ਨਾ ਹੀ ਵਿਭਾਗ ਵਲੋਂ ਇਸ ਤਰ੍ਹਾਂ ਦਾ ਕੋਈ ਆਦੇਸ਼ ਜਾਂ ਪੱਤਰ ਜਾਰੀ ਕੀਤਾ ਗਿਆ ਹੈ
ਫਰੀਦਕੋਟ: ਸੀਬੀਆਈ ਨੇ ਸਕੂਲ ਸਿੱਖਿਆ ਵਿਭਾਗ ਨੂੰ ਪੱਤਰ ਜਾਰੀ ਕੀਤਾ ਹੈ। ਇਸ ਵਿਚ ਉਹਨਾਂ ਨੇ ਵਿਦਿਆਰਥਣਾਂ ਨੂੰ ਅਗਵਾ ਕਰਨ ਵਾਲੇ ਅਧਿਆਪਕ ਬਾਰੇ ਆਗਾਹ ਕੀਤਾ ਹੈ। ਸੀਰੀਅਲ ਕਿਡਨੈਪਰ ਅੰਗਰੇਜ਼ੀ ਦਾ ਅਧਿਆਪਕ ਹੈ ਤੇ ਉਹ ਫਰਜ਼ੀ ਨਾਂ ਤੇ ਪਤਾ ਦੇ ਕੇ ਰਹਿੰਦਾ ਹੈ। ਮੁਲਜ਼ਮ ਕਈ ਵਿਦਿਆਰਥਣਾਂ ਦੇ ਅਗਵਾ ਮਾਮਲੇ 'ਚ ਭਗੌੜਾ ਹੈ। ਉਹ ਪਹਿਲਾਂ ਮਾਨਸਾ ਤੇ ਕਪੂਰਥਲਾ ਦੇ ਨਿੱਜੀ ਸਕੂਲਾਂ 'ਚ ਕੰਮ ਕਰ ਚੁੱਕਾ ਹੈ।
ਸੀਬੀਆਈ ਨੇ ਖਦਸ਼ਾ ਪ੍ਰਗਟਾਇਆ ਕਿ ਉਹ ਹਾਲੇ ਵੀ ਪੰਜਾਬ ਦੇ ਕਿਸੇ ਸਕੂਲ 'ਚ ਕੰਮ ਕਰਦਾ ਹੋ ਸਕਦਾ ਹੈ। ਧਵਲ ਹਰੀਸ਼ਚੰਦਰ ਤ੍ਰਿਵੇਦੀ ਨਾਂ ਦੇ ਮੁਲਜ਼ਮ ਦੇ ਖਿਲਾਫ਼ ਗੁਜਰਾਤ ਹਾਈ ਕੋਰਟ ਦੇ ਆਦੇਸ਼ 'ਤੇ ਸੀਬੀਆਈ ਜਾਂਚ ਚੱਲ ਰਹੀ ਹੈ। ਗੁਜਰਾਤ ਹਾਈ ਕੋਰਟ 'ਚ ਇਕ ਵਿਅਕਤੀ ਨੇ ਪਟੀਸ਼ਨ ਦਾਇਰ ਕਰ ਕੇ ਆਪਣੀ ਨਾਬਾਲਿਗ ਬੇਟੀ ਦੇ ਅਗਵਾ ਮਾਮਲੇ ਦੀ ਸੀਬੀਆਈ ਜਾਂਚ ਕਰਾਉਣ ਦੀ ਮੰਗ ਕੀਤੀ ਸੀ, ਜਿਸਦਾ ਤ੍ਰਿਵੇਦੀ ਨੇ 11 ਅਗਸਤ 2018 ਨੂੰ ਅਗਵਾ ਕਰ ਲਿਆ ਸੀ।
ਇਸ ਮਾਮਲੇ 'ਚ ਗੁਜਰਾਤ ਦੇ ਰਾਜਕੋਟ ਦੀ ਇਕ ਅਦਾਲਤ ਨੇ ਉਸਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਸੀ। ਪਿਛਲੇ ਸਾਲ 28 ਜੁਲਾਈ ਨੂੰ ਪੈਰੋਲ 'ਤੇ ਜੇਲ੍ਹ ਤੋਂ ਬਾਹਰ ਆਉਣ ਦੇ ਬਾਅਦ ਮੁਲਜ਼ਮ ਇਕ ਹੋਰ ਨਾਬਾਲਿਗ ਲੜਕੀ ਨੂੰ ਗੁਮਰਾਹ ਕਰ ਕੇ ਭਜਾ ਕੇ ਲੈ ਗਿਆ। ਇਸ ਤੋਂ ਪਹਿਲਾਂ ਤ੍ਰਿਵੇਦੀ ਨੂੰ ਪੰਜਾਬ ਤੋਂ ਹੀ 14 ਜੁਲਾਈ 2014 ਨੂੰ ਦੋ ਨਾਬਾਲਿਗ ਲੜਕੀਆਂ ਦੇ ਅਗਵਾ ਤੇ ਜਬਰ ਜਨਾਹ ਦੇ ਦੋਸ਼ 'ਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ।
ਸੀਬੀਆਈ ਜਾਂਚ 'ਚ ਪਾਇਆ ਗਿਆ ਕਿ ਧਵਲ ਤ੍ਰਿਵੇਦੀ ਪਹਿਲਾਂ ਵੀ ਨਾਬਾਲਿਗ ਲੜਕੀਆਂ ਦੇ ਅਗਵਾ ਦੇ ਸੱਤ ਮਾਮਲਿਆਂ 'ਚ ਸ਼ਾਮਲ ਰਿਹਾ ਹੈ। ਇਨ੍ਹਾਂ 'ਚੋਂ ਇਕ ਮਾਮਲੇ 'ਚ ਉਸਨੂੰ ਸਜ਼ਾ ਵੀ ਹੋ ਚੁੱਕੀ ਹੈ। ਉੱਧਰ, ਸੀਬੀਆਈ ਦੇ ਇਕ ਪੱਤਰ ਬਾਰੇ ਜ਼ਿਲ੍ਹਾ ਸਿੱਖਿਆ ਅਧਿਕਾਰੀ ਬਲਜੀਤ ਕੌਰ ਨੇ ਮਾਮਲੇ ਦੀ ਜਾਣਕਾਰੀ ਨਾ ਹੋਣ ਬਾਰੇ ਕਿਹਾ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਅਜਿਹੇ ਕਿਸੇ ਪੱਤਰ ਦੀ ਕੋਈ ਜਾਣਕਾਰੀ ਤੇ ਸੂਚਨਾ ਨਹੀਂ ਹੈ।
ਨਾ ਹੀ ਵਿਭਾਗ ਵਲੋਂ ਇਸ ਤਰ੍ਹਾਂ ਦਾ ਕੋਈ ਆਦੇਸ਼ ਜਾਂ ਪੱਤਰ ਜਾਰੀ ਕੀਤਾ ਗਿਆ ਹੈ। ਵਿਭਾਗ ਵੱਲੋਂ ਸਕੂਲਾਂ ਨੂੰ ਅਜਿਹੀ ਕੋਈ ਐਡਵਾਇਜ਼ਰੀ ਜਾਰੀ ਨਹੀਂ ਕੀਤੀ ਗਈ। ਸੀਬੀਆਈ ਨੇ ਆਪਣੇ ਪੱਤਰ 'ਚ ਕਿਹਾ ਹੈ ਕਿ ਧਵਲ ਸ਼ਾਤਰ ਕਿਸਮ ਦਾ ਅਪਰਾਧੀ ਹੈ। ਉਹ ਫਰਜ਼ੀ ਨਾਂ ਤੇ ਪਤੇ ਨਾਲ ਵੱਖ-ਵੱਖ ਸੂਬਿਆਂ ਦੇ ਸਕੂਲਾਂ 'ਚ ਅੰਗਰੇਜ਼ੀ ਵਿਸ਼ੇ ਦੇ ਅਧਿਆਪਕ, ਪ੍ਰਿੰਸੀਪਲ, ਵਾਈਸ ਪ੍ਰਿੰਸੀਪਲ ਜਾਂ ਮੈਨੇਜਰ ਦੇ ਤੌਰ 'ਤੇ ਕੰਮ ਕਰਦਾ ਹੈ।
