ਨਕਲੀ ਰੇਮਡੇਸਿਵਿਰ ਦੀ ਕਾਲਾਬਾਜ਼ਾਰੀ ਦੇ ਦੋਸ਼ 'ਚ ਮਲੋਟ ਨਿਵਾਸੀ ਗਿ੍ਫ਼ਤਾਰ

ਮਲੋਟ, 9 ਜੁਲਾਈ (ਗੁਰਮੀਤ ਸਿੰਘ ਮੱਕੜ) : ਸਥਾਨਕ ਪੱਪੀ ਮਾਰਕੀਟ ਨਿਵਾਸੀ ਮਯੰਕ ਗਰਗ ਜੋ ਕਿ ਚੰਡੀਗੜ੍ਹ ਵਿਖੇ ਦਵਾਈਆਂ ਦਾ ਕਾਰੋਬਾਰ ਕਰਦਾ ਸੀ ਨੂੰ  ਮਨਾਲੀ ਤੋਂ ਪੁਲਿਸ ਨੇ ਗਿ੍ਫ਼ਤਾਰ ਕੀਤਾ ਹੈ | ਪੁਲਿਸ ਸੂਤਰਾਂ ਅਨੁਸਾਰ ਜੈਪੁਰ ਸਮੇਤ ਦੇਸ਼ ਦੇ ਵੱਖ ਵੱਖ ਸ਼ਹਿਰਾਂ ਵਿਚ ਕੋਰੋਨਾ ਕਾਲ ਦੌਰਾਨ ਰੇਮਡੇਸਿਵਿਰ ਇਨਜੈਕਸ਼ਨਾਂ ਦੀ ਕਾਲਾਬਾਜ਼ਾਰੀ ਕਰਨ ਦੇ ਮਾਮਲੇ ਵਿਚ ਮਯੰਕ ਗਰਗ ਮਾਸਟਰ ਮਾਈਡ ਸੀ | 
ਜੈਪੁਰ ਤੋਂ ਗਿ੍ਫ਼ਤਾਰ ਕਾਲਾਬਾਜ਼ਾਰੀ ਕਰਨ ਵਾਲੇ ਵਿਅਕਤੀ ਦੇ ਕਾਬੂ ਆਉਣ ਤੋਂ ਬਾਅਦ ਉਸ ਦੀ ਨਿਸ਼ਾਨਦੇਹੀ 'ਤੇ ਪੁਲਿਸ ਨੇ ਮਯੰਕ ਗਰਗ ਨੂੰ  ਗਿ੍ਫ਼ਤਾਰ ਕੀਤਾ ਹੈ | ਪੁਲਿਸ ਨੇ ਦੋਸ਼ੀ ਦੀ ਤਾਲਾਸ਼ ਵਿਚ ਪੰਜਾਬ, ਉੱਤਰ ਪ੍ਰਦੇਸ਼ ਅਤੇ ਹਿਮਾਚਲ ਪ੍ਰਦੇਸ਼ ਵਿਚ ਛਾਪੇਮਾਰੀ ਕੀਤੀ ਸੀ | ਪੁਲਿਸ ਨੂੰ  ਸੂਚਨਾ ਮਿਲੀ ਕਿ ਉਹ ਚੰਡੀਗੜ੍ਹ ਸਥਿਤ ਇਕ ਹੋਟਲ ਵਿਚ ਹੈ, ਪ੍ਰੰਤੂ ਉਹ ਪਹਿਲਾਂ ਹੀ ਹੋਟਲ ਛੱਡ ਕੇ ਫ਼ਰਾਰ ਹੋ ਗਿਆ | ਪੁਲਿਸ ਵਲੋਂ ਮਨਾਲੀ ਦੇ ਅਨੇਕਾਂ ਹੋਟਲਾਂ ਵਿਚ ਛਾਪੇਮਾਰੀ ਕੀਤੀ ਗਈ ਤਾਂ ਕਿਤੇ ਜਾ ਕੇ ਮਯੰਕ ਨੂੰ  ਗਿ੍ਫ਼ਤਾਰ ਕੀਤਾ | ਇਸ ਤੋਂ ਪਹਿਲਾਂ ਫ਼ਿਲਮ ਕਲੋਨੀ ਦੀ ਦਵਾਈ ਮਾਰਕੀਟ ਵਿਚ ਰਾਮ ਅਵਤਾਰ ਯਾਦਵ, ਸ਼ੰਕਰ ਦਿਆਲ ਸੈਣੀ, ਵਿਕਰਮ ਸਿੰਘ ਗੁੱਜਰ ਅਤੇ ਡਾ. ਜਤੇਸ਼ ਅਰੋੜਾ ਨੂੰ  ਗਿ੍ਫ਼ਤਾਰ ਕੀਤਾ | ਉਨ੍ਹਾਂ ਦੀ ਕੀਤੀ ਪੁੱਛਗਿੱਛ ਦੌਰਾਨ ਉਨ੍ਹਾਂ ਮਯੰਕ ਗਰਗ ਦਾ ਨਾਮ ਦਸਿਆ, ਜਿਸ ਤੋਂ ਬਾਅਦ ਉਹ ਫ਼ਰਾਰ ਚਲ ਰਿਹਾ ਸੀ | ਮਾਮਲਾ ਉਜਾਗਰ ਹੋਣ ਤੋਂ ਬਾਅਦ ਮਯੰਕ ਗਰਗ ਨੇ ਮੋਬਾਈਲ ਫ਼ੋਨ ਰਖਣਾ ਵੀ ਛੱਡ ਦਿਤਾ ਸੀ |
ਫੋਟੋਫਾਇਲ ਨੰ:-09ਐਮਐਲਟੀ04 
ਕੈਂਪਸ਼ਨ:-ਤਸਵੀਰ:-ਗੁਰਮੀਤ ਸਿੰਘ ਮੱਕੜ, ਮਲੋਟ |