ਗੜ੍ਹਦੀਵਾਲਾ ਪੁਲਿਸ ਨੇ ਸੱਸ ਦੇ ਬਿਆਨਾਂ 'ਤੇ ਨੂੰਹ, ਉਸ ਦੇ ਭਰਾ ਤੇ ਪਿਤਾ ਸਮੇਤ ਇਕ ਨਾਮੀ ਗੈਂਗਸਟਰ ਸਮੇਤ ਅੱਠ ਵਿਰੁਧ ਖਿਲਾਫ਼ ਘਰ ਅੰਦਰ ਦਾਖ਼ਲ ਹੋ ਕੇ

ਗੜ੍ਹਦੀਵਾਲਾ (ਹਰਪਾਲ ਸਿੰਘ): ਗੜ੍ਹਦੀਵਾਲਾ ਪੁਲਿਸ ਨੇ ਸੱਸ ਦੇ ਬਿਆਨਾਂ 'ਤੇ ਨੂੰਹ, ਉਸ ਦੇ ਭਰਾ ਤੇ ਪਿਤਾ ਸਮੇਤ ਇਕ ਨਾਮੀ ਗੈਂਗਸਟਰ ਸਮੇਤ ਅੱਠ ਵਿਰੁਧ ਖਿਲਾਫ਼ ਘਰ ਅੰਦਰ ਦਾਖ਼ਲ ਹੋ ਕੇ ਕੁੱਟਮਾਰ ਕਰਨ ਤੇ ਧਮਕੀਆਂ ਦੇਣ ਦਾ ਮਾਮਲਾ ਦਰਜ ਕੀਤਾ ਹੈ। ਇਸ ਸਬੰਧੀ ਗੜ੍ਹਦੀਵਾਲਾ ਨੇੜਲੇ ਪਿੰਡ ਭਾਨਾ ਦੀ ਵਸਨੀਕ 70 ਸਾਲਾ ਬਜ਼ੁਰਗ ਔਰਤ ਮਨਜੀਤ ਕੌਰ ਨੇ ਪੁਲਿਸ ਨੂੰ ਦਸਿਆ ਕਿ ਬੀਤੀ 7 ਅਪ੍ਰੈਲ ਨੂੰ ਉਸ ਦੀ ਧੀ ਤੇ ਜਵਾਈ ਘਰੇ ਆਏ ਹੋਏ ਸਨ। ਉਸ ਦੀ ਨੂੰਹ ਪ੍ਰਨੀਤ ਕੌਰ ਨੇ ਮਾਮੂਲੀ ਤਕਰਾਰ ਤੋਂ ਧਮਕੀ ਦਿਤੀ ਕਿ ਉਸ ਦੇ ਫ਼ਤਿਹਗੜ੍ਹ ਚੂੜੀਆਂ ਦੇ ਨਾਮੀ ਗੈਂਗਸਟਰ ਸਤਨਾਮ ਸਿੰਘ ਸੱਤੂ ਨਾਲ ਸਬੰਧ ਹਨ

ਅਤੇ ਉਹ ਸਾਰੇ ਪਰਵਾਰ ਨੂੰ ਸੱਤੂ ਰਾਹੀਂ ਮਰਵਾ ਦੇਵੇਗੀ ਅਤੇ ਜੇਲ੍ਹ ਵਿਚ ਅਪਣੇ ਪਤੀ ਨੂੰ ਵੀ ਖਤਮ ਕਰਵਾ ਦੇਵੇਗੀ। ਉਸੇ ਰਾਤ ਕਰੀਬ 9.40 ਵਜੇ ਉਨ੍ਹਾਂ ਦੇ ਘਰ ਦਾ ਗੇਟ ਜ਼ੋਰ ਨਾਲ ਖੋਲ੍ਹ ਕੇ ਉਸ ਦੀ ਨੂੰਹ, ਉਨ੍ਹਾਂ ਦੇ ਕੁੜਮ ਸਵਰਨ ਸਿੰਘ, ਉਸ ਦਾ ਲੜਕਾ ਯੋਗਰਾਜ ਸਿੰਘ, ਬਦਨਾਮ ਗੈਂਗਸਟਰ ਸਤਨਾਮ ਸਿੰਘ ਸੱਤੂ ਨੇ ਪਿਸਤੌਲ ਨਾਲ ਡਰਾ ਕੇ ਕੁੱਟਮਾਰ ਕੀਤੀ ਅਤੇ ਉਸ ਦੇ ਕਪੜੇ ਪਾੜ ਦਿਤੇ। ਜਦੋਂ ਉਸ ਦੀ ਧੀ ਤੇ ਜਵਾਈ ਛੁਡਾਉਣ ਆਏ ਤਾਂ ਉਕਤਾਂ ਨੇ ਉਸ ਦੀ ਲੜਕੀ ਤੇ ਜਵਾਈ ਦੀ ਵੀ ਕੁੱਟਮਾਰ ਕੀਤੀ ਅਤੇ ਲੜਕੀ ਦੇ ਕਪੜੇ ਵੀ ਪਾੜ ਦਿਤੇ।