ਐਡਵਾਂਸ ਬਿਜਲੀ ਬਿੱਲ ਜਮ੍ਹਾਂ ਕਰਾਉਣ ਉਤੇ ਮਿਲੇਗਾ 1 ਫ਼ੀ ਸਦੀ ਵਿਆਜ
ਪਟਿਆਲਾ, 14 ਅਪ੍ਰੈਲ (ਤੇਜਿੰਦਰ ਫ਼ਤਿਹਪੁਰ): ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ ਲਿਮਿਟੇਡ (ਬਿਜਲੀ ਬੋਰਡ) ਕਰੀਬ ਇਕ ਦਹਾਕੇ ਬਾਅਦ ਮੁੜ ਤੋਂ ਅਪਣੇ ਖਪਤਕਾਰਾਂ ਨੂੰ ਵਿਆਜ ਦਾ ਭੁਗਤਾਨ ਦੇਣ ਜਾ ਰਿਹਾ ਹੈ। ਵਿਭਾਗ ਅਪਣੇ 15 ਲੱਖ ਦੇ ਕਰੀਬ ਖਪਤਕਾਰਾਂ ਨੂੰ ਇਹ ਵਿਆਜ ਭੁਗਤਾਨ ਤਾਂ ਕਰੇਗਾ, ਜੇਕਰ ਉਹ ਅਪਣਾ ਬਿਜਲੀ ਬਿੱਲ ਐਡਵਾਂਸ ਵਿਚ ਜਮ੍ਹਾਂ ਕਰਵਾਉਣਗੇ। ਇਹ ਐਡਵਾਂਸ ਬਿੱਲ ਜਮ੍ਹਾਂ ਕਰਨ ਉਤੇ ਪਾਵਰਕਾਮ ਉਪਭੋਗਤਾਵਾਂ ਨੂੰ ਮਹੀਨੇ ਦਾ 1 ਫ਼ੀ ਸਦੀ ਮਤਲਬ ਕਿ ਸਾਲ ਦਾ 12 ਫ਼ੀ ਸਦੀ ਵਿਆਜ ਦੇਵੇਗਾ।
ਜਾਣਕਾਰੀ ਮੁਤਾਬਿਕ ਇਹ ਵਿਆਜ ਭੁਗਤਾਨ ਸਕੀਮ ਵਿਭਾਗ ਨੇ ਪਹਿਲਾਂ ਵੀ ਸ਼ੁਰੂ ਕੀਤੀ ਸੀ, ਪਰ ਕਿਸੇ ਕਾਰਨ ਇਸ ਨੂੰ ਦਹਾਕਾ ਪਹਿਲਾ ਬੰਦ ਕਰ ਦਿਤਾ ਗਿਆ ਸੀ। ਹੁਣ ਪਾਵਰਕਾਮ ਨੇ ਬਿਜਲੀ ਬਿਲ ਦੀ ਐਡਵਾਂਸ ਪੇਮੇਂਟ ਫਿਰ ਤੋਂ ਸ਼ੁਰੂ ਕਰ ਦਿਤੀ ਹੈ। ਅਧਿਕਾਰੀਆਂ ਨੇ ਦਸਿਆ ਕਿ ਉਪਭੋਗਤਾਵਾਂ ਅਪਣੇ ਬਿਜਲੀ ਬਿੱਲ ਦੇ ਸਾਲ ਦੀ ਐਵਰੇਜ ਬਿੱਲ ਦੇ ਮੁਤਾਬਕ ਐਡਵਾਂਸ ਬਿੱਲ ਜਮ੍ਹਾਂ ਕਰਵਾ ਸਕਦਾ ਹੈ। ਇਨ੍ਹਾਂ ਹੀ ਨਹੀਂ ਹੁਣ ਫਿਰ ਪਾਵਰਕਾਮ ਬਿਜਲੀ ਉਪਭੋਗਤਾਵਾਂ ਤੋਂ ਐਵਰੇਜ ਬਿਲ ਨਹੀਂ ਸਗੋਂ ਰੀਡਿੰਗ ਦੇ ਹਿਸਾਬ ਨਾਲ ਬਿੱਲ ਵਸੂਲੇਗਾ। ਇਸ ਤੋਂ ਪਹਿਲਾਂ ਪਾਵਰਕਾਮ ਨੇ ਬਿਜਲੀ ਦਾ ਐਵਰੇਜ ਬਿੱਲ ਭੇਜਣ ਦੀ ਯੋਜਨਾ ਬਣਾਈ ਸੀ।
