ਇਸਰੋ ਨੇ 9 ਅੰਤਰਰਾਸ਼ਟਰੀ ਸੈਟੇਲਾਈਟਾਂ ਨਾਲ ਸਫ਼ਲਤਾ ਪੂਰਵਕ ਲਾਂਚ ਕੀਤਾ ਈਓਐਸ-01
ਖੇਤੀਬਾੜੀ, ਜੰਗਲਾਤ ਅਤੇ ਆਫ਼ਤ ਪ੍ਰਬੰਧਨ 'ਚ ਮਿਲੇਗੀ
ਆਂਧਰਾ ਪ੍ਰਦੇਸ਼, 7 ਨਵੰਬਰ : ਭਾਰਤੀ ਪੁਲਾੜ ਖੋਜ ਸੰਗਠਨ (ਇਸਰੋ) ਨੇ ਪੀਐਸਐਲਵੀ-ਸੀ 49 ਲਾਂਚ ਵਾਹਨ ਤੋਂ ਧਰਤੀ ਆਬਜ਼ਰਵੇਸ਼ਨ ਸੈਟੇਲਾਈਟ (ਈਓਐਸ -01) ਨੂੰ ਸਫ਼ਲਤਾਪੂਰਵਕ ਲਾਂਚ ਕੀਤਾ ਹੈ ਅਤੇ ਨਾਲ ਹੀ ਸ਼੍ਰੀਹਰਿਕੋਟਾ ਦੇ ਸਤੀਸ਼ ਧਵਨ ਪੁਲਾੜ ਕੇਂਦਰ ਤੋਂ ਹੋਰ ਨੌਂ ਅੰਤਰਰਾਸ਼ਟਰੀ ਉਪਗ੍ਰਹਿ ਸਫ਼ਲਤਾਪੂਰਵਕ ਲਾਂਚ ਕੀਤੇ ਹਨ।
ਭਾਰਤੀ ਪੁਲਾੜ ਖੋਜ ਇੰਸਟੀਟਿਊਟ (ਇਸਰੋ) ਨੇ ਸ਼੍ਰੀਹਰਿਕੋਟਾ ਤੋਂ ਇਕੋ ਸਮੇਂ 10 ਉਪਗ੍ਰਹਿ ਲਾਂਚ ਕੀਤੇ ਹਨ। ਪੋਲਰ ਸੈਟੇਲਾਈਟ ਲਾਂਚ ਵਹੀਕਲ (ਪੀਐਸਐਲਵੀ) ਇਹ ਉਪਗ੍ਰਹਿ ਲੈ ਕੇ ਸਤੀਸ਼ ਧਵਨ ਪੁਲਾੜ ਕੇਂਦਰ ਤੋਂ ਦੁਪਹਿਰ 3.12 ਵਜੇ ਰਵਾਨਾ ਹੋਏ। ਇਨ੍ਹਾਂ 10 ਉਪਗ੍ਰਹਾਂ ਵਿਚੋਂ 9 ਕਮਰਸ਼ੀਅਲ ਉਪਗ੍ਰਹਿ ਹਨ। ਜ਼ਿਕਰਯੋਗ ਹੈ ਕਿ ਪੀਐਸਐਲਵੀ ਸੀ 49 ਮੌਸਮ ਦੀ ਅਸਫ਼ਲਤਾ ਦੇ ਕਾਰਨ ਕੁੱਝ ਮਿੰਟ ਦੇਰੀ ਨਾਲ ਲਾਂਚ ਹੋਇਆ ਸੀ। ਪੀਐਸਐਲਵੀ ਸੀ 49 ਦੀ ਸ਼ੁਰੂਆਤ
3.22 ਮਿੰਟ 'ਤੇ ਤਹਿ ਕੀਤੀ ਗਈ ਸੀ, ਪਰ ਮੌਸਮ ਦੀ ਅਸਫ਼ਲਤਾ ਦੇ ਕਾਰਨ, ਸ਼ੁਰੂਆਤ 10 ਮਿੰਟ ਲਈ ਮੁਲਤਵੀ ਕਰ ਦਿਤੀ ਗਈ ਸੀ।ਪੀਐਸਐਲਵੀ ਸੀ 49 ਨੂੰ 3 ਵੱਜ ਕੇ 12 ਮਿੰਟ 'ਤੇ ਲਾਂਚ ਕੀਤਾ ਗਿਆ ਸੀ। ਇਹ ਇਸ ਸਾਲ ਇਸਰੋ ਦਾ ਪਹਿਲਾ ਮਿਸ਼ਨ ਹੈ।
ਇਸਰੋ ਨੇ ਦਸਿਆ ਹੈ ਕਿ ਈਓਐਸ-01 ਦੀ ਸ਼ੁਰੂਆਤ ਤੋਂ ਬਾਅਦ ਸਫ਼ਲਤਾਪੂਰਵਕ ਚੌਥੇ ਪੜਾਅ 'ਚ ਪੀਐਸਐਲਵੀ ਤੋਂ ਵੱਖ ਹੋ ਗਿਆ ਅਤੇ ਅਪਣੇ ਆਪ ਨੂੰ ਅਪਣੀ ਕਲਾਸ 'ਚ ਸਥਾਪਤ ਕਰ ਲਿਆ ਹੈ। ਦੱਸ ਦੇਈਏ ਕਿ 'ਈਓਐਸ -01' ਉਪਗ੍ਰਹਿ ਧਰਤੀ ਨਿਗਰਾਨੀ ਰੀਸੈਟ ਸੈਟੇਲਾਈਟ ਹੈ। ਇਸ 'ਚ ਇਕ ਸਿੰਥੈਟਿਕ ਐਪਰਚਰ ਰੈਡਾਰ (ਐਸਏਆਰ) ਹੈ ਜੋ ਕਿ ਕਿਸੇ ਵੀ ਸਮੇਂ ਅਤੇ ਮੌਸਮ 'ਚ ਧਰਤੀ ਦੀ ਨਿਗਰਾਨੀ ਕਰਨ ਦੀ ਯੋਗਤਾ ਰਖਦਾ ਹੈ। ਮੀਡੀਆ ਮੁਤਾਬਕ ਇਹ ਵੀ ਕਿਹਾ ਜਾ ਰਿਹਾ ਹੈ ਕਿ ਇਹ ਸੈਟੇਲਾਈਟ ਭਾਰਤੀ ਸੈਨਾ ਨੂੰ ਆਪਣੀਆਂ ਸਰਹੱਦਾਂ ਦਾ ਪਤਾ ਲਗਾਉਣ 'ਚ ਵੀ ਸਹਾਇਤਾ ਕਰੇਗਾ। ਇਸਰੋ ਨੇ ਦਸਿਆ ਹੈ ਕਿ ਈਓਐਸ-01 ਇਕ ਧਰਤੀ ਨਿਰੀਖਣ ਉਪਗ੍ਰਹਿ ਹੈ ਜੋ ਖੇਤੀਬਾੜੀ, ਜੰਗਲਾਤ ਅਤੇ ਆਫ਼ਤ ਪ੍ਰਬੰਧਨ ਸਹਾਇਤਾ 'ਚ ਵਰਤਿਆ ਜਾਂਦਾ ਹੈ।
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਇਸਰੋ ਨੂੰ ਦਿਤੀ ਵਧਾਈ
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸਨਿਚਰਵਾਰ ਨੂੰ ਭਾਰਤ ਦੇ ਭੂ-ਨਿਗਰਾਨੀ ਸੈਟੇਲਾਈਟ ਈ. ਓ. ਐੱਸ-01 ਅਤੇ ਹੋਰ 9 ਸੈਟੇਲਾਈਟਾਂ ਦੇ ਸਫ਼ਲਤਾਪੂਰਵਕ ਲਾਂਚਿੰਗ ਲਈ ਭਾਰਤੀ ਪੁਲਾੜ ਖੋਜ ਸੰਗਠਨ (ਇਸਰੋ) ਅਤੇ ਦੇਸ਼ ਦੇ ਪੁਲਾੜ ਉਦਯੋਗ ਨੂੰ ਵਧਾਈ ਦਿਤੀ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਕੋਰੋਨਾ ਮਹਾਮਾਰੀ ਦੌਰਾਨ ਵਿਗਿਆਨੀਆਂ ਨੂੰ ਇਕ ਨਿਸ਼ਚਤ ਸਮੇਂ ਵਿਚ ਇਸ ਸਫ਼ਲਤਾ ਨੂੰ ਪ੍ਰਾਪਤ ਕਰਨ ਲਈ ਬਹੁਤ ਸਾਰੀਆਂ ਰੁਕਾਵਟਾਂ 'ਚੋਂ ਲੰਘਣਾ ਪਿਆ।
ਪ੍ਰਧਾਨ ਮੰਤਰੀ ਮੋਦੀ ਨੇ ਟਵੀਟ ਕੀਤਾ ਕਿ, ''ਮੈਂ ਅੱਜ ਇਸਰੋ ਅਤੇ ਭਾਰਤੀ ਪੁਲਾੜ ਉਦਯੋਗ ਨੂੰ ਪੀਐਸਐਲਵੀ-ਸੀ 49/ਈਓਐਸ -01 ਅਤੇ 9 ਹੋਰ ਸੈਟੇਲਾਈਟਾਂ ਦੇ ਸਫ਼ਲਤਾਪੂਰਵਕ ਲਾਂਚ ਕਰਨ ਲਈ ਵਧਾਈ ਦਿੰਦਾ ਹਾਂ। ਸਮੇਂ ਦੀ ਸੀਮਾ ਅੰਦਰ ਇਸ ਪ੍ਰਾਪਤੀ ਨੂੰ ਪ੍ਰਾਪਤ ਕਰਨ ਲਈ ਸਾਡੇ ਵਿਗਿਆਨੀਆਂ ਨੂੰ ਕੋਰੋਨਾ ਦੇ ਇਸ ਗੇੜ ਵਿਚ ਬਹੁਤ ਸਾਰੀਆਂ ਰੁਕਾਵਟਾਂ ਨੂੰ ਪਾਰ ਕਰਨਾ ਪਿਆ।'' ਇਕ ਹੋਰ ਟਵੀਟ ਵਿਚ ਉਨ੍ਹਾਂ ਕਿਹਾ ਕਿ ਇਨ੍ਹਾਂ 9 ਸੈਟੇਲਾਈਟਾਂ ਵਿਚ ਲਕਸਮਬਰਗ ਅਤੇ ਅਮਰੀਕਾ ਦੇ 4-4 ਅਤੇ ਲਿਥੁਆਨੀਆ ਦਾ ਇਕ ਸੈਟੇਲਾਈਟ ਸ਼ਾਮਲ ਸੀ। (ਪੀਟੀਆਈ)