ਗਿਆਨੀ ਕੇਵਲ ਸਿੰਘ ਨੇ ਪੰਜਾਬ ਦੇ ਮਸਲਿਆਂ ਸਬੰਧੀ ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ ਲਿਖੀ ਚਿੱਠੀ

ਸਿੱਖਾਂ ਦੀਆਂ ਸ਼ਿਕਾਇਤਾਂ ਇਸ ਰਾਜ ਵਿਚ ਹੋਰ ਵਧ ਗਈਆਂ

ਅੰਮਿ੍ਤਸਰ, 14 ਸਤੰਬਰ (ਸੁਖਵਿੰਦਰਜੀਤ ਸਿੰਘ ਬਹੋੜੂ): ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ  ਸਾਬਕਾ ਜਥੇਦਾਰ ਦਮਦਮਾ ਸਾਹਿਬ ਗਿ. ਕੇਵਲ ਸਿੰਘ ਨੇ ਚਿੱਠੀ ਲਿਖਦਿਆਂ ਕਿਹਾ ਹੈ ਕਿ ਪੰਜਾਬ ਕਿਥੋਂ ਕਿਥੇ ਆ ਗਿਆ ਹੈ, ਇਹ ਜੱਗ ਜ਼ਾਹਰ ਹੈ | ਇਸ ਨਿਘਾਰ ਲਈ ਪੰਜਾਬ ਦੀਆਂ ਰਾਜਨੀਤਕ ਧਿਰਾਂ ਮੁੱਖ ਦੋਸ਼ੀ ਹਨ | ਤੁਸੀਂ ਪੰਜਾਬ ਦੀ ਹੋਣੀ ਨਵੇਂ ਸਿਰਿਉਂ ਸਿਰਜਣ ਦਾ ਭਰੋਸਾ ਦੇ ਕੇ ਆਸਣ 'ਤੇ ਆਸੀਨ ਹੋਏ ਹੋ | ਤੁਹਾਡੇ ਵਲੋਂ ਰੇਤ ਮਾਫ਼ੀਆ ਤੋਂ ਮੁਕਤੀ, ਨਸ਼ਿਆਂ ਤੋਂ ਮੁਕਤੀ, ਭਿ੍ਸ਼ਟਾਚਾਰ ਤੋਂ ਮੁਕਤੀ ਅਤੇ ਬੇਰੁਜ਼ਗਾਰੀ ਤੋਂ ਮੁਕਤੀ ਇਤਿਆਦਿ ਕਈ ਮੁਕਤੀਆਂ ਦੇ ਬਹੁਤ ਸਾਰੇ ਵਾਅਦੇ ਕੀਤੇ ਗਏ | ਸਮਾਜਕ ਕਾਰਜਕਰਤਾ ਸੱਜਣਾਂ ਦੇ ਮੂੰਹੋਂ ਇਹ ਵੀ ਸੁਣਨ ਨੂੰ  ਮਿਲਦਾ ਹੈ ਕਿ ਥਾਣਿਆਂ ਵਿਚ ਕੰਮ ਕਰਵਾਉਣੇ ਪਹਿਲਾਂ ਨਾਲੋਂ ਮਹਿੰਗੇ ਹੋ ਗਏ ਹਨ | ਆਮ ਆਦਮੀ ਪਾਰਟੀ ਦੇ ਕਾਰਕੁਨਾਂ ਦੀ ਵੀ ਸੁਣਵਾਈ ਨਹੀਂ ਹੁੰਦੀ | ਆਮ ਲੋਕ ਜੋ ਤੱਥ ਪੇਸ਼ ਕਰ ਰਹੇ ਹਨ, ਸ਼ਾਇਦ ਉਹ ਝੂਠ ਹੀ ਹੋਣਗੇ |
ਉਨ੍ਹਾਂ ਕਿਹਾ ਕਿ ਮੁੱਖ ਮੰਤਰੀ ਪੰਜਾਬ ਨੂੰ  ਪੰਜਾਬ-ਪੱਖੀ ਤੇ ਨਿਰਪੱਖ ਛਵੀ ਵਾਲਾ ਐਡਵੋਕੇਟ ਜਨਰਲ ਵੀ ਨਸੀਬ ਨਹੀਂ ਹੋ ਸਕਿਆ | ਕੀ ਇਹ ਸੱਚ ਹੈ ਕਿ ਜੋ ਨੁਮਾਇੰਦਾ ਅੱਜ ਕੁਰਸੀ 'ਤੇ ਹੈ ਉਹ ਚਰਚਿਤ ਸਾਧ ਤੇ ਸੁਮੇਧ ਸੈਣੀ ਦਾ ਵਕੀਲ ਰਿਹਾ ਹੈ? ਜੇ ਇਹ ਸੱਚ ਹੈ ਤਾਂ ਪੰਜਾਬ ਨਾਲ ਵਾਰ-ਵਾਰ ਧੋਖਾ ਹੋ ਰਿਹਾ ਹੈ | ਪੰਜਾਬ ਨਾਲ ਹੋਈਆਂ ਬੀਤੇ ਦੀਆਂ ਠੱਗੀਆਂ ਦੇ ਨਿਬੇੜੇ ਲਈ ਲੋਕ-ਹਿਤ ਵਿਚ ਕਿਹੜਾ ਕਿਹੜਾ ਕਦਮ ਪੁੱਟ ਲਿਆ, ਸਵਾਲਾਂ ਦੀ ਝੜੀ ਲੱਗ ਜਾਏਗੀ | ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀਆਂ ਬੇਅਦਬੀ ਦੀਆਂ ਘਟਨਾਵਾਂ ਅਤੇ ਸ਼ਹੀਦ ਹੋਏ ਸਿੱਖਾਂ ਦੇ ਕਾਤਲਾਂ ਨੂੰ  ਸਜ਼ਾ ਦਿਵਾਉਣ ਵਾਲਾ ਮਸਲਾ ਅੱਜ ਵੀ ਜਿਉਂ ਦੀ ਤਿਉਂ ਹੈ | ਅੱਜ ਵੀ ਪੰਜਾਬ ਤੇ ਇਨਸਾਫ਼ਪ੍ਰਸਤ ਜਗਤ ਇਨਸਾਫ਼ ਦੀ ਉਡੀਕ ਵਿਚ ਬੈਠਾ ਹੈ | ਪੰਜਾਬ ਦੇ ਵਾਰਸ ਖ਼ੂਨ ਦੇ ਅੱਥਰੂ ਵਹਾ ਰਹੇ ਹਨ | ਲਾਰਿਆਂ ਵਾਲੇ ਵਿਹਾਰ ਤੋਂ ਦੁਖੀਆਂ ਦੇ ਸਵਾਲ ਹਨ ਕਿ ਸਮਾਂ-ਬੱਧ ਕਰਮ ਕਿਉਂ ਨਹੀਂ ਹੋ ਰਿਹਾ?