ਉਪਭੋਗਤਾਵਾਂ ਦੇ ਵਿਰੋਧ ਦੇ ਬਾਅਦ ਖਾਸ ਇੰਡਸਟਰੀਅਲ ਉਪਭੋਗਤਾਵਾਂ ਨੇ ਐਵਰੇਜ ਬਿੱਲ ਦਾ ਵਿਰੋਧ ਕੀਤਾ ਸੀ। ਇਸ ਦੇ ਬਾਅਦ ਫ਼ੈਸਲਾ ਬਦਲਿਆ ਗਿਆ। ਇਸ ਦੇ ਬਾਅਦ ਵੀ ਪਾਵਰਕਾਮ 10 ਹਜ਼ਾਰ ਰੁਪਏ ਤੋਂ ਵਧ ਦਾ ਬਿੱਲ ਆਨਲਾਈਨ ਭੁਗਤਾਨ ਕਰਨ ਵਾਲੇ ਉਪਭੋਗਤਾਵਾਂ ਨੂੰ 1 ਫ਼ੀ ਸਦੀ ਬਿੱਲ ਵਿਚ ਰਿਆਇਤ ਦੇ ਰਹੀ ਹੈ। ਲਾਕਡਾਊਨ ਅਤੇ ਕਰਫ਼ਿਊ ਦੇ ਕਾਰਨ ਫ਼ੈਕਟਰੀਆਂ ਬੰਦ ਹਨ ਅਤੇ ਉਨ੍ਹਾਂ ਦੇ ਨਾਂ ਚੱਲਣ ਉਤੇ ਵੀ ਐਵਰੇਜ ਦੇ ਹਿਸਾਬ ਨਾਲ ਬਿਜਲੀ ਦਾ ਬਿੱਲ ਭਰਨਾ ਕਾਰੋਬਾਰੀਆਂ ਨੂੰ ਮੁਸ਼ਕਲ ਸੀ। ਪਾਵਰਕਾਮ ਦੇ ਚੇਅਰਮੈਨ ਕਮ ਡਾਇਰੈਕਟਰ (ਸੀ.ਐੱਮ.ਡੀ.) ਇੰਜੀਨੀਅਰ ਬਲਦੇਵ ਸਿੰਘ ਸਰਾਂ ਨੇ ਵੀਡੀਉ ਕਾਨਫ਼ਰਸਿੰਗ ਕਰ ਕੇ ਸਮੱਸਿਆਵਾਂ ਸੁਣੀਆਂ ਸਨ, ਜਿਸ ਵਿਚ ਉਦਯੋਗਪਤੀਆਂ ਨੇ ਸਮੱਸਿਆਵਾਂ ਦੇ ਬਾਰੇ ਵਿਚ ਦਸਿਆ ਸੀ।
ਖਪਤਕਾਰ ਅਪਣੇਬਿਜਲੀ ਬਿੱਲ ਵੱਖ-ਵੱਖ ਤਰੀਕਿਆਂ ਨਾਲ ਭਰ ਸਕਦੇ ਹਨ। ਪੇ.ਟੀ.ਐੱਮ. ਅਤੇ ਫ਼ੋਨ-ਪੇਅ ਤੋਂ ਇਲਾਵਾ ਪਾਵਰਕਾਮ ਦੀ ਵੈਬਸਾਈਟ ਉਤੇ ਜਾ ਕੇ ਵੀ ਬਿੱਲ ਭਰੇ ਜਾ ਸਕਦੇ ਹਨ। ਮੌਜੂਦਾ ਸਮੇਂ ਖਪਤਕਾਰਾਂ ਨੂੰ ਪ੍ਰਤੀ ਯੂਨਿਟ ਬਿੱਲ ਦੇਣਾ ਹੁੰਦਾ ਹੈ, ਜਿਵੇਂ ਕਿ 200 ਯੂਨਿਟ ਤਕ 4.99 ਰੁਪਏ, 300 ਯੂਨਿਟ ਤਕ 6.59 ਰੁਪਏ, 500 ਯੂਨਿਟ ਤਕ 7.20 ਰੁਪਏ, 800 ਯੂਨਿਟ ਤਕ 7.41 ਰੁਪਏ ਅਤੇ 2 ਕਿਲੋ ਵਾਟ ਤਕ 35 ਰੁਪਏ ਯੂਨਿਟ ਅਤੇ 2-7 ਕਿਲੋ 45 ਰੁਪਏ ਯੂਨਿਟ ਫਿਕਸ ਚਾਰਜ ਹਨ।