image
ਸਾਂਸਦ ਔਜਲਾ ਤੇ ਬਿੱਟੂ ਠੰਢ ਵਿਚ ਹੀ ਜੰਤਰ-ਮੰਤਰ 'ਤੇ ਪੱਕੇ ਧਰਨੇ 'ਤੇ ਡਟੇ
ਚੰਡੀਗੜ੍ਹ, 8 ਦਸੰਬਰ (ਗੁਰਉਪਦੇਸ਼ ਭੁੱਲਰ): ਪੰਜਾਬ ਦੇ ਦੋ ਕਾਂਗਰਸੀ ਸਾਂਸਦ ਗੁਰਜੀਤ ਔਜਲਾ ਤੇ ਰਵਨੀਤ ਸਿੰਘ ਬਿੱਟੂ ਨਵੀਂ ਦਿੱਲੀ ਵਿਚ ਜੰਤਰ ਮੰਤਰ ਵਿਖੇ ਹੀ ਭਾਰੀ ਠੰਢ ਦੇ ਬਾਵਜੂਦ ਪੱਕੇ ਧਰਨੇ 'ਤੇ ਡੱਟ ਗਏ ਹਨ। ਜ਼ਿਕਰਯੋਗ ਹੈ ਕਿ ਬੀਤੇ ਦਿਨੀਂ ਇਹ ਧਰਨਾ ਕਿਸਾਨਾਂ ਦੇ ਸਮਰਥਨ ਵਿਚ ਸ਼ੁਰੂ ਕੀਤਾ ਗਿਆ ਸੀ। ਇਸ ਵਿਚ ਸਾਂਸਦ ਪ੍ਰਨੀਤ ਕੌਰ, ਮਨੀਸ਼ ਤਿਵਾੜੀ ਤੇ ਹਰਿਆਣਾ ਦੇ ਸਾਂਸਦ ਦਪਿੰਦਰ ਹੁੱਡਾ ਵੀ ਸ਼ਾਮਲ ਹੋਏ ਸਨ। ਪਰ ਦੋ ਸਾਂਸਦ ਤਾਂ ਅਣਮਿਥੇ ਸਮੇਂ ਲਈ ਧਰਨੇ 'ਤੇ ਬੈਠ ਚੁੱਕੇ ਹਨ। ਔਜਲਾ ਦਾ ਕਹਿਣਾ ਹੈ ਕਿ ਜੇ ਬਜ਼ੁਰਗ ਕਿਸਾਨ ਤੇ ਬੱਚੇ ਠੰਢ ਵਿਚ ਸਰਹੱਦਾਂ 'ਤੇ ਬੈਠ ਸਕਦੇ ਹਨ ਤਾਂ ਅਸੀ ਕਿਉਂ ਨਹੀਂ ਬੈਠ ਸਕਦੇ। ਉਨ੍ਹਾਂ ਐਲਾਨ ਕੀਤਾ ਕਿ ਹੁਣ ਉਹ ਧਰਨੇ ਤੋਂ ਉਦੋਂ ਹੀ ਉਠਣਗੇ ਜਦੋਂ ਕਿਸਾਨ ਸਰਹੱਦਾਂ ਤੋਂ ਕੋਈ ਹੱਲ ਨਿਕਲਣ ਬਾਅਦ ਵਾਪਸ ਪਰਤਣਗੇ। ਉਨ੍ਹਾਂ ਕਿਹਾ ਕਿ ਕਾਂਗਰਸ ਡੱਟ ਕੇ ਕਿਸਾਨਾਂ ਨਾਲ ਖੜੀ ਹੈ ਅਤੇ ਅੱਗੇ ਵੀ ਖੜੀ ਰਹੇਗੀ।
