ਆਈ.ਜੀ. ਕੁੰਵਰ ਵਿਜੈ ਪ੍ਰਤਾਪ ਅਸਤੀਫ਼ਾ ਵਾਪਸ ਨਹੀਂ ਲੈਣਗੇ

ਫ਼ੇਸਬੁਕ ਪੋਸਟ ਵਿਚ ਲਿਖਿਆ, ਸਮਾਜ ਸੇਵਾ ਕਰਦਾ ਰਹਾਂਗਾ ਪਰ ਆਈ.ਪੀ.ਐਸ. ਅਫ਼ਸਰ ਵਜੋਂ ਨਹੀਂ

ਚੰਡੀਗੜ੍ਹ, 14 ਅਪ੍ਰੈਲ (ਭੁੱਲਰ) : ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਵਲੋਂ ਅਸਤੀਫ਼ਾ ਨਾਮਨਜ਼ੂਰ ਕਰਨ ਦੇ ਬਾਵਜੂਦ ਕੁੰਵਰ ਵਿਜੈ ਪ੍ਰਤਾਪ ਅਪਣੇ ਫ਼ੈਸਲੇ 'ਤੇ ਬਜ਼ਿੱਦ ਹਨ | ਉਨ੍ਹਾਂ ਅਪਣੇ ਫ਼ੇਸਬੁਕ 'ਤੇ ਇਕ ਪੋਸਟ ਪਾਈ ਹੈ ਜਿਸ ਵਿਚ ਲਿਖਿਆ ਹੈ ਕਿ ਉਹ ਅੱਗੇ ਵੀ ਸਮਾਜ ਸੇਵਾ ਕਰਦੇ ਰਹਿਣਗੇ ਪਰ ਆਈਪੀਐਸ ਦੇ ਤੌਰ 'ਤੇ ਨਹੀਂ | ਜ਼ਿਕਰਯੋਗ ਹੈ ਕਿ ਕੁੰਵਰ ਵਿਜੈ ਪ੍ਰਤਾਪ ਸਿੰਘ ਕੋਟਕਪੂਰਾ ਬਹਿਬਲਕਲਾਂ ਗੋਲੀਕਾਂਡ ਮਾਮਲੇ ਦੀ ਜਾਂਚ ਲਈ ਬਣਾਈ ਗਈ ਐਸਆਈਟੀ ਦੇ ਮੁਖੀ ਹਨ ਜਿਸ ਨੂੰ  ਬੀਤੇ ਦਿਨੀਂ ਹਾਈ ਕੋਰਟ ਨੇ ਭੰਗ ਕਰਨ ਦੇ ਹੁਕਮ ਦਿਤੇ ਸਨ |
ਕੁੰਵਰ ਵਿਜੈ ਪ੍ਰਤਾਪ ਨੇ ਲਿਖਿਆ ਹੈ,''ਮੈਂ ਅਪਣਾ ਫ਼ਰਜ਼ ਨਿਭਾਇਆ...ਕੋਈ ਅਫ਼ਸੋਸ ਨਹੀਂ | ਮੇਰੀ ਸਾਰਿਆਂ ਨੂੰ  ਅਪੀਲ ਹੈ ਕਿ ਉਹ ਇਸ ਮੁੱਦੇ ਦਾ ਸਿਆਸੀਕਰਨ ਨਾ ਕਰਨ | ਮੇਰੀ ਰਿਪੋਰਟ ਤੇ ਚਾਰਜਸ਼ੀਟ ਦਾ ਇਕ-ਇਕ ਵਾਕ ਅਪਣੇ-ਆਪ ਵਿਚ ਇਕ ਸਬੂਤ ਹੈ | ਇਸੇ ਨੂੰ  ਕਿਸੇ ਵੀ ਪੱਖੋਂ ਝੂਠਲਾਇਆ ਨਹੀਂ ਜਾ ਸਕਦਾ | ਦੋਸ਼ੀ ਮਨ ਸਚਾਈ ਦਾ ਸਾਹਮਣਾ ਕਰਨ ਦੀ ਹਿੰਮਤ ਨਹੀਂ ਕਰ ਸਕਦਾ | ਮੈਂ ਆਖ਼ਰੀ ਫ਼ੈਸਲੇ ਲਈ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਦੀ ਅਦਾਲਤ 'ਚ ਅਪੀਲ ਦਾਇਰ ਕੀਤੀ ਹੈ | ਮੇਰੀ ਬੁੱਧੀ ਤੇ ਕਾਨੂੰਨੀ ਗਿਆਨ ਅਨੁਸਾਰ ਸੱਭ ਤੋਂ ਸਰਵੋਤਮ ਅਦਾਲਤ | ਮੈਂ ਸਮਾਜ ਦੀ ਸਰਵੋਤਮ ਤਰੀਕੇ ਨਾਲ ਸੇਵਾ ਜਾਰੀ ਰਖਾਂਗਾ ਪਰ ਆਈ.ਪੀ.ਐਸ ਵਜੋਂ ਨਹੀਂ |'' ਜ਼ਿਕਰਯੋਗ ਹੈ ਕਿ ਮੰਗਲਵਾਰ ਨੂੰ  ਉਨ੍ਹਾਂ ਦੀ ਇਛੁੱਕ ਸੇਵਾਮੁਕਤੀ ਅਪੀਲ ਨੂੰ  ਰੱਦ ਕਰਦਿਆਂ ਮੁੱਖ ਮੰਤਰੀ ਨੇ ਕਿਹਾ ਕਿ ਉਹ ਬਹੁਤ ਹੀ ਸਮਰੱਥ ਤੇ ਕੁਸ਼ਲ ਅਫ਼ਸਰ ਹੈ ਜਿਸ ਦੀਆਂ ਸੇਵਾਵਾਂ ਦੀ ਸਰਹੱਦੀ ਸੂਬੇ ਨੂੰ  ਲੋੜ ਹੈ |