕ ਵਿਅਕਤੀ, ਭਾਵ 6.37 ਫ਼ੀ ਸਦੀ ਪਾਜ਼ੇਟਿਕ ਮਿਲੇ ਹਨ | ਇਹ ਦਰ ਫ਼ਰਵਰੀ ਵਿਚ ਦਰਜ ਕੀਤੀ ਗਈ ਕੋਰੋਨਾ ਦੀ ਦਰ ਨਾਲੋਂ ਦੁਗਣੀ ਹੈ | ਫ਼ਰਵਰੀ ਵਿਚ ਟੈਸਟ ਕੀਤੇ ਗਏ ਹਰ 35 ਲੋਕਾਂ ਵਿਚ ਇਕ ਵਿਅਕਤੀ ਪਾਜ਼ੇਟਿਕ ਮਿਲਿਆ ਸੀ | ਇਹ ਜਾਣਕਾਰੀ ਇਕ ਨਵੇਂ ਅਧਿਐਨ ਤੋਂ ਸਾਹਮਣੇ ਆਈ ਹੈ |
ਯੂਕੇ ਵਿਚ ਇੰਪੀਰੀਅਲ ਕਾਲਜ ਲੰਡਨ ਦੇ ਲੰਮੇ 'ਰੀਅਲ-ਟਾਈਮ ਅਸੈਸਮੈਂਟ ਆਫ਼ ਕਮਿਊਨਿਟੀ ਟ੍ਰਾਂਸਮਿਸ਼ਨ (ਰਿਐਕਟ-1)' ਦੇ ਵਿਸ਼ਲੇਸ਼ਣ ਵਿਚ ਮਿਲਿਆ ਹੈ ਕਿ ਕੋਰੋਨਾ ਮਹਾਂਮਾਰੀ ਦੀ ਦਰ ਹਰ 30 ਦਿਨਾਂ ਵਿਚ ਦੁਗਣੀ ਹੋ ਜਾਂਦੀ ਹੈ | ਅਧਿਐਨ ਤੋਂ ਨਿਗਰਾਨੀ ਦੇ ਅੰਕੜਿਆਂ ਅਨੁਸਾਰ ਲਾਗ ਦੇ ਜ਼ਿਆਦਾਤਰ ਕੇਸ ਓਮੀਕਰੋਨ ਦੇ ਵੈਰੀਐਂਟ 2 ਸਟੀਲਥ ਵੇਰੀਐਂਟ ਤੋਂ ਸਨ |
ਜਾਰੀ ਕੀਤਾ ਗਿਆ ਅਧਿਐਨ, 8 ਤੋਂ 31 ਮਾਰਚ ਦੇ ਵਿਚਕਾਰ ਇਕੱਠੇ ਕੀਤੇ ਗਏ ਲਗਭਗ 110,000 ਲਾਰ ਦੇ ਨਮੂਨਿਆਂ 'ਤੇ ਅਧਾਰਤ ਹੈ | ਇੰਪੀਰੀਅਲ ਸਕੂਲ ਆਫ਼ ਪਬਲਿਕ ਹੈਲਥ ਦੇ ਰਿਐਕਟ ਪ੍ਰੋਗਰਾਮ ਦੇ ਨਿਰਦੇਸ਼ਕ ਪ੍ਰੋਫ਼ੈਸਰ ਪੌਲ ਇਲੀਅਟ ਨੇ ਕਿਹਾ ਕਿ ਇਹ ਰੁਝਾਨ ਚਿੰਤਾਜਨਕ ਹੈ ਜਦੋਂ ਇੰਨੀ ਵੱਡੀ ਗਿਣਤੀ ਵਿਚ ਲੋਕ ਪਾਜ਼ੇਟਿਵ ਹੋ ਰਹੇ ਹਨ,
ਇਹ ਹੋਰ ਲੋਕਾਂ ਨੂੰ  ਗੰਭੀਰ ਰੂਪ ਵਿਚ ਬਿਮਾਰ ਕਰ ਸਕਦਾ ਹੈ ਅਤੇ ਉਨ੍ਹਾਂ ਨੂੰ  ਹਸਪਤਾਲ ਜਾਣ ਦੀ ਲੋੜ ਹੈ |
