ਅਗਲੇ ਹਫ਼ਤੇ ਹੋ ਸਕਦਾ ਹੈ ਬੰਦੀ ਸਿੰਘਾਂ ਦੀ ਰਿਹਾਈ ਦਾ ਐਲਾਨ

ਵਿਧਾਨ ਸਭਾ ਚੋਣਾਂ ਦੇ ਮੱਦੇਨਜ਼ਰ ਕੇਂਦਰ ਦੀ ਭਾਜਪਾ ਸਰਕਾਰ ਵੀ ਹੈ ਮਾਮਲੇ ਨੂੰ ਲੈ ਕੇ ਗੰਭੀਰ

ਚੰਡੀਗੜ੍ਹ, 14 ਜਨਵਰੀ (ਗੁਰਉਪਦੇਸ਼ ਭੁੱਲਰ) : ਅਪਣੀਆਂ ਸਜ਼ਾਵਾਂ ਪੂਰੀਆਂ ਕਰ ਚੁੱਕੇ ਜੇਲਾਂ ’ਚ ਕੈਦ ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਹੁਣ ਪੰਜਾਬ ਵਿਧਾਨ ਸਭਾ ਚੋਣਾਂ ਦੇ ਮੱਦੇਨਜ਼ਰ ਭਾਜਪਾ ਵੀ ਗੰਭੀਰ ਹੋ ਚੁੱਕੀ ਹੈ।
ਸੂਤਰਾਂ ਦੀ ਮੰਨੀਏ ਤਾਂ ਅਗਲੇ ਹਫ਼ਤੇ ਬੰਦੀ ਸਿੰਘਾਂ ਦੀ ਰਿਹਾਈ ਦਾ ਕੇਂਦਰ ਸਰਕਾਰ ਵਲੋਂ ਐਲਾਨ ਹੋ ਸਕਦਾ ਹੈ। ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਲੰਮੇ ਸਮੇਂ ਤੋਂ ਗੱਲਬਾਤ ਕਰ ਰਹੇ ਅਕਾਲੀ ਦਲ ਸੰਯੁਕਤ ਵਲੋਂ ਸੁਖਦੇਵ ਸਿੰਘ ਢੀਂਡਸਾ ਦੀ ਅਗਵਾਈ ਵਿਚ ਅਤੇ ਪੰਥਕ ਦਲ ਦੇ ਆਗੂਆਂ ਦੀਆਂ ਹਾਲ ਹੀ ’ਚ ਕੇਂਦਰੀ ਗ੍ਰਹਿ ਮੰਤਰੀਆਂ ਅਮਿਤ ਸ਼ਾਹ ਅਤੇ ਗਜੇਂਦਰ ਸ਼ੇਖਾਵਤ ਨਾਲ ਮੀਟਿੰਗਾਂ ’ਚ ਇਨ੍ਹਾਂ ਰਿਹਾਈਆਂ ਨੂੰ ਲੈ ਕੇ ਕਾਫ਼ੀ ਪ੍ਰਗਤੀ ਹੋਈ ਹੈ। ਪਿਛਲੇ ਦਿਨੀਂ ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਪੰਥਕ ਦਲ ਵਲੋਂ ਇਕ ਰੋਸ ਮਾਰਚ ਵੀ ਫ਼ਤਿਹਗੜ੍ਹ ਸਾਹਿਬ ਤੋਂ ਚੰਡੀਗੜ੍ਹ ਵਲ ਕੀਤਾ ਗਿਆ ਸੀ ਪਰ ਉਸ ਦਿਨ ਰਾਜਪਾਲ ਪੰਜਾਬ ਬਨਵਾਰੀ ਲਾਲ ਪੁਰੋਹਿਤ ਨੇ ਮੰਗ ਪੱਤਰ ਲੈਣ ਸਮੇਂ ਅਪਣੀ ਅਸਮਰਥਾ ਜਤਾਈ ਸੀ ਪਰ ਹੁਣ ਅਮਿਤ ਸ਼ਾਹ ਤੇ ਸ਼ੇਖ਼ਾਵਤ ਨਾਲ ਮੀਟਿੰਗਾਂ ਬਾਅਦ ਅੱਜ ਪੰਥਕ ਦਲ ਦੇ ਪ੍ਰਮੁੱਖ ਆਗੂ ਜੰਗ ਸਿੰਘ ਦੀ ਰਾਜਪਾਲ ਨਾਲ ਹੋਈ ਮੁੜ ਮੁਲਾਕਾਤ ਸਮੇਂ ਕਾਫ਼ੀ ਸਾਕਾਰਾਤਮਕ ਹੁੰਗਾਰਾ ਮਿਲਿਆ ਹੈ। ਜੰਗ ਸਿੰਘ ਨਾਲ ਉਨ੍ਹਾਂ ਦੇ ਵਕੀਲ ਵੀ ਸਨ।
ਰਾਜਪਾਲ ਨੇ ਇਸ ਬਾਰੇ ਫ਼ਾਈਲ ਯੂ.ਟੀ. ਪ੍ਰਸ਼ਾਸਨ ਨੂੰ ਵੀ ਭੇਜ ਕੇ ਕਾਰਵਾਈ ਸ਼ੁਰੂ ਕਰਨ ਦਾ ਭਰੋਸਾ ਦਿਤਾ ਹੈ ਕਿਉਂਕਿ ਜਿਹੜੇ 11 ਸਿੰਘਾਂ ਦੀ ਰਿਹਾਈ ਲਈ ਪੰਥਕ ਦਲ ਮੁਹਿੰਮ ਚਲਾ ਰਿਹਾ ਹੈ, ਉਨ੍ਹਾਂ ’ਚ ਬਹੁਤੇ ਚੰਡੀਗੜ੍ਹ ਦੀ ਜੇਲ ’ਚ ਹੀ ਹਨ। ਸੋਮਵਾਰ ਨੂੰ ਰਾਜਪਾਲ ਨੇ ਪੰਥਕ ਦਲ ਪ੍ਰਤੀਨਿਧਾਂ ਨਾਲ ਮੁੜ ਮੁਲਾਕਾਤ ਕਰਨੀ ਹੈ।
ਸੂਤਰਾਂ ਦੀ ਮੰਨੀਏ ਤਾਂ ਪ੍ਰਧਾਨ ਮੰਤਰੀ ਦੀ ਫ਼ਿਰੋਜ਼ਪੁਰ ਰੈਲੀ ਸਮੇਂ ਵੀ ਬੰਦ ਸਿੰਘਾਂ ਦੀ ਰਿਹਾਈ ਦੇ ਐਲਾਨ ਦੀ ਯੋਜਨਾ ਸੀ ਪਰ ਇਹ ਰੈਲੀ ਸੁਰਖਿਆ ਕਮੀ ਕਾਰਨ ਸੰਭਵ ਨਹੀਂ ਹੋ ਸਕੀ। ਪੰਥਕ ਦਲ ਦੇ ਆਗੂ ਪਿਛਲੇ ਕਈ ਮਹੀਨੇ ਤੋਂ ਇਨ੍ਹਾਂ ਰਿਹਾਈਆਂ ਨੂੰ ਲੈ ਕੇ ਕੇਂਦਰ ਦੇ ਸੰਪਰਕ ’ਚ ਹਨ ਤੇ ਮੀਟਿੰਗਾਂ ਕੀਤੀਆਂ ਹਨ।