ਇਤਿਹਾਸਕ ਸ਼ਹਿਰ ਸ਼੍ਰੀ ਚਮਕੌਰ ਸਾਹਿਬ ਦਾ ਹਸਪਤਾਲ, ਸਬੰਧਤ ਡਿਸਪੈਂਸਰੀਆਂ ਦੁਆਰਾ, ਇਲਾਕੇ ਦੇ ਸੈਂਕੜੇ ਪਿੰਡਾਂ ਦੀਆਂ ਸਿਹਤ-ਸੇਵਾਵਾਂ ਨਾਲ ਜੁੜਿਆ ਹੋਇਆ ਹੈ।
ਸ਼੍ਰੀ ਚਮਕੌਰ ਸਾਹਿਬ, 13 ਅਪ੍ਰੈਲ (ਅਵਤਾਰ ਸਿੰਘ ਭੰਗੂ): ਇਤਿਹਾਸਕ ਸ਼ਹਿਰ ਸ਼੍ਰੀ ਚਮਕੌਰ ਸਾਹਿਬ ਦਾ ਹਸਪਤਾਲ, ਸਬੰਧਤ ਡਿਸਪੈਂਸਰੀਆਂ ਦੁਆਰਾ, ਇਲਾਕੇ ਦੇ ਸੈਂਕੜੇ ਪਿੰਡਾਂ ਦੀਆਂ ਸਿਹਤ-ਸੇਵਾਵਾਂ ਨਾਲ ਜੁੜਿਆ ਹੋਇਆ ਹੈ। ਆਮ ਵਾਂਗ ਇਸ ਹਸਪਤਾਲ ਅਧੀਨ ਇਲਾਕਾਈ ਸਿਹਤ-ਸੇਵਾਵਾਂ ਲਈ ਡਾਕਟਰ, ਨਰਸਾਂ ਅਤੇ ਸਹਾਇਕ-ਅਮਲੇ ਦੀ ਘਾਟ ਤਾਂ ਹੈ ਹੀ ਪਰ ਮੌਜੂਦਾ ਕੋਰੋਨਾ ਤ੍ਰਾਸਦੀ ਸਮੇਂ ਇਸ ਹਸਪਤਾਲ ਨਾਲ ਸਬੰਧਤ ਸਿਹਤ ਕਾਮਿਆਂ ਕੋਲ, ਕੋਰੋਨਾ ਯੁੱਧ ਦਾ ਮੁਕਾਬਲਾ ਕਰਨ ਲਈ ਲੋੜੀਂਦੇ ਹਥਿਆਰ ਹੀ ਨਹੀਂ। ਭਾਵੇਂ ਸਰਕਾਰੀ ਪੱਧਰ 'ਤੇ ਵਜ਼ੀਰਾਂ ਅਤੇ ਅਧਿਕਾਰੀਆਂ ਵਲੋਂ ਦਾਅਵੇ ਕੁੱਝ ਵੀ ਕੀਤੇ ਜਾ ਰਹੇ ਹੋਣ ਪਰ ਹਕੀਕਤ ਇਹ ਹੈ ਕਿ ਡਾਕਟਰਾਂ ਸਮੇਤ ਹੋਰ ਸਿਹਤ ਕਾਮਿਆਂ ਦੀਆਂ ਫ਼ੌਜਾਂ, ਲੋੜੀਂਦੇ ਹਥਿਆਰਾਂ ਤੋਂ ਵਾਂਝੀਆਂ ਹਨ ਅਤੇ ਪ੍ਰੇਸ਼ਾਨ ਵੀ ਕਿ ਜੇ ਭਵਿੱਖ ਵਿਚ ਕੋਰੋਨਾ ਦੇ ਮਰੀਜ਼ਾਂ ਨੂੰ ਸਾਂਭਣ ਦੀ ਨੌਬਤ ਆ ਜਾਵੇ ਤਾਂ ਉਹ ਕੀ ਕਰਨਗੇ?
ਵਰਨਣਯੋਗ ਹੈ ਕਿ ਨਜ਼ਦੀਕੀ ਪਿੰਡ ਕੰਧੋਲਾ ਦੇ ਬਾਬਾ ਸੁਖਬੀਰ ਸਿੰਘ ਨੇ ਸ਼੍ਰੀ ਚਮਕੌਰ ਸਾਹਿਬ ਦੇ ਹਸਪਤਾਲ ਨੂੰ ਸੈਨੇਟਾਈਜ਼ਰਾਂ, ਦਸਤਾਨਿਆਂ ਅਤੇ ਮਾਸਕਾਂ ਦੀ ਖੇਪ ਭੇਂਟ ਕੀਤੀ ਹੈ। ਇਸੇ ਫਿਕਰਮੰਦੀ ਵਿਚ ਸਥਾਨਕ ਸਹਾਰਾ ਸੇਵਾ ਸੁਸਾਇਟੀ ਦੇ ਆਗੂ ਅਮਨਦੀਪ ਸਿੰਘ ਮਾਂਗਟ ਅਤੇ ਸਵਰਨ ਸਿੰਘ ਭੰਗੂ, ਮੁੱਖ ਸਿਹਤ ਅਫ਼ਸਰ ਡਾ. ਹਰਬੰਸ ਸਿੰਘ ਨੂੰ ਮਿਲੇ ਅਤੇ ਭਰੋਸਾ ਦਿਵਾਇਆ ਕਿ ਉਨ੍ਹਾਂ ਸਮੇਤ ਇਲਾਕੇ ਦੀਆਂ ਸਵੈ-ਸੇਵੀ ਸੰਸਥਾਵਾਂ ਦਾ ਇਖਲਾਕੀ-ਬਲ ਉਨ੍ਹਾਂ ਦੇ ਨਾਲ ਹੈ। ਉਨ੍ਹਾਂ ਇਹ ਵੀ ਕਿਹਾ ਕਿ ਉਹ ਸਿਹਤ ਕਾਮਿਆਂ ਨੂੰ ਲੋੜੀਂਦੇ ਸਮਾਨ ਦੀ ਕਮੀ ਨਹੀਂ ਆਉਣ ਦੇਣਗੇ। ਐਸਡੀਐਮ ਮਨਕੰਵਲ ਸਿੰਘ ਚਾਹਲ ਅਨੁਸਾਰ ਭਵਿੱਖ ਦੇ ਕੋਰੋਨਾ ਖਤਰੇ ਨੂੰ ਭਾਂਪਦਿਆਂ ਨਜ਼ਦੀਕੀ ਜਵਾਹਰ ਨਵੋਦਿਆ ਵਿਦਿਆਲਾ ਸੰਧੂਆਂ ਵਿਚ 400, ਬੇਲਾ ਕਾਲਜ ਵਿਚ 50 ਅਤੇ ਗੁਰਦਵਾਰਾ ਸ਼੍ਰੀ ਕਤਲਗੜ੍ਹ ਸਾਹਿਬ ਵਿਚ 50 ਮਰੀਜ਼ਾਂ ਦੀ ਸੰਭਾਲ ਲਈ 'ਕੋਰੋਨਾ ਕੰਟਰੋਲ ਸਹਾਇਕ ਸੈਂਟਰ' ਬਣਾਏ ਜਾ ਰਹੇ ਹਨ।
