ਚੀਨ ਦੀਆਂ ਕੰਪਨੀਆਂ 'ਚ ਅਮਰੀਕੀ ਨਿਵੇਸ਼ 'ਤੇ ਲਗਾਈ ਸਖ਼ਤ ਪਾਬੰਦੀ

ਵਾਸ਼ਿੰਗਟਨ, 13 ਨਵੰਬਰ : ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਵ੍ਹਾਈਟ ਹਾਊਸ ਤੋਂ ਵਿਦਾ ਹੋਣ ਤੋਂ ਪਹਿਲਾਂ ਚੀਨ ਵਿਰੁਧ ਇਕ ਹੋਰ ਵੱਡਾ ਫ਼ੈਸਲਾ ਲਿਆ ਹੈ। ਟਰੰਪ ਪ੍ਰਸ਼ਾਸਨ ਨੇ ਇਕ ਕਾਰਜਕਾਰੀ ਆਦੇਸ਼ ਜਾਰੀ ਕੀਤਾ ਜਿਸ 'ਚ ਚੀਨੀ ਕੰਪਨੀਆਂ 'ਚ ਅਮਰੀਕੀ ਨਿਵੇਸ਼ ਉੱਤੇ ਪਾਬੰਦੀ ਲਗਾਈ ਗਈ ਸੀ। ਇਸ ਤਰ੍ਹਾਂ ਦੀ 31 ਕੰਪਨੀਆਂ ਦੀ ਪਛਾਣ ਕੀਤੀ ਗਈ ਹੈ।
ਆਦੇਸ਼ ਮੁਤਾਬਕ ਅਮਰੀਕਾ ਅਜਿਹੀਆਂ ਚੀਨੀ ਕੰਪਨੀਆਂ 'ਚ ਨਿਵੇਸ਼ ਨਹੀਂ ਕਰੇਗਾ, ਜੋ ਕਿ ਚੀਨੀ ਫ਼ੌਜ ਨਾਲ ਕਿਸੇ ਵੀ ਤਰਾਂ ਜੁੜੇ ਹੋਏ ਹਨ। ਇਹ ਕਦਮ ਅਮਰੀਕੀ ਨਿਵੇਸ਼ ਫ਼ਰਮਾਂ, ਪੈਨਸ਼ਨ ਫ਼ੰਡਾਂ ਅਤੇ ਹੋਰਾਂ ਨੂੰ 31 ਚੀਨੀ ਕੰਪਨੀਆਂ ਦੇ ਸ਼ੇਅਰ ਖਰੀਦਣ ਤੋਂ ਰੋਕਣ ਲਈ ਲਿਆ ਗਿਆ ਹੈ, ਜਿਸ ਨੂੰ ਰਖਿਆ ਵਿਭਾਗ ਨੇ ਚੀਨੀ ਸੈਨਿਕ ਸਹਾਇਤਾ ਪ੍ਰਾਪਤ ਕੰਪਨੀਆਂ ਕਰਾਰ ਦਿਤਾ ਹੈ।
ਮੰਨਿਆ ਜਾ ਰਿਹਾ ਹੈ ਕਿ ਡੋਨਾਲਡ ਟਰੰਪ ਦੇ ਇਸ ਫ਼ੈਸਲੇ ਕਾਰਨ ਚੀਨ ਨੂੰ ਬਹੁਤ ਨੁਕਸਾਨ ਹੋਵੇਗਾ। ਖ਼ਾਸਕਰ, ਚਾਈਨਾ ਟੈਲੀਕਾਮ ਕਾਰਪੋਰੇਸ਼ਨ ਲਿਮਟਡ, ਚਾਈਨਾ ਮੋਬਾਈਲ ਲਿਮਟਿਡ ਅਤੇ ਨਿਗਰਾਨੀ ਉਪਕਰਣ ਨਿਰਮਾਤਾ ਹਿੱਕਵਿਜ਼ਨ ਸਭ ਤੋਂ ਪ੍ਰਭਾਵਤ ਹੋਣਗੇ। ਇਹ ਐਲਾਨ ਅਗਲੇ ਸਾਲ 11 ਜਨਵਰੀ ਤੋਂ ਲਾਗੂ ਹੋਵੇਗਾ ਅਤੇ ਉਸ ਤੋਂ ਬਾਅਦ ਅਮਰੀਕੀ ਨਿਵੇਸ਼ਕ ਸੂਚੀਬੱਧ ਚੀਨੀ ਕੰਪਨੀਆਂ 'ਚ ਨਿਵੇਸ਼ ਨਹੀਂ ਕਰ ਸਕਣਗੇ।
ਵ੍ਹਾਈਟ ਹਾਊਸ ਵਲੋਂ ਜਾਰੀ ਕੀਤੇ ਗਏ ਆਦੇਸ਼ 'ਚ ਕਿਹਾ ਗਿਆ ਹੈ ਕਿ ਚੀਨ ਅਪਣੀ ਫ਼ੌਜ, ਖੁਫ਼ੀਆ ਅਤੇ ਹੋਰ ਸੁਰੱਖਿਆ ਏਜੰਸੀਆਂ ਨੂੰ ਮਜ਼ਬੂਤ ਅਤੇ ਆਧੁਨਿਕ ਬਣਾਉਣ ਲਈ ਲੰਮੇ ਸਮੇਂ ਤੋਂ ਅਮਰੀਕਾ ਦੀ ਰਾਜਧਾਨੀ ਦੀ ਵਰਤੋਂ ਕਰ ਰਿਹਾ ਹੈ, ਪਰ ਹੁਣ ਅਜਿਹਾ ਨਹੀਂ ਹੋਣ ਦਿਤਾ ਜਾਵੇਗਾ। ਜ਼ਿਕਰਯੋਗ ਹੈ ਕਿ ਰਾਸ਼ਟਰਪਤੀ ਚੋਣਾਂ 'ਚ ਜੋ ਬਾਇਡਨ ਦੀ ਹਾਰ ਤੋਂ ਬਾਅਦ ਡੋਨਾਲਡ ਟਰੰਪ ਵਲੋਂ ਲਿਆ ਗਿਆ ਇਹ ਪਹਿਲਾ ਵੱਡਾ ਫ਼ੈਸਲਾ ਹੈ। ਜਿਸ ਤੋਂ ਪਤਾ ਲਗਦਾ ਹੈ ਕਿ ਟਰੰਪ ਸੱਤਾ ਦੇ ਤਬਾਦਲੇ ਤੋਂ ਪਹਿਲਾਂ ਚੀਨ ਵਿਰੁਧ ਕਾਰਵਾਈ ਦਾ ਕੋਈ ਮੌਕਾ ਨਹੀਂ  ਛੱਡਣਾ ਚਾਹੁੰਦੇ। (ਏਜੰਸੀ)