ਪਰਗਟ ਸਿੰਘ ਦੇ ਘਰ ’ਚ ਵੜੇ ਧਰਨਾਕਾਰੀ ਅਧਿਆਪਕ, ਨਵੇਂ ਐਸ.ਐਚ.ਓ ਲਾਈਨ ਹਾਜ਼ਰ
ਜਲੰਧਰ, 15 ਨਵੰਬਰ (ਵਰਿੰਦਰ ਸ਼ਰਮਾ, ਨਰਿੰਦਰ ਸਿੰਘ) : ਸਿਖਿਆ ਮੰਤਰੀ ਪਰਗਟ ਸਿੰਘ ਦੇ ਘਰ ਦੇ ਸਾਹਮਣੇ ਧਰਨਾ ਦੇ ਰਹੇ ਅਧਿਆਪਕਾਂ ਦੇ ਉਨ੍ਹਾਂ ਦੇ ਘਰ ’ਚ ਵੜਨ ਦੀ ਗਾਜ਼ ਨਵੇਂ ਆਏ ਪੁਲਿਸ ਸਟੇਸ਼ਨ ਡਵੀਜ਼ਨ ਨੰਬਰ 7 ਦੇ ਐੱਸਐੱਚਓ ਰਵਿੰਦਰ ਕੁਮਾਰ ’ਤੇ ਡਿੱਗੀ ਹੈ। ਉਨ੍ਹਾਂ ਕੁੱਝ ਘੰਟੇ ਪਹਿਲਾਂ ਹੀ ਥਾਣੇ ’ਚ ਜੁਆਇਨ ਕੀਤਾ ਸੀ। ਹੁਣ ਉਨ੍ਹਾਂ ਨੂੰ ਲਾਈਨ ਹਾਜ਼ਰ ਕਰ ਦਿਤਾ ਗਿਆ ਹੈ। ਦਸਿਆ ਜਾ ਰਿਹਾ ਹੈ ਕਿ ਪਰਗਟ ਸਿੰਘ ਦੇ ਘਰ ’ਚ ਵੜਨ ਵਾਲੇ ਬੇਰੁਜ਼ਗਾਰ ਪੀਟੀਆਈ ਅਧਿਆਪਕ ਹਨ।
ਦਸਿਆ ਜਾ ਰਿਹਾ ਹੈ ਕਿ ਅਧਿਆਪਕ ਪਹਿਲਾਂ ਬਾਹਰ ਬੈਠ ਕੇ ਨਾਹਰੇਬਾਜ਼ੀ ਕਰ ਰਹੇ ਸਨ, ਬਾਅਦ ਵਿਚ ਉਹ ਬੈਰੀਕੇਡਸ ਸੁੱਟਦੇ ਹੋਏ ਅੱਗੇ ਵਧ ਗਏ ਤੇ ਸਿਖਿਆ ਮੰਤਰੀ ਪਰਗਟ ਸਿੰਘ ਦੇ ਘਰ ਅੰਦਰ ਦਾਖ਼ਲ ਹੋਣ ’ਚ ਕਾਮਯਾਬ ਹੋ ਗਏ। ਇਸੇ ਕਾਰਨ ਐਸਐਚਓ ਵਿਰੁਧ ਇਹ ਕਾਰਵਾਈ ਕੀਤੀ ਗਈ ਹੈ।
ਇਸ ਤੋਂ ਪਹਿਲਾਂ ਬੇਰੁਜ਼ਗਾਰ ਪੀਟੀਆਈ ਅਧਿਆਪਕਾਂ ਨੇ ਮੰਤਰੀ ਦੀ ਕੋਠੀ ਤਕ ਰੋਸ ਰੈਲੀ ਕੱਢੀ ਸੀ। ਮੰਤਰੀ ਨਹੀਂ ਮਿਲੇ ਤਾਂ ਪਹਿਲਾਂ ਬਾਹਰ ਧਰਨੇ ’ਤੇ ਬੈਠ ਗਏ ਤੇ ਬਾਅਦ ਵਿਚ ਬੈਰੀਕੇਡ ਤੋੜ ਕੇ ਅੰਦਰ ਜਾ ਕੇ ਧਰਨਾ ਲਗਾ ਦਿਤਾ। ਉਹ ਆਪਣੀਆਂ ਮੰਗਾਂ ਨੂੰ ਲੈ ਕੇ ਅੜ ਗਏ। ਬਾਅਦ ’ਚ ਉਨ੍ਹਾਂ ਨੂੰ 17 ਨਵੰਬਰ ਨੂੰ ਸਿਖਿਆ ਮੰਤਰੀ ਨਾਲ ਬੈਠਕ ਦਾ ਭਰੋਸਾ ਮਿਲਿਆ ਤਾਂ ਧਰਨਾ ਚੁਕਿਆ।
ਬੇਰੁਜ਼ਗਾਰ ਪੀਟੀਆਈ ਅਧਿਆਪਕ ਯੂਨੀਅਨ ਦੇ ਪ੍ਰਦੇਸ਼ ਪ੍ਰਧਾਨ ਅਮਨਦੀਪ ਕੰਬੋਜ ਨੇ ਕਿਹਾ ਕਿ ਸਰਕਾਰ ਨੇ 2006 ਤੋਂ ਬਾਅਦ ਕੋਈ ਵੀ ਪੀਟੀਆਈ ਅਧਿਆਪਕ ਭਰਤੀ ਨਹੀਂ ਕੀਤੀ ਹੈ। ਉਹ ਨਵੀਆਂ ਪੰਜ ਹਜ਼ਾਰ ਪੋਸਟਾਂ ਭਰਤੀ ਕਰਨ ਦੀ ਮੰਗ ਕਰ ਰਹੇ ਹਨ ਪਰ ਸਰਕਾਰ ਸੁਣਵਾਈ ਨਹੀਂ ਕਰ ਰਹੀ। ਇਸ ਮੌਕੇ ਮੀਤ-ਪ੍ਰਧਾਨ ਗੋਬਿੰਦ ਸਿੰਘ, ਜਨਰਲ ਸਕੱਤਰ ਵਰਿੰਦਰ ਸਿੰਘ, ਗੁਰਵਿੰਦਰ ਸਿੰਘ, ਕੈਸ਼ੀਅਰ ਦਵਿੰਦਰ ਕੁਮਾਰ, ਅਮਨਦੀਪ ਕੌਰ, ਰਿੰਪੀ, ਪ੍ਰਿਅੰਕਾ, ਮੰਜੂ, ਮਮਤਾ, ਸ਼ਰਨ, ਹੰਸਰਾਜ, ਸੰਦੀਪ ਕੁਮਾਰ, ਸ਼ਮਸ਼ੇਰ ਸਿੰਘ ਆਦਿ ਸਨ।
ਫ਼ੋਟੋ : ਜਲੰਧਰ ਪ੍ਰਗਟ ਸਿੰਘ
ਡੱਬੀ