ਉਨ੍ਹਾਂ ਕਿਹਾ ਕਿ ਹਾਲਾਂਕਿ ਪਾਬੰਦੀਆਂ ਖ਼ਤਮ ਹੋ ਗਈਆਂ ਹਨ, ਮੈਂ ਲੋਕਾਂ ਨੂੰ  ਅਪੀਲ ਕਰਾਂਗਾ ਕਿ ਉਹ ਦੂਜੇ ਲੋਕਾਂ ਦੀ ਸੁਰੱਖਿਆ ਲਈ ਸਾਵਧਾਨੀ ਨਾਲ ਵਿਵਹਾਰ ਕਰਨ | ਇਹ ਵਾਇਰਸ ਦੇ ਫੈਲਣ ਨੂੰ  ਘੱਟ ਕਰਨ ਵਿੱਚ ਮਦਦ ਕਰੇਗਾ | ਅਧਿਐਨ ਵਿੱਚ ਓਮੀਕਰੋਨ ਫਾਰਮਾਂ ਯੲ ਅਤੇ ਯਲ ਦੀ ਇੱਕ ਛੋਟੀ ਜਿਹੀ ਗਿਣਤੀ ਵੀ ਸਾਹਮਣੇ ਆਈ ਹੈ, ਜੋ ਕਿ ਓਮੀਕਰੋਨ ਦੇ ਮੂਲ ਵੈਰੀਐਂਟ 1 ਅਤੇ ਵੈਰੀਐਂਟ 2 ਰੂਪਾਂ ਦਾ ਮਿਸ਼ਰਣ ਹਨ | ਪਿਛਲੇ ਅੰਕੜਿਆਂ ਦੀ ਤੁਲਨਾ ਦਰਸਾਉਂਦੀ ਹੈ ਕਿ ਲਾਗ ਦੇ ਮਾਮਲੇ ਸਾਰੇ ਉਮਰ ਸਮੂਹਾਂ ਵਿਚ ਵਧੇ ਹਨ ਅਤੇ ਪ੍ਰਾਇਮਰੀ ਸਕੂਲ ਜਾਣ ਵਾਲੇ ਬੱਚਿਆਂ ਵਿਚ ਸੱਭ ਤੋਂ ਵੱਧ ਹਨ | ਪੰਜ ਤੋਂ 11 ਸਾਲ ਦੀ ਉਮਰ ਦੇ ਹਰ 10 ਵਿਚੋਂ ਇਕ ਬੱਚਾ ਸੰਕਰਮਿਤ ਪਾਇਆ ਗਿਆ ਹੈ | ਫਿਰ ਵੀ ਹਾਲੀਆ ਰੁਝਾਨਾਂ ਤੋਂ ਪਤਾ ਚਲਦਾ ਹੈ ਕਿ ਪੰਜ ਤੋਂ 54 ਸਾਲ ਦੀ ਉਮਰ ਦੇ ਵਿਚਕਾਰ ਨਵੇਂ ਲਾਗਾਂ ਦੀ ਦਰ ਘਟ ਰਹੀ ਹੈ | ਖੋਜੀਆਂ ਨੇ ਕਿਹਾ ਕਿ ਯੂਕੇ ਦੀ ਨੈਸ਼ਨਲ ਹੈਲਥ ਸਰਵਿਸ (ਐਨਐਚਐਸ) ਨੇ ਪਿਛਲੇ ਸਾਲ ਸਤੰਬਰ ਵਿਚ ਬੂਸਟਰ ਵੈਕਸੀਨ ਦਾ ਪ੍ਰਬੰਧਨ ਕਰਨਾ ਸ਼ੁਰੂ ਕੀਤਾ ਸੀ | ਬਜ਼ੁਰਗ ਲੋਕਾਂ ਦੇ ਮੁਕਾਬਲੇ ਨੌਜਵਾਨਾਂ ਨੂੰ  ਹਾਲ ਹੀ ਵਿਚ ਵੈਕਸੀਨ ਦੀ ਤੀਜੀ ਖ਼ੁਰਾਕ ਮਿਲੀ ਹੈ | (ਏਜੰਸੀ)