ਉਹ ਸਕੂਲ 'ਚ ਪੜ੍ਹਦੀਆਂ ਨਾਬਾਲਿਗ ਲੜਕੀਆਂ ਨੂੰ ਆਪਣਾ ਸ਼ਿਕਾਰ ਬਣਾਉਂਦਾ ਹੈ। ਇਸ ਤੋਂ ਪਹਿਲਾਂ ਉਹ ਟੀਡੀਕੇ ਚੰਦਰ, ਟੇਕੇਡੀ ਚੰਦਰ, ਡੀ ਕੁਮਾਰ ਤੇ ਧਰਮਿੰਦਰ ਕੁਮਾਰ ਆਦਿ ਫਰਜ਼ੀ ਨਾਵਾਂ ਦਾ ਇਸਤੇਮਾਲ ਕਰ ਚੁੱਕਾ ਹੈ। ਉਸਨੇ ਹਰਿਆਣਾ ਦੇ ਕਾਲਕਾ, ਪੰਚਕੁਲਾ 'ਚ ਇਕ ਫਰਜ਼ੀ ਵੋਟਰ ਪਛਾਣ ਪੱਤਰ ਤੇ ਰਾਸ਼ਨ ਕਾਰਡ ਵੀ ਬਣਵਾਇਆ ਸੀ, ਜਿਸਦੇ ਆਧਾਰ 'ਤੇ ਉਸ ਨੇ ਮਾਨਸਾ ਦੇ ਬੁਢਲਾਡਾ ਸਥਿਤ ਇਕ ਨਿੱਜੀ ਸਕੂਲ 'ਚ ਨੌਕਰੀ ਕੀਤੀ ਸੀ।
ਸਿੱਖਿਆ ਵਿਭਾਗ ਨੇ ਅਧਿਆਪਕ ਬਣ ਕੇ ਵਿਦਿਆਰਥੀਆਂ ਨੂੰ ਅਗਵਾ ਕਰਨ ਵਾਲੇ ਧਵਲ ਤ੍ਰਿਵੇਦੀ ਦੀ ਫੋਟੋ ਸੂਬੇ ਦੇ ਸਾਰੇ ਨਿੱਜੀ ਤੇ ਸਰਕਾਰੀ ਸਕੂਲਾਂ 'ਚ ਭੇਜਣ ਦੇ ਹੁਕਮ ਜਾਰੀ ਕੀਤੇ ਹਨ। ਗੁਜਰਾਤ 'ਚ 11 ਅਗਸਤ, 2019 ਨੂੰ ਨਿਧੀ ਖੱਖਰ ਦੀ ਕੁੜੀ ਨੂੰ ਅਗਵਾ ਕਰਨ ਦੇ ਮਾਮਲੇ 'ਚ ਸੀਬੀਆਈ ਵੱਲੋਂ ਲੋੜੀਂਦੇ ਧਵਲ ਤ੍ਰਿਵੇਦੀ ਸਬੰਧੀ ਭੇਜੀ ਗਈ ਇਕ ਚਿੱਠੀ 'ਤੇ ਕਾਰਵਾਈ ਕਰਦਿਆਂ ਸਿੱਖਿਆ ਵਿਭਾਗ ਨੇ ਧਵਲ ਤ੍ਰਿਵੇਦੀ ਨਾਲ ਅਗਵਾ ਕੀਤੀ ਗਈ ਕੁੜੀ ਨਿਧੀ ਦੀ ਫੋਟੋ ਵੀ ਸਾਰੇ ਨਿੱਜੀ ਤੇ ਸਰਕਾਰੀ ਸਕੂਲਾਂ 'ਚ ਭੇਜਣ ਦੀ ਹਦਾਇਤ ਦਿੱਤੀ ਹੈ।
ਜਾਂਚ 'ਚ ਸਾਹਮਣੇ ਆਇਆ ਹੈ ਕਿ ਧਵਲ, ਨਾਂ ਬਦਲ ਕੇ ਕਿਸੇ ਸਕੂਲ 'ਚ ਅੰਗਰੇਜ਼ੀ ਦਾ ਅਧਿਆਪਕ ਬਣ ਜਾਂਦਾ ਹੈ ਤੇ ਉਥੋਂ ਕਿਸੇ ਔਰਤ ਜਾਂ ਨਾਬਾਲਗ ਵਿਦਿਆਰਥੀ ਨੂੰ ਅਗਵਾ ਕਰ ਲੈਂਦਾ ਹੈ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।