ਇੰਡੀਗੋ ਬਣੀ ਦੁਨੀਆਂ ਦੀ ਛੇਵੀਂ ਸੱਭ ਤੋਂ ਵੱਡੀ ਏਅਰਲਾਈਨ ਕੰਪਨੀ
ਨਵੀਂ ਦਿੱਲੀ, 10 ਅਪ੍ਰੈਲ : ਦੇਸ਼ ਦੀ ਪ੍ਰਮੁੱਖ ਏਅਰਲਾਈਨ ਕੰਪਨੀ ਇੰਡੀਗੋ ਯਾਤਰੀਆਂ ਨੂੰ ਉਨ੍ਹਾਂ ਦੇ ਟਿਕਾਣਿਆਂ ਤਕ ਪਹੁੰਚਾਉਣ ਵਾਲੀ ਦੁਨੀਆਂ ਦੀ ਛੇਵੀਂ ਸੱਭ ਤੋਂ ਵੱਡੀ ਏਅਰਲਾਈਨ ਕੰਪਨੀ ਬਣ ਗਈ ਹੈ | ਇਹ ਜਾਣਕਾਰੀ ਮਾਰਚ 2022 ਲਈ ਓਏਜੀ ਫ਼੍ਰੀਕੁਐਂਸੀ ਅਤੇ ਸਮਰਥਾ ਅੰਕੜਿਆਂ ਦੀ ਰਿਪੋਰਟ ਵਿਚ ਦਿਤੀ ਗਈ ਹੈ | ਰਿਪੋਰਟ ਦੇ ਅਨੁਸਾਰ 28 ਮਾਰਚ 2022 ਤਕ ਪ੍ਰਾਪਤ ਅੰਕੜਿਆਂ ਅਨੁਸਾਰ, ਇੰਡੀਗੋ ਨੇ 20.2 ਲੱਖ ਤੋਂ ਵੱਧ ਯਾਤਰੀਆਂ ਨੂੰ ਅਪਣੀ ਮੰਜ਼ਿਲ ਤਕ ਪਹੁੰਚਾਇਆ ਸੀ, ਜੋ ਕਿ ਏਸ਼ੀਆ ਵਿਚ ਕਿਸੇ ਵੀ ਏਅਰਲਾਈਨ ਲਈ ਸੱਭ ਤੋਂ ਵੱਧ ਹੈ |
ਓਏਜੀ ਨੇ ਇੰਡੀਗੋ ਨੂੰ ਦੁਨੀਆਂ ਦੀ ਸੱਭ ਤੋਂ ਤੇਜ਼ੀ ਨਾਲ ਵਧ ਰਹੀ ਏਅਰਲਾਈਨ ਵਜੋਂ ਸੂਚੀਬੱਧ ਕੀਤਾ ਹੈ | ਜਿਸ ਵਿਚ ਮੁਸਾਫਰਾਂ ਨੂੰ ਮੰਜ਼ਿਲ ਤਕ ਲਿਜਾਣ ਵਿਚ 41.3 ਫ਼ੀ ਸਦੀ ਦਾ ਵਾਧਾ ਹੋਇਆ ਹੈ | ਇਸ ਸਾਲ 28 ਮਾਰਚ ਤਕ ਉਪਲਬਧ ਅੰਕੜਿਆਂ ਦੇ ਆਧਾਰ 'ਤੇ, ਕੰਪਨੀ ਨੇ 20.1 ਲੱਖ ਯਾਤਰੀਆਂ ਨੂੰ ਮੰਜ਼ਿਲ ਤਕ ਪਹੁੰਚਾਇਆ ਹੈ | ਇੰਡੀਗੋ ਯਾਤਰੀਆਂ ਲਈ ਉਪਲਬਧ ਸੀਟਾਂ ਦੇ ਮਾਮਲੇ ਵਿਚ ਦੁਨੀਆਂ ਦੀਆਂ ਦਸ ਸੱਭ ਤੋਂ ਵੱਡੀਆਂ ਏਅਰਲਾਈਨਜ਼ ਵਿਚੋਂ ਇਕ ਹੈ |
ਇੰਡੀਗੋ ਦੇ ਹੋਲ ਟਾਈਮ ਡਾਇਰੈਕਟਰ ਅਤੇ ਸੀਈਓ ਰੋਨੋਜੋਏ ਦੱਤਾ ਨੇ ਕਿਹਾ, Tਇੰਡੀਗੋ ਦਾ ਦੁਨੀਆਂ ਦੀਆਂ ਸੱਭ ਤੋਂ ਵੱਡੀਆਂ ਏਅਰਲਾਈਨਜ਼ ਵਿਚੋਂ ਇਕ ਹੋਣਾ ਬਹੁਤ ਖ਼ੁਸ਼ੀ ਦੀ ਗੱਲ ਹੈ | ਇਹ ਭਾਰਤ ਲਈ ਮਾਣ ਵਾਲੀ ਗੱਲ ਹੈ ਅਤੇ ਇਸ ਖੇਤਰ ਵਿਚ ਮਹਾਂਮਾਰੀ ਤੋਂ ਬਾਅਦ ਦੇਸ਼ ਦਾ ਮਜ਼ਬੂਤ ਹੋ ਕੇ ਉਭਰਨਾ ਇਕ ਚੰਗਾ ਸੰਕੇਤ ਹੈ | ਅਸੀਂ ਦੁਨੀਆਂ ਭਰ ਵਿੱਚ ਕੋਰੋਨਾ ਪਾਬੰਦੀਆਂ ਨੂੰ ਘੱਟ ਕਰਨ ਦੇ ਨਾਲ ਨਵੇਂ ਰੂਟਾਂ 'ਤੇ ਸੇਵਾ ਪ੍ਰਦਾਨ ਕਰਨ ਅਤੇ ਉਡਾਣਾਂ ਦੀ ਗਿਣਤੀ ਵਧਾਉਣ ਲਈ ਵਚਨਬੱਧ ਹਾਂ |''
ਜ਼ਿਕਰਯੋਗ ਹੈ ਕਿ ਇੰਡੀਗੋ ਨੇ ਅਪ੍ਰੈਲ ਵਿਚ ਦੇਸ਼ ਦੇ ਵੱਖ-ਵੱਖ ਹਵਾਈ ਅੱਡਿਆਂ ਤੋਂ 150 ਤੋਂ ਵੱਧ ਅੰਤਰਰਾਸ਼ਟਰੀ ਉਡਾਣਾਂ ਦੇ ਅਨੁਸੂਚਿਤ ਸੰਚਾਲਨ ਨੂੰ ਮੁੜ ਸ਼ੁਰੂ ਕਰਨ ਦਾ ਐਲਾਨ ਕੀਤਾ ਹੈ | ਕੰਪਨੀ ਨੇ ਅਪਣੇ ਘਰੇਲੂ ਨੈੱਟਵਰਕ 'ਚ ਕਈ ਨਵੇਂ ਰੂਟਾਂ 'ਤੇ ਸੇਵਾ ਸ਼ੁਰੂ ਕੀਤੀ ਹੈ | (ਏਜੰਸੀ)
