Ferozepur News : ਬਿਮਾਰੀ ਦੀ ਜਾਂਚ ਲਈ ਸਿਹਤ ਵਿਭਾਗ ਦੀਆਂ ਅੱਠ ਟੀਮਾਂ ਕੰਮ ’ਚ ਲੱਗੀਆਂ
ਫਿਰੋਜ਼ਪੁਰ : ਗਲਘੋਟੂ ਦੀ ਬਿਮਾਰੀ ਕਾਰਨ ਫਿਰੋਜ਼ਪੁਰ ’ਚ ਪਹਿਲੀ ਮੌਤ ਹੋਈ ਹੈ, ਜਿਸ ਕਾਰਨ ਸਿਹਤ ਵਿਭਾਗ ਸਰਗਰਮ ਹੋ ਗਿਆ ਹੈ। ਇੱਥੋਂ ਤਕ ਕਿ ਵਿਸ਼ਵ ਸਿਹਤ ਸੰਗਠਨ ਦੀ ਟੀਮ ਵੀ ਇਸ ਬਿਮਾਰੀ ਦੀ ਜਾਂਚ ਲਈ ਫਿਰੋਜ਼ਪੁਰ ਪਹੁੰਚ ਗਈ ਹੈ। ਸਿਵਲ ਸਰਜਨ ਫਿਰੋਜ਼ਪੁਰ ਰਾਜਵਿੰਦਰ ਕੌਰ ਨੇ ਮੌਤ ਦੀ ਪੁਸ਼ਟੀ ਕੀਤੀ ਹੈ।
ਜਾਣਕਾਰੀ ਮੁਤਾਬਕ ਮਰਨ ਵਾਲੀ ਤਿੰਨ ਸਾਲ ਦੀ ਬੱਚੀ ਦਾ ਪਿਤਾ ਜਗਤਾਰ ਸਿੰਘ ਹੈ ਅਤੇ ਉਹ ਫਿਰੋਜ਼ਪੁਰ ਸ਼ਹਿਰ ਦੀ ਬਸਤੀ ਅਵਾਲੀ ਦਾ ਰਹਿਣ ਵਾਲਾ ਹੈ, ਲੜਕੀ ਦੀ 8 ਅਕਤੂਬਰ ਨੂੰ ਫਰੀਦਕੋਟ ’ਚ ਮੌਤ ਹੋ ਗਈ ਸੀ, ਇਕ ਦਿਨ ’ਚ ਬੀਮਾਰੀ ਨੇ ਬੱਚੀ ਨੂੰ ਮੌਤ ਦੇ ਮੂੰਹ ’ਚ ਦੇ ਦਿਤਾ। ਲੜਕੀ ਦੀ ਮੌਤ ਤੋਂ ਬਾਅਦ ਇਲਾਕੇ ਦੇ ਲੋਕਾਂ ’ਚ ਦਹਿਸ਼ਤ ਦਾ ਮਾਹੌਲ ਹੈ।
ਇਲਾਕੇ ਕੇ ਸਾਰੇ ਪਰਵਾਰਾਂ ’ਚ ਡਰ ਹੈ ਕਿ ਉਨ੍ਹਾਂ ਦੇ ਬੱਚੇ ਵੀ ਇਸ ਬਿਮਾਰੀ ਦਾ ਸ਼ਿਕਾਰ ਹੋ ਸਕਦੇ ਹਨ। ਡਾਕਟਰ ਯੁਵਰਾਜ ਦਾ ਕਹਿਣਾ ਹੈ ਕਿ ਬਿਮਾਰੀ ਨਾਲ ਮਰਨ ਵਾਲੀ ਲੜਕੀ 6 ਅਕਤੂਬਰ ਨੂੰ ਬਿਮਾਰ ਹੋ ਗਈ ਸੀ, ਪਹਿਲਾਂ ਉਸ ਨੂੰ ਆਰ.ਐਮ.