ਪੰਜਾਬ ਕਾਂਗਰਸ ਅੰਦਰ ਕਾਂਗਰਸ ਪਾਰਟੀ ਦੇ ਚੋਟੀ ਦੇ ਆਗੂਆਂ ਦੀ ਚੱਲ ਰਹੀ ਧੜੇਬਾਜ਼ੀ ਅਤੇ ਖ਼ਾਨਾਜੰਗੀ ਦੇ ਚਲਦਿਆਂ ਭਾਜਪਾ ਦੀ ਚੋਟੀ ਦੀ ਲੀਡਰਸ਼ਿਪ

ਗੁਰਦਾਸਪੁਰ, 7 ਅਗੱਸਤ (ਹਰਜੀਤ ਸਿੰਘ ਆਲਮ) : ਪੰਜਾਬ ਕਾਂਗਰਸ ਅੰਦਰ ਕਾਂਗਰਸ ਪਾਰਟੀ ਦੇ ਚੋਟੀ ਦੇ ਆਗੂਆਂ ਦੀ ਚੱਲ ਰਹੀ ਧੜੇਬਾਜ਼ੀ ਅਤੇ ਖ਼ਾਨਾਜੰਗੀ ਦੇ ਚਲਦਿਆਂ ਭਾਜਪਾ ਦੀ ਚੋਟੀ ਦੀ ਲੀਡਰਸ਼ਿਪ ਪੰਜਾਬ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਪ੍ਰਤਾਪ ਸਿੰਘ ਬਾਜਵਾ 'ਤੇ ਡੋਰੇ ਪਾਉਣ ਦੀਆਂ ਕੋਸ਼ਿਸ਼ਾਂ ਵਿਚ ਹੀ। ਇਥੇ ਜ਼ਿਕਰਯੋਗ ਹੈ ਕਿ ਸ. ਬਾਜਵਾ ਪੰਜਾਬ ਕਾਂਗਰਸ ਦੇ ਕਰੀਬ ਸਾਢੇ ਤਿੰਨ ਸਾਲ ਪ੍ਰਧਾਨ ਰਹਿਣ ਤੋਂ ਇਲਾਵਾ ਪੰਜਾਬ ਦੇ ਚਾਰ ਮੁਖੀ ਮੰਤਰੀਆਂ ਦੀ ਕੈਬਨਿਟ ਵਿਚ ਸੀਨੀਅਰ ਮੰਤਰੀ ਰਹੇ ਹਨ। ਸੂਬਾਈ ਪ੍ਰਧਾਨ ਸਮੇਂ ਤੋਂ ਸ. ਬਾਜਵਾ ਦਾ ਸਾਰੇ  ਪੰਜਾਬ ਦੇ ਹਲਕਿਆਂ ਅੰਦਰ ਥੋੜਾ ਜਾਂ ਵੱਧ ਪ੍ਰਭਾਵ ਅਜੇ ਵੀ ਮੌਜੂਦ ਹੈ।

ਭਾਜਪਾ ਆਗੂ ਸਮਝਦੇ ਹਨ ਕਿ ਸ. ਬਾਜਵਾ ਦਾ ਪੰਜਾਬ ਦੇ ਕਈ ਹਲਕਿਆਂ ਅੰਦਰ ਆਧਾਰ ਹੋਣ ਕਾਰਨ ਉਹ ਇਸ ਦਾ ਫ਼ਾਇਦਾ ਉਠਾ ਸਕਦੇ ਹਨ। ਉਹ ਇਹ ਵੀ ਸਮਝਦੇ ਹਨ ਕਿ ਬਾਜਵਾ ਦਾ ਪੇਂਡੂ ਹਲਕਿਆਂ ਅੰਦਾਰ ਆਧਾਰ ਹੋਣ ਦਾ ਫ਼ਾਇਦਾ ਲੈ ਸਕਦੇ ਹਨ ਅਤੇ ਸੀਨੀਅਰ ਆਗੂ ਹੋਣ ਕਾਰਨ ਬਾਜਵਾ ਦੇ ਤਜਰਬੇ ਦਾ ਲਾਹਾ ਵੀ ਲੈ ਸਕਦੇ ਹਨ। ਭਾਜਪਾ ਦੀ ਇਹ ਵੀ ਰਾਇ ਹੈ ਕਿ ਬਾਜਵਾ ਦੇ ਭਾਜਪਾ ਵਿਚ ਆਉਣ ਦੀ ਹਾਲਤ ਵਿਚ ਉਹ ਪੰਜਾਬ ਅੰਦਰ ਕਰੀਬ 70 ਹਲਕਿਆਂ ਅੰਦਰ ਸ਼ਾਨਦਾਰ ਪ੍ਰਦਰਸ਼ਨ ਦਿਖਾ ਕੇ ਪੰਜਾਬ ਅੰਦਰ ਇਕੱਲੇ ਤੌਰ 'ਤੇ ਚੋਣਾਂ ਲੜਨ ਦੇ ਸਮਰੱਥ ਹੋ ਸਕਣਗੇ।

ਰਾਜਸੀ ਹਲਕਿਆਂ ਅੰਦਰ ਇਹ ਵੀ ਚਰਚਾ ਹੈ ਕਿ ਮਾਰਚ ਮਹੀਨੇ ਜਦੋਂ ਕੇਂਦਰ ਵਲੋਂ ਬਾਜਵਾ ਦੀ ਜ਼ੈੱਡ ਸੁਰੱਖਿਆ ਵਾਪਸ ਲਈ ਗਈ ਅਤੇ ਉਸ ਸੁਰੱਖਿਆ ਦੀ ਵਾਪਸੀ ਵੀ ਭਾਜਪਾ ਨੇ ਹੀ ਬਹਾਲ ਕਰਵਾਈ ਸੀ। ਜਦੋਂ ਕਿ ਪ੍ਰਾਪਤ ਸੂਤਰਾਂ ਅਨੁਸਾਰ ਇਸ ਮਾਮਲੇ ਵਿਚ ਭਾਜਪਾ ਦੀ ਕੋਈ ਮਿਹਰਬਾਨੀ ਨਹੀਂ ਸੀ ਸਗੋਂ ਕਾਂਗਰਸ ਦੀ ਹਾਈ ਕਮਾਂਡ ਦੇ ਯਤਨਾਂ ਸਦਕਾ ਹੀ ਰਾਜ ਸਭਾ ਮੈਂਬਰ ਬਾਜਵਾ ਦੀ ਸੁਰੱਖਿਆ ਵਾਪਸ ਹੋਈ ਸੀ।  ਇਸ ਤਰ੍ਹਾਂ ਭਾਜਪਾ ਆਗੂ ਕਾਂਗਰਸ ਦੀ ਘਰ ਦੀ ਲੜਾਈ ਦਾ ਫ਼ਾਇਦਾ ਉਠਾਉਣ ਦੇ ਰੌਂਅ ਵਿਚ ਵੀ ਹਨ।