ਮੇਰੀ ਰਾਜਨੀਤੀ ਦਾ ਇੱਕੋ ਇੱਕ ਮਕਸਦ - ਲੋਕਾਂ ਦੀ ਤਾਕਤ ਲੋਕਾਂ ਤੱਕ ਵਾਪਸ ਲੈ ਕੇ ਆਉਣਾ ਹੈ।
ਚੰਡੀਗੜ੍ਹ - ਅਮਰਗੜ੍ਹ ਤੋਂ ਕਾਂਗਰਸ ਪਾਰਟੀ ਦੇ ਉਮੀਦਵਾਰ ਸਮਿਤ ਸਿੰਘ ਮਾਨ ਨੇ ਅੱਜ ਅਮਰਗੜ੍ਹ ਹਲਕੇ ਦੇ ਵੱਖ ਵੱਖ ਪਿੰਡਾਂ ਵਿਚ ਜਾ ਕੇ ਨੁੱਕੜ ਬੈਠਕਾਂ ਕੀਤੀਆਂ। ਅੱਜ ਉਨ੍ਹਾਂ ਨੇ ਲਾਡੇਵਾਲ, ਧੀਰੋ ਮਾਜਰਾ, ਭੂਮਸੀ, ਜਲਾਲਗੜ੍ਹ, ਚੌਂਦਾ, ਬੁਰਜ ਬਘੇਲ ਸਿੰਘ ਵਾਲਾ, ਸਲਾਰ ਅਤੇ ਝੱਲ ਪਿੰਡ ਜਾ ਕੇ ਨੁੱਕੜ ਬੈਠਕਾਂ ਕੀਤੀਆਂ। ਪਿੰਡ ਧੀਰੋ ਮਾਜਰਾ ਵਿਖੇ ਲੋਕਾਂ ਨਾਲ ਵਿਚਾਰ ਸਾਂਝਾ ਕਰਦਿਆਂ ਉਨ੍ਹਾਂ ਕਿਹਾ ਪੰਜਾਬ ਦੀਆਂ ਜਿੰਨੀਆਂ ਸਮੱਸਿਆਵਾਂ ਹਨ, ਉਨ੍ਹਾਂ ਦੀ ਜੜ੍ਹ ਮਾਫ਼ੀਆ ਰਾਜ ਅਤੇ ਲੋਕਾਂ ਦੀ ਤਾਕਤ ਦਾ ਦੋ-ਚਾਰ ਕਮਰਿਆਂ ਵਿਚ ਬੰਦ ਹੋ ਜਾਣਾ ਹੈ।
ਜਿਨ੍ਹਾਂ ਚਿਰ ਕੈਪਟਨ-ਬਾਦਲ ਰਾਜ ਦੁਆਰਾ ਚੰਡੀਗੜ੍ਹ ਦੇ ਕੁੱਝ ਕਮਰਿਆਂ ਵਿਚ ਬੰਦ ਕਰ ਦਿੱਤੀਆਂ ਗਈਆਂ ਪੰਚਾਇਤਾਂ ਅਤੇ ਸਥਾਨਕ ਸਰਕਾਰਾਂ ਦੀ ਤਾਕਤ ਲੋਕਾਂ ਤੱਕ ਵਾਪਸ ਨਹੀਂ ਆਉਂਦੀ ਉਨਾ ਚਿਰ ਵਿਕਾਸ ਨਹੀਂ ਹੋ ਸਕਦਾ। ਮੇਰੀ ਰਾਜਨੀਤੀ ਦਾ ਇੱਕੋ ਇੱਕ ਮਕਸਦ ਹੈ, ਲੋਕਾਂ ਦੀ ਤਾਕਤ ਲੋਕਾਂ ਤੱਕ ਵਾਪਸ ਲੈ ਕੇ ਆਉਣਾ ਹੈ।
ਇਸ ਲਈ ਮੇਰਾ ਮੰਨਣਾ ਹੈ ਕਿ ਇਲਾਕੇ ਦੀ ਅਗਵਾਈ ਮੈਂ ਨਹੀਂ ਸਗੋ ਇਲਾਕੇ ਦੇ ਲੋਕਾਂ ਨੇ ਕਰਨੀ ਹੈ। ਉਹ ਆਪਣੇ ਪਿੰਡਾਂ ਅਤੇ ਸ਼ਹਿਰਾਂ ਵਿਚ ਜਿਸ ਤਰ੍ਹਾਂ ਦਾ ਵਿਕਾਸ ਚਾਹੁੰਦੇ ਹਨ ਉਹ ਅੱਗੇ ਲੱਗ ਕੇ ਮੈਨੂੰ ਦੱਸਣ ਅਤੇ ਇਲਾਕੇ ਦਾ ਵਿਕਾਸ ਕਰਨ ਵਿਚ ਮੇਰਾ ਮਾਰਗ ਦਰਸ਼ਨ ਕਰਨ। ਇਸ ਮੌਕੇ ਜੱਸੀ ਮੰਨਵੀ, ਪਿੰਡ ਦੇ ਸਰਪੰਚ, ਪੰਚ, ਵੱਡੀ ਗਿਣਤੀ ਵਿਚ ਪਿੰਡ ਵਾਸੀ ਮੌਜੂਦ ਸਨ।