ਪੀ. ਡਾਕਟਰ ਨੂੰ ਵਿਖਾਇਆ ਗਿਆ ਸੀ, ਦਵਾਈ ਦੇਣ ਤੋਂ ਬਾਅਦ ਉਹ ਠੀਕ ਨਹੀਂ ਹੋਈ, ਬਾਅਦ ’ਚ ਉਸ ਨੂੰ 8 ਅਕਤੂਬਰ ਨੂੰ ਸ਼ਹਿਰ ਦੇ ਟੋਕਰੀ ਬਾਜ਼ਾਰ ’ਚ ਆਹੂਜਾ ਨਾਮ ਦੇ ਡਾਕਟਰ ਨੂੰ ਵਿਖਾਇਆ ਗਿਆ, ਟੈਸਟ ਕਰਵਾਉਣ ਤੋਂ ਬਾਅਦ ਡਾਕਟਰ ਨੇ ਰੀਪੋਰਟਾਂ ਵੇਖਣ ਤੋਂ ਤੁਰਤ ਬਾਅਦ ਉਸ ਨੂੰ ਰੈਫਰ ਕਰ ਦਿਤਾ, ਫਰੀਦਕੋਟ ਮੈਡੀਕਲ ਕਾਲਜ ਵਿਖੇ ਇਲਾਜ ਦੌਰਾਨ ਉਸ ਦੀ ਮੌਤ ਹੋ ਗਈ।
ਨਾਰੰਗ ਨੇ ਦਸਿਆ ਕਿ ਉਨ੍ਹਾਂ ਵਲੋਂ ਬਿਮਾਰੀ ਦੀ ਜਾਂਚ ਲਈ ਬਸਤੀ ਆਵਾ ਅਤੇ ਬਸਤੀ ਬੋਰੀਆਂ ਵਾਲੀ ’ਚ ਸਰਵੇਖਣ ਕੀਤਾ ਜਾ ਰਿਹਾ ਹੈ। ਵਿਭਾਗ ਦੀਆਂ ਅੱਠ ਟੀਮਾਂ ਇਸ ਕੰਮ ’ਚ ਲੱਗੀਆਂ ਹੋਈਆਂ ਹਨ, ਜਿਸ ’ਚ ਕੁਲ 24 ਮੈਂਬਰ ਕੰਮ ਕਰ ਰਹੇ ਹਨ, ਨਾਲ ਹੀ ਉਹ ਅਤੇ ਡਾ. ਈਸ਼ਾ ਵੀ ਟੀਮ ਨਾਲ ਜਾ ਰਹੇ ਹਨ।
ਹੁਣ ਤਕ ਦੋਹਾਂ ਬਸਤੀਆਂ ਦੇ 200 ਘਰਾਂ ਦੀ ਜਾਂਚ ਕੀਤੀ ਜਾ ਚੁਕੀ ਹੈ, ਟੀਮ ਛੁੱਟੀ ਵਾਲੇ ਦਿਨ ਵੀ ਇਲਾਕੇ ’ਚ ਕੰਮ ਕਰ ਰਹੀ ਹੈ। ਜਿਸ ਪਰਵਾਰ ਦੇ ਬੱਚੇ ਦੀ ਮੌਤ ਹੋ ਗਈ ਹੈ, ਉਸ ਦੇ ਪਰਵਾਰ ਦੇ ਦੋ ਹੋਰ ਬੱਚੇ ਹਨ, ਇਕ ਬੱਚਾ 7 ਸਾਲ ਦਾ ਹੈ ਅਤੇ ਦੂਜਾ ਡੇਢ ਸਾਲ ਦਾ ਹੈ, ਉਹ ਸਕੂਲ ਨਹੀਂ ਜਾਂਦੇ। ਇਸ ਪਰਵਾਰ ਦੇ ਇਲਾਕੇ ’ਚ 6 ਬੱਚੇ ਹਨ, ਜਿਨ੍ਹਾਂ ਦੇ ਸੈਂਪਲ ਲਏ ਗਏ ਹਨ। ਉਨ੍ਹਾਂ ਇਹ ਵੀ ਕਿਹਾ ਕਿ ਇਸ ਬਿਮਾਰੀ ਦਾ ਇਲਾਜ ਸਿਰਫ ਪੀ.ਜੀ.ਆਈ. ’ਚ ਹੈ।
