ਇਸਰੋ 28 ਫ਼ਰਵਰੀ ਨੂੰ ਬ੍ਰਾਜ਼ੀਲ ਦਾ ਸੈਟੇਲਾਈਟ ਕਰੇਗਾ ਲਾਂਚ
ਬੈਂਗਲੁਰੂ, 12 ਫ਼ਰਵਰੀ : ਭਾਰਤੀ ਪੁਲਾੜ ਖੋਜ ਸੰਗਠਨ (ਇਸਰੋ) ਪੀ.ਐਸ.ਐਲ.ਵੀ. ਦਾ ਪ੍ਰਮੁੱਖ ਲਾਂਚਰ 28 ਫ਼ਰਵਰੀ ਨੂੰ ਸ਼੍ਰੀਹਰਿਕੋਟਾ ਦੇ ਸਤੀਸ਼ ਧਵਨ ਸਪੇਸ ਸੈਂਟਰ ਤੋਂ ਬ੍ਰਾਜ਼ੀਲ ਦੇ ਅਮੇਜੋਨੀਆ-1 ਅਤੇ 20 ਹੋਰ ਸੈਟੇਲਾਈਟਾਂ ਲਾਂਚ ਕਰੇਗਾ |
ਇਸਰੋ ਪੀ.ਐਸ.ਐਲ.ਵੀ-ਸੀ51 ਦਾ ਇਹ 53ਵਾਂ ਮਿਸ਼ਨ ਹੋਵੇਗਾ ਅਤੇ ਇਸ ਵਿਚ ਪਹਿਲੀ ਵਾਰ ਬ੍ਰਾਜ਼ੀਲ ਦੇ ਅਮੇਜੋਨੀਆ-1 ਨੂੰ ਤਰਜੀਹੀ ਸੈਟੇਲਾਈਟ ਦੇ ਰੂਪ ਵਿਚ ਅਤੇ 20 ਸਹਿ-ਯਾਤਰੀ ਸੈਟੇਲਾਈਟਾਂ ਨੂੰ ਸ਼੍ਰੀਹਰਿਕੋਟਾ ਦੇ ਸਤੀਸ਼ ਧਵਨ ਸਪੇਸ ਸੈਂਟਰ ਤੋਂ ਲਾਂਚ ਕੀਤਾ ਜਾਵੇਗਾ |
ਇਸਰੋ ਦੇ ਸੂਤਰਾ ਮੁਤਾਬਕ 28 ਫ਼ਰਵਰੀ ਨੂੰ ਮੌਸਮ ਦੀ ਸਥਿਤੀ ਮੁਤਾਬਕ ਅਸਥਾਈ ਰੂਪ ਨਾਲ ਲਾਂਚ ਦਾ ਸਮਾਂ ਸਵੇਰੇ 10:23 ਵਜੇ ਨਿਰਧਾਰਤ ਹੈ | ਪੀ.ਐਸ.ਐਲ.ਵੀ.-ਸੀ51 ਅਮੇਜੋਨੀਆ-1 ਸੂਬੇ ਦੀ ਮਲਕੀਅਤ ਵਾਲੇ ਨਿਊਸਪੇਸ ਇੰਡੀਆ ਲਿਮਿਟਡ (ਐਨ.ਐਸ.ਆਈ.ਐਲ.) ਦਾ ਪਹਿਲਾ ਸਮਰਪਿਤ ਵਪਾਰਕ ਮਿਸ਼ਨ ਹੈ ਜੋ ਪੁਲਾੜ ਵਿਭਾਗ ਦੀ ਵਪਾਰਕ ਸ਼ਾਖਾ ਹੈ | ਐਨ.ਐਸ.ਆਈ.ਐਲ. ਸਪੇਸਫਲਾਈਟ ਅਮਰੀਕਾ ਦੇ ਨਾਲ ਇਕ ਵਪਾਰਕ ਪ੍ਰਬੰਧ ਤਹਿਤ ਇਸ ਮਿਸ਼ਨ ਨੂੰ ਲਾਂਚ ਕਰ ਰਿਹਾ ਹੈ | ਜਾਣਕਾਰੀ ਮੁਤਾਬਕ ਅਮੇਜੋਨੀਆ-1 ਰਾਸ਼ਟਰੀ ਪੁਲਾੜ ਖੋਜ ਸੰਸਥਾ (ਆਈ.ਐਨ.ਪੀ.ਈ.) ਦਾ ਆਪਟੀਕਲ ਪਿ੍ਥਵੀ ਓਬਜ਼ਰਵੇਸ਼ਨ ਸੈਟੇਲਾਈਟ ਹੈ | ਇਹ ਸੈਟੇਲਾਈਟ ਅਮੇਜਨ ਖੇਤਰ ਵਿਚ ਜੰਗਲਾਂ ਦੀ ਕਟਾਈ ਦੀ ਨਿਗਰਾਨੀ ਅਤੇ ਬ੍ਰਾਜ਼ੀਲ ਵਿਚ ਵੰਨ-ਸੁਵੰਨੇ ਖੇਤੀਬਾੜੀ ਦੇ ਵਿਸ਼ਲੇਸ਼ਣ ਲਈ ਉਪਯੋਗ ਕਰਤਾਵਾਂ ਨੂੰ ਰਿਮੋਟ ਸੈਂਸਿੰਗ ਡਾਟਾ ਪ੍ਰਦਾਨ ਕਰਕੇ ਮੌਜੂਦਾ ਸੰਰਚਨਾ ਨੂੰ ਹੋਰ ਮਜ਼ਬੂਤ ਕਰੇਗਾ | (ਏਜੰਸੀ)
