ਕੇਂਦਰੀ ਜੇਲ 'ਚ ਭਿੜੀਆਂ ਹਵਾਲਾਤੀ ਤੇ ਕੈਦੀ ਔਰਤਾਂ, ਜੇਲ ਸਟਾਫ਼ ਵੀ ਕੁਟਿਆ

ਫ਼ਿਰੋਜ਼ਪੁਰ, 11 ਜੁਲਾਈ (ਸੋਨੂੰ) : ਸਥਾਨਕ ਕੇਦਰੀ ਜੇਲ ਵਿਚ ਬੀਤੇ ਦਿਨ ਮਹਿਲਾ ਕੈਦੀ ਤੇ ਹਵਾਲਾਤੀ ਔਰਤਾਂ ਦੇ ਆਪਸ 'ਚ ਭਿੜਣ 'ਤੇ ਜੇਲ ਸਟਾਫ਼ ਨਾਲ ਬਦਸਲੂਕੀ ਕੀਤੇ ਜਾਣ ਦੀ ਖ਼ਬਰ ਹੈ | ਇਸ ਦੌਰਾਨ ਹਵਾਲਾਤੀਆਂ ਦੇ ਇਕ ਧੜੇ 'ਤੇ ਜੇਲ ਸਟਾਫ਼ ਨਾਲ ਝਗੜਾ, ਗਾਲਾਂ ਕੱਢਣ, ਉਨ੍ਹਾਂ ਦੀ ਵਰਦੀ ਉਤਰਵਾਉਣ ਤੇ ਖ਼ੁਦਕੁਸ਼ੀ ਕਰਨ ਦੀਆਂ ਧਮਕੀਆਂ ਦੇਣ ਦੇ ਵੀ ਦੋਸ਼ ਲੱਗੇ ਹਨ |
  ਬਰਿੰਦਰ ਸਿੰਘ ਉਪ ਕਤਪਾਨ ਪੁਲਿਸ (ਸ਼ਹਿਰੀ) ਫ਼ਿਰੋਜ਼ਪੁਰ ਨੂੰ  ਭੇਜੇ ਇਕ ਸ਼ਿਕਾਇਤ ਪੱਤਰ ਨੰਬਰ 3663 ਰਾਹੀਂ ਬਲਵਿੰਦਰ ਕੌਰ ਸਹਾਇਕ ਸੁਪਰਡੈਂਟ ਕੇਂਦਰੀ ਜੇਲ ਫ਼ਿਰੋਜ਼ਪੁਰ ਨੇ ਦਸਿਆ ਕਿ ਹਵਾਲਾਤੀ ਔਰਤ ਜਗਜੀਤ ਕੌਰ ਪੁੱਤਰੀ ਜੱਗਾ ਸਿੰਘ ਵਾਸੀ ਸਿਆੜ ਤੇ ਹਵਾਲਾਤੀ ਔਰਤ ਮਿੰਦੋ ਬਾਈ ਪਤਨੀ ਮਲਕੀਤ ਸਿੰਘ ਵਾਸੀ ਸਵਾਹ ਵਾਲਾ ਨੇ ਬੰਦੀ ਔਰਤਾਂ ਅਤੇ ਜੇਲ ਸਟਾਫ਼ ਨਾਲ ਲੜਾਈ ਝਗੜਾ ਤੇ ਗਾਲਾਂ ਕੱਢੀਆਂ ਤੇ ਮੁਲਾਜ਼ਮਾਂ ਨਾਲ ਕੁੱਟਮਾਰ ਕੀਤੀ | ਸਹਾਇਕ ਸੁਪਰਡੈਂਟ ਨੇ ਦਸਿਆ ਕਿ ਉਕਤ ਹਵਾਲਾਤੀ ਔਰਤਾਂ ਨੇ ਜੇਲ ਸੁਪਰਡੈਂਟ ਵਿਰੁਧ ਜਾਤੀ ਸੂਚਕ ਸ਼ਬਦ ਬੋਲੇ, ਜੇਲ ਸਟਾਫ਼ ਨੂੰ  ਵਰਦੀ ਉਤਰਵਾਉਣ ਦੀਆਂ ਧਮਕੀਆਂ ਅਤੇ ਔਰਤ ਮੁਲਾਜ਼ਮਾਂ ਦੀਆਂ ਵਰਦੀਆਂ ਪਾੜਣ ਦੀਆਂ ਧਮਕੀਆਂ ਦੇ ਕੇ ਉਨ੍ਹਾਂ ਦੀ ਡਿਊਟੀ ਵਿਚ ਵਿਘਨ ਪਾਉਂਦਿਆਂ ਖ਼ੁਦਕੁਸ਼ੀ ਕਰਨ ਦੀਆਂ ਧਮਕੀਆਂ ਦੇ ਕੇ ਜੇਲ ਦੇ ਮਾਹੌਲ ਨੂੰ  ਖ਼ਰਾਬ ਕੀਤਾ ਹੈ | ਬਰਿੰਦਰ ਸਿੰਘ ਉਪ ਕਪਤਾਨ (ਸ਼ਹਿਰੀ) ਫ਼ਿਰੋਜ਼ਪੁਰ ਨੇ ਦਸਿਆ ਕਿ ਪੁਲਿਸ ਵਲੋਂ ਇਨ੍ਹਾਂ ਹਵਾਲਾਤੀ ਔਰਤਾਂ ਵਿਰੁਧ ਮੁਕੱਦਮਾ ਦਰਜ ਕਰ ਕੇ ਅਗਲੀ ਕਾਰਵਾਈ ਕੀਤੀ ਜਾ ਰਹੀ ਹੈ |