ਡਾਕਟਰਾਂ ਦਾ ਕਹਿਣਾ ਹੈ ਕਿ ਗਲਘੋਟੂ ਜਾਂ ਡਿਪਥੀਰੀਆ ਇਕ ਛੂਤ ਦੀ ਬਿਮਾਰੀ ਹੈ, ਜੋ 2 ਤੋਂ 10 ਸਾਲ ਦੀ ਉਮਰ ਦੇ ਬੱਚਿਆਂ ’ਚ ਵਧੇਰੇ ਆਮ ਹੈ, ਹਾਲਾਂਕਿ ਇਹ ਬਿਮਾਰੀ 20 ਸਾਲ ਦੀ ਉਮਰ ਤਕ ਦੇ ਲੋਕਾਂ ਨੂੰ ਵੀ ਹੋ ਸਕਦੀ ਹੈ। ਇਹ ਬਿਮਾਰੀ ਗਲੇ ’ਚ ਹੁੰਦੀ ਹੈ, ਇਹ ਟੌਨਸਿਲ ਨੂੰ ਸੰਕਰਮਿਤ ਕਰਦੀ ਹੈ, ਇਹ ਗਲੇ, ਨੱਕ, ਅੱਖਾਂ ਅਤੇ ਜਣਨ ਅੰਗਾਂ ਨੂੰ ਵੀ ਪ੍ਰਭਾਵਤ ਕਰ ਸਕਦੀ ਹੈ।
ਇਹ ਬੁਖਾਰ, ਐਨੋਰੇਕਸੀਆ, ਸਿਰ ਦਰਦ ਅਤੇ ਸਰੀਰ ’ਚ ਦਰਦ, ਗਲੇ ’ਚ ਦਰਦ ਦਾ ਕਾਰਨ ਬਣਦਾ ਹੈ। ਇਸ ਦਾ ਦਿਲ ’ਤੇ ਖਾਸ ਹਾਨੀਕਾਰਕ ਅਸਰ ਪੈਂਦਾ ਹੈ। ਕੁੱਝ ਮਰੀਜ਼ਾਂ ’ਚ, ਉਹ ਦਿਲ ਦਾ ਦੌਰਾ ਪੈਣ ਨਾਲ ਮੌਤ ਦਾ ਕਾਰਨ ਵੀ ਬਣਦੇ ਹਨ।
ਇਸ ਬਿਮਾਰੀ ਦਾ ਕਾਰਨ ਕੋਰਾਇਨ ਬੈਕਟੇਰੀਅਮ ਡਿਪਥੀਰੀਆ ਨਾਂ ਦਾ ਬੈਕਟੀਰੀਆ ਹੈ, ਇਹ ਲਾਗ ਬੱਚਿਆਂ ’ਚ ਇਕ-ਦੂਜੇ ਦੀ ਪੈਨਸਿਲ, ਸਟਾਈਲਸ ਆਦਿ ਨੂੰ ਮੂੰਹ ’ਚ ਰੱਖਣ ਨਾਲ ਸਰੀਰ ’ਚ ਦਾਖਲ ਹੁੰਦੀ ਹੈ। ਇਸ ਨਾਲ ਗਲੇ ’ਚ ਝਿੱਲੀ ਬਣ ਜਾਂਦੀ ਹੈ, ਇਹ ਬੈਕਟੀਰੀਆ ਕਫ ਰਾਹੀਂ ਇਕ ਵਿਅਕਤੀ ਤੋਂ ਦੂਜੇ ਵਿਅਕਤੀ ’ਚ ਫੈਲਦਾ ਹੈ। ਇਸ ਦਾ ਸਰੀਰ ’ਤੇ ਖਤਰਨਾਕ ਅਸਰ ਪੈਂਦਾ ਹੈ, ਇਹ ਦਿਲ ਦੀਆਂ ਮਾਸਪੇਸ਼ੀਆਂ ’ਚ ਸੋਜਸ਼, ਦਿਮਾਗੀ ਪ੍ਰਣਾਲੀ ਦੀ ਖਰਾਬੀ ਦਾ ਕਾਰਨ ਬਣ ਸਕਦਾ ਹੈ।
