ਮੁੰਬਈ ਵਿਚ ਡੈਲਟਾ ਪਲੱਸ ਵੇਰੀਐਂਟ ਨਾਲ ਪਹਿਲੀ ਮੌਤ
ਵੈਕਸੀਨ ਦੀਆਂ ਦੋਵੇਂ ਡੋਜ਼ ਲੈ ਚੁੱਕਾ ਸੀ ਮਰੀਜ਼
ਮੁੰਬਈ, 13 ਅਗੱਸਤ : ਮੁੰਬਈ 'ਚ ਕੋਰੋਨਾ ਦੇ ਡੈਲਟਾ ਪਲੱਸ ਵੇਰੀਐਂਟ ਨਾਲ ਪਹਿਲੀ ਮੌਤ ਦਾ ਮਾਮਲਾ ਸਾਹਮਣੇ ਆਇਆ ਹੈ | ਬੀ.ਐਮ.ਸੀ ਦੇ ਇਕ ਅਧਿਕਾਰੀ ਨੇ ਦਸਿਆ ਕਿ ਮਿ੍ਤਕਾ ਦੀ ਉਮਰ 63 ਸਾਲ ਸੀ ਅਤੇ ਉਸ ਨੂੰ ਕੋਰੋਨਾ ਵੈਕਸੀਨ ਦੀਆਂ ਦੋਵੇਂ ਖ਼ੁਰਾਕਾਂ ਲੱਗ ਚੁਕੀਆਂ ਸਨ | ਉਨ੍ਹਾਂ ਦਸਿਆ ਕਿ ਮਹਿਲਾ ਦੀ ਕੋਈ ਵੀ ਟ੍ਰੈਵਲ ਹਿਸ਼ਟਰੀ ਨਹੀਂ ਸੀ | ਹਾਲਾਂਕਿ, ਮਹਿਲਾ ਦੇ ਫੇਫੜਿਆਂ 'ਚ ਇਨਫ਼ੈਕਸ਼ਨ ਸੀ ਅਤੇ ਉਹ ਕੋਰੋਨਾ ਪੀੜਤ ਹੋਣ ਤੋਂ ਪਹਿਲਾਂ ਹੀ ਬੀਮਾਰ ਸੀ | ਦਸਿਆ ਜਾ ਰਿਹਾ ਹੈ ਕਿ ਮਹਿਲਾ 21 ਜੁਲਾਈ ਨੂੰ ਕੋਰੋਨਾ ਨਾਲ ਪੀੜਤ ਹੋਈ ਸੀ ਅਤੇ 27 ਜੁਲਾਈ ਨੂੰ ਉਸ ਦੀ ਮੌਤ ਹੋ ਗਈ |
ਬੀ.ਐਮ.ਸੀ. (ਬਿ੍ਹਨਮੁੰਬਈ ਨਗਰ ਨਿਗਮ) ਨੂੰ ਹਾਲ ਹੀ 'ਚ ਮਹਿਲਾ ਦੀ ਜੀਨੋਸ ਸੀਕਵੈਂਸ ਰਿਪੋਰਟ ਮਿਲੀ ਹੈ, ਜਿਸ ਵਿਚ ਉਸ ਨੂੰ ਡੈਲਟਾ ਪਲੱਸ ਵੇਰੀਐਂਟ ਦੀ ਪੁਸ਼ਟੀ ਹੋਈ ਹੈ | ਮਿ੍ਤਕਾ ਦੇ ਪਰਵਾਰ ਦੇ 6 ਮੈਂਬਰ ਵੀ ਕੋਰੋਨਾ ਪੀੜਤ ਮਿਲੇ ਹਨ | ਇਨ੍ਹਾਂ 'ਚੋਂ ਦੋ 'ਚ ਡੈਲਟਾ ਪਲੱਸ ਵੇਰੀਐਂਟ ਦੀ ਪੁਸ਼ਟੀ ਹੋਈ ਹੈ, ਹਾਲਾਂਕਿ, ਉਨ੍ਹਾਂ ਦੀ ਹਾਲਤ ਠੀਕ ਹੈ | ਹੋਰ ਚਾਰ ਮੈਂਬਰਾਂ ਦੀ ਰਿਪੋਰਟ ਅਜੇ ਆਉਣੀ ਬਾਕੀ ਹੈ |
ਇਸ ਤੋਂ ਪਹਿਲਾਂ ਰਤਨਾਗਿਰੀ 'ਚ 80 ਸਾਲਾ ਮਹਿਲਾ ਦੀ ਕੋਰੋਨਾ ਦੇ ਡੈਲਟਾ ਪਲੱਸ ਵੇਰੀਐਂਟ ਨਾਲ ਪੀੜਤ ਹੋਣ ਤੋਂ ਬਾਅਦ ਮੌਤ ਹੋ ਗਈ ਸੀ | ਉਹ ਸੂਬੇ 'ਚ ਡੈਲਟਾ ਪਲੱਸ ਵੇਰੀਐਂਟ ਨਾਲ ਮੌਤ ਦਾ ਪਹਿਲਾ ਮਾਮਲਾ ਸੀ | ਦੱਸ ਦੇਈਏ ਕਿ ਮਹਾਰਾਸ਼ਟਰ 'ਚ ਡੈਲਟਾ ਪਲੱਸ ਵੇਰੀਐਂਟ ਦੇ ਹੁਣ ਤਕ 65 ਮਾਮਲੇ ਸਾਹਮਣੇ ਆ ਚੁੱਕੇ ਹਨ ਜਦਕਿ ਮੁੰਬਈ 'ਚ ਹੁਣ ਤਕ 11 ਮਾਮਲੇ ਮਿਲੇ ਹਨ | (ਏਜੰਸੀ)