ਤਾਲਮੇਲ ਕਮੇਟੀ ਤੇ ਪ੍ਰਚਾਰ ਕਮੇਟੀ ਦਾ ਗਠਨ ਛੇਤੀ
ਚੰਡੀਗੜ੍ਹ (ਜੀ.ਸੀ. ਭਾਰਦਵਾਜ): ਪਿਛਲੇ ਮਹੀਨੇ 23 ਜੁਲਾਈ ਨੂੰ ਬਤੌਰ ਕਾਂਗਰਸ ਪ੍ਰਧਾਨ ਦਾ ਚਾਰਜ ਸੰਭਾਲ ਚੁੱਕੇ ਨਵਜੋਤ ਸਿੰਘ ਸਿੱਧੂ ਨੇ ਇਨ੍ਹਾਂ 20 ਦਿਨਾਂ ਵਿਚ ਵੀ ਰੋਜ਼ਾਨਾ ਟਵਿੱਟਰਾਂ ਰਾਹੀਂ ਅਪਣੀ ਪਾਰਟੀ ਦੀ ਹੀ ਸਰਕਾਰ ਵਿਰੁਧ ਸਵਾਲ ਚੁੱਕੇ ਹਨ ਜਿਸ ਤੋਂ ਖ਼ਫ਼ਾ ਹੋ ਕੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਹਾਈ ਕਮਾਂਡ ਦੀ ਕੰਟਰੋਲਰ ਸੋਨੀਆ ਗਾਂਧੀ ਕੋਲ ਇਸ ਖ਼ਰਾਬ ਹੋਏ ਮਾਹੌਲ ਦਾ ਚੋਣਾਂ ’ਤੇ ਪੈਣ ਵਾਲੇ ਮਾੜੇ ਅਸਰ ਦਾ ਵੇਰਵਾ ਦਿਤਾ ਹੈ।
Navjot Sidhu and Captain Amarinder Singh
ਪੰਜਾਬ ਦੇ ਇਕ ਸੀਨੀਅਰ ਨੇਤਾ ਨੇ ਰੋਜ਼ਾਨਾ ਸਪੋਕਸਮੈਨ ਨੂੰ ਦਸਿਆ ਕਿ ਸਿੱਧੂ ਦੇ ਇਸ ਹੋਸ਼ੇਪਣ ਅਤੇ ਬੇਤੁਕੀਆਂ ਨੁਕਸਾਨਦੇਹ ਬਿਆਨਾਂ ਨਾਲ ਸੱਤਾਧਾਰੀ ਪਾਰਟੀ ਦਾ ਅਕਸ ਖ਼ਰਾਬ ਹੋ ਰਿਹਾ ਹੈ ਜਿਸ ਨਾਲ ਕਾਂਗਰਸ ਵਿਚ ਦੋ ਗੁੱਟ ਪੈਦਾ ਹੋਣ ਦੇ ਅਸਾਰ ਬਣ ਰਹੇ ਹਨ। ਇਸ ਪਾਰਟੀ ਦੇ ਇਸ ਸਿਰਕੱਢ ਨੇਤਾ ਨੇ ਦਸਿਆ ਕਿ ਹਾਈਕਮਾਂਡ ਦੇ ਨਿਰਦੇਸ਼ਾਂ ’ਤੇ ਪੰਜਾਬ ਇੰਚਾਰਜ ਹਰੀਸ਼ ਰਾਵਤ, ਸੰਭਾਵੀ ਤੌਰ ’ਤੇ ਐਤਵਾਰ 15 ਅਗੱਸਤ ਤੋਂ ਇਕ ਦੋ ਦਿਨ ਮਗਰੋਂ ਇਥੇ ਪਹੁੰਚ ਰਹੇ ਹਨ।
Harish Rawat and Navjot Sidhu
ਹਰੀਸ਼ ਰਾਵਤ ਦਾ ਮੁੱਖ ਮੰਤਵ ਆਉਂਦੀਆਂ ਚੋਣਾਂ ਵਿਚ ਪਾਰਟੀ ਨੂੰ ਮਜ਼ਬੂਤੀ ਪ੍ਰਦਾਨ ਕਰ ਕੇ ਜਿੱਤ ਦਾ ਸੁਆਦ ਲਗਾਤਾਰ ਦੂਜੀ ਵਾਰ ਦੇਣ ਦਾ ਵਾਅਦਾ ਸਿਰੇ ਚੜ੍ਹਾਉਣਾ ਹੈ। ਹਰੀਸ਼ ਰਾਵਤ ਅਪਣੀ ਸੂਝ ਬੂਝ ਅਤੇ ਤਜਰਬੇ ਨਾਲ ਸਿੱਧੂ ਤੇ ਕੈਪਟਨ ਪੱਖੀ ਦੋਹਾਂ ਖ਼ੇਮਿਆਂ ਵਿਚੋਂ ਚੁਣ ਕੇ ਤਿੰਨ ਤਿੰਨ ਜਾਂ ਚਾਰ ਚਾਰ ਮੈਂਬਰੀ, ਕੋਆਰਡੀਨੇਸ਼ਨ ਯਾਨੀ ਤਾਲਮੇਲ ਅਤੇ ਚੋਣ ਪ੍ਰਚਾਰ ਕਮੇਟੀਆਂ ਸਥਾਪਤ ਕਰਨ ਦੇ ਹੱਕ ਵਿਚ ਹਨ।
