'ਰਾਜ-ਸਮਰਥਿਤ ਅਰਾਜਕਤਾ' ਨੂੰ 'ਭਾਰਤ ਬੰਦ' ਦੇ ਰੂਪ ਵਿਚ ਕਰਾਰਾ ਜਵਾਬ : ਸ਼ਿਵ ਸੈਨਾ
ਮੁੰਬਈ, 9 ਦਸੰਬਰ : ਸ਼ਿਵ ਸੈਨਾ ਨੇ ਬੁਧਵਾਰ ਨੂੰ ਕਿਹਾ ਕਿ ਕੇਂਦਰ ਦੇ ਨਵੇਂ ਖੇਤੀ ਕਾਨੂੰਨਾਂ ਵਿਰੁਧ ਕਿਸਾਨ ਸੰਗਠਨਾਂ ਵਲੋਂ ਆਯੋਜਤ ਕੀਤਾ 'ਭਾਰਤ ਬੰਦ', 'ਸੂਬਾ ਸਮਰਥਿਤ ਅਰਾਜਕਤਾ' ਨੂੰ ਕਰਾਰ ਜਵਾਬ ਸੀ।
ਸ਼ਿਵ ਸੈਨਾ ਦੇ ਮੁੱਖ ਪੱਤਰ 'ਸਾਮਣਾ' ਦੀ ਇਕ ਸੰਪਾਦਕੀ ਵਿਚ ਦੋਸ਼ ਲਾਇਆ ਕਿ ਕੇਂਦਰ ਦੀ ਭਾਜਪਾ ਦੀ ਅਗਵਾਈ ਵਾਲੀ ਸਰਕਾਰ ਅਪਣੇ ਰਾਜਨੀਤਕ ਹਿਤਾਂ ਲਈ ਦੇਸ਼ 'ਤੇ 'ਡਰ ਅਤੇ ਦਹਿਸ਼ਤ' ਦੀ ਤਲਵਾਰ ਲਟਕਾਉਣਾ ਚਾਹੁੰਦੀ ਹੈ। ਸਾਮਨਾ ਵਿਚ ਦੋਸ਼ ਲਾਇਆ ਗਿਆ ਕਿ ਦੇਸ਼ ਵਿਚ ਅਸ਼ਾਂਤੀ
ਦਾ ਹੱਲ ਲੱਭਣ ਦੀ ਥਾਂ ਅਸੀਂ ਇਸ ਬੇਚੈਨੀ ਨੂੰ ਬਣਾਈ ਰੱਖਣਾ ਚਾਹੁੰਦੇ ਹਾਂ।
ਵੱਖ-ਵੱਖ ਕਿਸਾਨ ਯੂਨੀਅਨਾਂ ਨੇ ਨਵੇਂ ਖੇਤੀਬਾੜੀ ਕਾਨੂੰਨਾਂ ਨੂੰ ਰੱਦ ਕਰਨ ਦੀ ਮੰਗ ਕਰਦਿਆਂ ਮੰਗਲਵਾਰ ਨੂੰ 'ਭਾਰਤ ਬੰਦ' ਦਾ ਸੱਦਾ ਦਿਤਾ ਸੀ।
ਸੰਪਾਦਕੀ ਵਿਚ ਪੁਛਿਆ ਗਿਆ ਹੈ ਕਿ ਰਾਜਨੀਤਕ ਪਾਰਟੀਆਂ ਦਾ 'ਭਾਰਤ ਬੰਦ' ਦਾ ਸਮਰਥਨ ਕਰਨ ਵਿਚ ਕੀ ਗ਼ਲਤ ਸੀ। ਇਸ ਵਿਚ ਕਿਸਾਨ ਅੰਦੋਲਨ ਨੂੰ ਦੇਸ਼ ਵਿਚ ਅਰਾਜਕਤਾ ਪੈਦਾ ਕਰਨ ਦੀ ਕੋਸ਼ਿਸ਼ ਦੱਸੇ ਜਾਣ ਅਤੇ ਵਿਰੋਧ ਕਰ ਰਹੇ ਕਿਸਾਨਾਂ ਨੂੰ ਖ਼ਾਲਿਸਤਾਨੀ ਕਰਾਰ ਦੇਣ ਲਈ ਭਾਜਪਾ ਦੀ ਆਲੋਚਨਾ ਕੀਤੀ ਗਈ।
ਸੰਪਾਦਕੀ ਅਨੁਸਾਰ, ਪਛਮੀ ਬੰਗਾਲ ਵਿਚ ਭਾਜਪਾ ਜਾਤੀ ਅਤੇ ਧਰਮ ਦੇ ਆਧਾਰ ਉੱਥੇ ਧਰੂਵੀਕਰਨ ਕਰ ਰਹੀ ਹੈ, ਉਹ ਰਾਜਨੀਤਕ ਅਰਾਜਕਤਾ ਹੈ। ਖ਼ੂਨ-ਖ਼ਰਾਬੇ ਅਤੇ ਹਿੰਸਾ ਦੀਆਂ ਧਮਕੀਆਂ ਦਿਤੀਆਂ ਜਾ ਰਹੀਆਂ ਹਨ, ਇਹ ਅਰਾਜਕਤਾ ਹੈ। ਸੰਪਾਦਕੀ ਨੇ ਕਿਹਾ ਕਿ ਜੇਕਰ ਕਿਸਾਨਾਂ ਦੇ ਮਸਲਿਆਂ ਦਾ ਛੇਤੀ ਹੱਲ ਕੀਤਾ ਜਾਂਦਾ ਤਾਂ ਉਹ ਘਰ ਵਾਪਸ ਚਲੇ ਜਾਂਦੇ। (ਪੀ ਟੀਆਈ)