'ਜੇ ਪੁਲਿਸ ਨਾਜਾਇਜ਼ ਧੱਕਾ ਕਰਨਾ ਨਹੀਂ ਛੱਡਦੀ ਤਾਂ ਪੁਲਿਸ ਨੂੰ ਉਨ੍ਹਾਂ ਦੇ ਸਟਾਈਲ 'ਚ ਹੀ ਜਵਾਬ ਦੇਵਾਂਗੇ'
ਕਿਹਾ- ਦਿੱਲੀ ਤੋਂ ਫੜੇ ਗਏ ਸਾਥੀਆਂ ਕੋਲ ਕੋਈ ਗ੍ਰਨੇਡ ਨਹੀਂ ਸੀ, ਪੁਲਿਸ ਨੇ ਗ੍ਰਨੇਡ ਦੀ ਨਾਜਾਇਜ਼ ਬਰਾਮਦਗੀ ਦਿਖਾਈ
ਚੰਡੀਗੜ੍ਹ : ਗੈਂਗਸਟਰ ਅਰਸ਼ ਡੱਲਾ ਨੇ ਆਪਣੇ ਚਾਰ ਸਾਥੀਆਂ ਦੀ ਗ੍ਰਿਫਤਾਰੀ ਤੋਂ ਬਾਅਦ ਫੇਸਬੁੱਕ ‘ਤੇ ਪੋਸਟ ਪਾ ਕੇ ਪੁਲਿਸ ਨੂੰ ਚਿਤਾਵਨੀ ਦਿੱਤੀ ਹੈ। ਸੋਸ਼ਲ ਮੀਡਿਆ 'ਤੇ ਪੋਸਟ ਸਾਂਝੀ ਕਰ ਉਨ੍ਹਾਂ ਲਿਖਿਆ ਕਿ ਬੀਤੇ ਦਿਨੀਂ ਗ੍ਰਿਫ਼ਤਾਰ ਕੀਤੇ ਸਾਡੇ ਸਾਥੀਆਂ ਕੋਲੋਂ ਕੋਈ ਵੀ ਗ੍ਰਨੇਡ ਨਹੀਂ ਮਿਲਿਆ ਸੀ ਸਗੋਂ ਪੁਲਿਸ ਵਲੋਂ ਇਹ ਨਾਜਾਇਜ਼ ਬਰਾਮਦਗੀ ਦਿਖਾਈ ਗਈ ਹੈ।
ਪੋਸਟ ਵਿਚ ਅੱਗੇ ਲਿਖਿਆ ਕਿ ਪੰਜਾਬ ਵਿਚ ਜੋ ਤਿੰਨ ਥਾਵਾਂ 'ਤੇ ਮਿਲੇ ਬੰਬਾਂ ਨਾਲ ਮੇਰਾ ਕੋਈ ਲੈਣਾ-ਦੇਣਾ ਨਹੀਂ ਹੈ। ਜ਼ਿਕਹਾਰਯੋਗ ਹੈ ਕਿ 2 ਦਿਨ ਪਹਿਲਾਂ ਹੀ ਪੁਲਿਸ ਨੇ ਅਰਸ਼ ਡੱਲਾ ਦੇ ਚਾਰ ਸਾਥੀਆਂ ਨੂੰ ਦਿੱਲੀ ਤੋਂ ਗ੍ਰਿਫ਼ਤਾਰ ਕੀਤਾ ਸੀ। ਪੁਲਿਸ ਨੇ 3 ਗ੍ਰੇਨੇਡ ਤੇ 9mm ਪਿਸਤੌਲਾਂ ਤੇ ਕਾਰਤੂਸ ਇਨ੍ਹਾਂ ਤੋਂ ਬਰਾਮਦ ਕੀਤੇ ਸਨ।
photo
ਅਰਸ਼ ਡੱਲਾ ਨੇ ਪੋਸਟ ਵਿੱਚ ਲਿਖਿਆ, ''ਪਲਿਸ ਵੱਲੋਂ ਗ੍ਰਿਫ਼ਤਾਰ ਕੀਤੇ ਗਏ ਦੀਪਕ ਮੋਗਾ ਤੇ ਸੰਨੀ ਈਸਾਪੁਰ ਕੋਲ ਦੋ 9mm ਪਿਸਟਲ ਤੇ 100 ਦੇ ਕਰੀਬ ਕਾਰਤੂਸ ਸੀ ਪਰ ਕੋਈ ਬੰਬ ਜਾਂ ਗ੍ਰੇਨੇਡ ਨਹੀਂ ਸੀ। ਪੁਲਿਸ ਆਪਣੇ ਨੰਬਰ ਤੇ ਤਾਰਿਆਂ ਲਈ ਇੱਕ ਵਾਰ ਵੀ ਕਿਸੇ ਬੇਕਸੂਰ ‘ਤੇ ਪਰਚਾ ਪਾਉਣ ਲੱਗੀ ਨਹੀਂ ਸੋਚਦੀ। ਉਸ ਨੇ ਕਿਹਾ ਕਿ ਜਿਨ੍ਹਾਂ ਨੇ ਇਹ ਪਰਚਾ ਪਾਇਆ ਜੇ ਉਹ ਸੱਚੇ ਨੇ ਤਾਂ ਸਾਰੀ ਟੀਮ ਆਪਣੇ ਬੱਚਿਆਂ ਨਾਲ ਮੀਡੀਆ ਸਾਹਮਣੇ ਆ ਕੇ ਗੁਰੂ ਘਰ ਜਾ ਕੇ ਸਹੁੰ ਚੁੱਕਣ।''
photo
ਉਸ ਨੇ ਅੱਗੇ ਕਿਹਾ ਕਿ ਪੁਲਿਸ ਬਿਨ੍ਹਾ ਵਜ੍ਹਾ ਤੋਂ ਮੈਨੂੰ ਅਤੇ ਮੇਰੇ ਭਰਾਵਾਂ ਨੂੰ ਅੱਤਵਾਦੀ ਬਣਾਈ ਜਾ ਰਹੀ ਹੈ, ਇਹ ਲੋਕ ਦੱਸਣ ਜੇ ਮੈਂ ਅੱਜ ਤੱਕ ਕਿਤੇ ਕੋਈ ਧਮਾਕਾ ਕੀਤਾ ਹੋਇਆ ਹੋਵੇ। ਉਸ ਨੇ ਕਿਹਾ ਕਿ ਮੇਰੇ ਨਾਲ ਇਹ ਤੀਜੀ ਵਾਰ ਹੈ। ਪਹਿਲਾਂ ਫਾਜ਼ਿਲਕਾ ਫਿਰ ਗੁਰਦਾਸਪੁਰ ਸਾਈਡ ਹੁਣ ਮੋਹਾਲੀ ਤਿੰਨੋਂ ਥਾਵਾਂ ‘ਤੇ ਇਨ੍ਹਾਂ ਬੰਬਾਂ ਨਾਲ ਮੇਰਾ ਕੋਈ ਲੈਣਾ-ਦੇਣਾ ਨਹੀਂ ਸੀ।
ਗੈਂਗਸਟਰ ਅਰਸ਼ ਡੱਲਾ ਨੇ ਪੁਲਿਸ ਨੂੰ ਚਿਤਾਵਨੀ ਦਿੰਦਿਆਂ ਕਿਹਾ ਕਿ ਜੇ ਇਹ ਲੋਕ ਨਹੀਂ ਹੱਟ ਸਕਦੇ ਤਾਂ ਸਿੱਧਾ ਕੋਈ ਅਫਸਰ ਮੈਨੂੰ ਫੋਨ ਕਰਕੇ ਕਹਿ ਦੇਵੇ ਕਿ ਅਸੀਂ ਨਾਜਾਇਜ਼ ਕਰਨੋਂ ਨਹੀਂ ਹੱਟਣਾ ਫਿਰ ਮੈਂ ਵੀ ਉਸੇ ਸਟਾਈਲ ਵਿੱਚ ਜਵਾਬ ਦੇਵਾਂਗਾ ਕਿਉਂਕਿ ਇਹ ਸਾਨੂੰ ਬਗ਼ੈਰ ਕਿਸੇ ਗੱਲ ਤੋਂ ਪਰਚੇ ਪਾ ਕੇ ਮਜਬੂਰ ਕਰ ਰਹੇ ਹਨ।