Harish Rawat
ਇਨ੍ਹਾਂ ਪੈਨਲਾਂ ਵਿਚ ਹਰ ਵਰਗ ਤੇ ਤਜਰਬੇਕਾਰ ਮੈਂਬਰ ਪਾਏ ਜਾਣਗੇ ਜੋ ਆਉਂਦੀਆਂ ਚੋਣਾਂ ਵਿਚ ਪੁਖ਼ਤਾ ਸਲਾਹ ਦੇਣਗੇ ਅਤੇ ਦੋਵੇਂ ਪਾਸਿਉਂ ਆਪਸੀ ਉਲਝਣ ਤੋਂ ਛੁਟਕਾਰਾ ਦਿਵਾਉਣਗੇ। ਪੰਜਾਬ ਕਾਂਗਰਸ ਦੇ ਵਜ਼ੀਰਾਂ, ਸੀਨੀਅਰ ਵਿਧਾਇਕਾਂ ਅਤੇ ਨੌਜਵਾਨ ਨੇਤਾਵਾਂ ਤੇ ਸੰਭਾਵੀ ਉਮੀਦਵਾਰਾਂ ਵਿਚ ਅੱਜਕਲ ਮਾਝਾ, ਮਾਲਵਾ ਤੇ ਦੋਆਬਾ ਹਲਕਿਆਂ ਵਿਚ ਆਮ ਚਰਚਾ ਹੈ ਕਿ ਨਵਜੋਤ ਸਿੱਧੂ ਦੇ ਪ੍ਰਧਾਨ ਬਣਨ ਨਾਲ ਕੈਪਟਨ ਸੋਚ ਅਤੇ ਕੰਮ ਕਰਨ ਦੇ ਸਟਾਈਲ ਨੂੰ ਢਾਹ ਜ਼ਰੂਰ ਲੱਗੀ ਹੈ ਪਰ ਕਾਂਗਰਸ ਵਿਚ ਹਲਚਲ ਪੈਦਾ ਕਰ ਕੇ ਸਿੱਧੂ ਨੇ ਨਵੀਂ ਰੂਹ ਜ਼ਰੂਰ ਪੈਦਾ ਕੀਤੀ ਹੈ।
Navjot Sidhu and Sunil Kumar
ਕੁੱਝ ਸੁਲਝੇ ਕਾਂਗਰਸੀ ਨੇਤਾਵਾਂ ਦਾ ਕਹਿਣਾ ਹੈ ਕਿ ਇਹ ਜਿੱਤ ਵਲ ਵੱਧ ਰਿਹਾ ਮਾਹੌਲ ਨਵਜੋਤ ਸਿੰਘ ਸਿੱਧੂ ਜੇ ਬਰਕਰਾਰ ਅਗਲੇ 2 ਮਹੀਨੇ ਹੋਰ ਰੱਖ ਸਕੇ ਅਤੇ ਮੁੱਖ ਮੰਤਰੀ ਦੀ ਆਲੋਚਨਾ ਕਰਨੀ ਬੰਦ ਕਰ ਦੇਵੇ ਤਾਂ ਜ਼ਰੂਰ ਚੋਣ ਨਤੀਜੇ ਕਾਂਗਰਸ ਦੇ ਪੱਖ ਵਿਚ ਜਾਣਗੇ। ਦੂਜੇ ਪਾਸੇ ਵਿਰੋਧੀ ਧਿਰਾਂ ਅਕਾਲੀ ਦਲ, ਬਹੁਜਨ ਸਮਾਜ ਪਾਰਟੀ ਗਠਜੋੜ, ਆਪ, ਬੀਜੇਪੀ ਤੇ ਕਿਸਾਨ ਮੋਰਚਾ ਆਪੋ ਅਪਣੀ ਕੋਸ਼ਿਸ਼ ਵਿਚ ਹਨ ਕਿ ਵੱਧ ਤੋਂ ਵੱਧ ਢਾਹ ਸੱਤਾਧਾਰੀ ਧਿਰ ਨੂੰ ਲਗਾਈ ਜਾਵੇ। ਕਾਂਗਰਸ ਹਾਈਕਮਾਂਡ ਦੇ ਸੂਤਰਾਂ ਤੋਂ ਇਸ਼ਾਰਾ ਮਿਲਿਆ ਹੈ ਕਿ ਹਰੀਸ਼ ਰਾਵਤ, ਪੰਜਾਬ ਦੀ ਉਲਝਣ ਨੂੰ ਛੇਤੀ ਹੱਲ ਕਰਨ ਦੇ ਮੂਡ ਵਿਚ ਹਨ ਕਿਉਂਕਿ ਉਹ ਖ਼ੁਦ ਵੀ ਉਤਰਾਖੰਡ ਵਿਧਾਨ ਸਭਾ ਚੋਣਾਂ ਲਈ ਮੁੱਖ ਮੰਤਰੀ ਦਾ ਚਿਹਰਾ ਬਣਨ ਵਿਚ ਦਿਲਚਸਪੀ ਲੈ ਰਹੇ ਹਨ।
